2 Otànnugbo lẹ

34 Owhe ṣinatọ̀n wẹ Josia+ tindo to whenue e duahọlu, e sọ dugán to Jelusalẹm na owhe 31.+ 2 E wà nuhe sọgbe to nukun Jehovah tọn mẹ bo zinzọnlin gbọn aliho Davidi tọgbo etọn tọn lẹ ji, e ma lẹ́ yì adusi kavi yì amiyọn.

3 To owhe 8tọ gandudu etọn tọn mẹ, to whenue ewọ gbẹ́ yin yọpọ sunnu de, e jẹ Jiwheyẹwhe Davidi tọgbo etọn tọn dín ji;+ podọ to owhe 12tọ mẹ, e jẹ Juda po Jelusalẹm po+ klọ́we ji gbọn ofi yiaga+ lẹ po dòtin wiwe* lẹ po, boṣiọ pipà lẹ po boṣiọ kinkọ̀n+ lẹ po didesẹ dali. 4 Humọ, yé họ́ agbà Baali tọn lẹ liai to nukọn etọn, bọ e sán agbà nuyọnwan tọn he to aga na yé lẹ liai. E sọ gbà dòtin wiwe* lẹ, boṣiọ pipà lẹ po boṣiọ kinkọ̀n lẹ po hányán bo lì yé pọ́dọ́pọ́dọ́ bosọ vúnvún yé do yọdò mẹhe nọ sanvọ́ hlan yé lẹ tọn ji.+ 5 E sọ mẹ̀ ohú yẹwhenọ lẹ tọn to agbà yetọn lẹ ji.+ Gbọnmọ dali, e klọ́ Juda po Jelusalẹm po wé.

6 Podọ to tòdaho Manasse, Eflaimi+ po Simeoni po tọn lẹ mẹ kaka yì Naftali gọna lẹdo yetọn he gbakija lẹ, 7 e họ́ agbà lẹ liai bo gbà dòtin wiwe* lẹ po boṣiọ pipà+ lẹ po hányán bosọ lì yé pọ́dọ́pọ́dọ́; e sọ sán agbà nuyọnwan tọn he to aigba Islaeli tọn ji lẹpo liai,+ podọ e lẹkọyi Jelusalẹm to enẹgodo.

8 To owhe 18tọ gandudu etọn tọn mẹ, whenue e ko klọ́ aigba lọ po tẹmpli* lọ po wé godo, e do Ṣafani+ visunnu Azalia tọn, Maaseia ogán tòdaho lọ tọn po Joa visunnu Joahazi kandai-basitọ lọ tọn po hlan nado vọ́ ohọ̀ Jehovah Jiwheyẹwhe etọn tọn jlado.+ 9 Yé yì Hilkia yẹwhenọ daho lọ dè bo bẹ akuẹ he ko yin hinhẹnwa ohọ̀ Jiwheyẹwhe tọn mẹ lẹ na ẹn, ehe Levinu he nọ wadevizọn taidi họ̀njinọtọ lẹ ko bẹpli sọn Manasse, Eflaimi po omẹ Islaeli tọn he pò lẹpo po si,+ podọ sọn Juda, Bẹnjamini po mẹhe nọ nọ̀ Jelusalẹm lẹ po si. 10 Yé sọ bẹ ẹ jo na mẹhe yin dide nado penukundo azọ́n lọ go to ohọ̀ Jehovah tọn mẹ lẹ. Podọ mẹhe to azọ́nwa to ohọ̀ Jehovah tọn go lẹ yí i do vọ́ ohọ̀ lọ jlado. 11 Yé bẹ akuẹ lọ jo na anazọ́nwatọ lẹ po họ̀gbátọ lẹ po nado họ̀ zannu pipà lẹ po owhlẹ lẹ po nado gla ohọ̀ lọ lẹ bo yí atin lẹ do gbá ohọ̀ he ahọlu Juda tọn lẹ ko jodo bọ yé kija lọ lẹ.+

12 Sunnu lọ lẹ wazọ́n yetọn po nugbonọ-yinyin po.+ Levinu he yin dide do yé nù nado wadevizọn taidi nugopọntọ lẹ wẹ Jahati po Obadia po sọn Melalinu+ lẹ mẹ, Zekalia po Meṣulami po sọn Kohatinu+ lẹ mẹ. Podọ Levinu lọ lẹ, he yemẹpo yin hànsinọ azọ́nyọnẹntọ lẹ+ 13 wẹ nọ penukundo pakanọ paa* lẹ go bosọ yin nugopọntọ lẹ na mẹdepope he to azọ́n lọ wà to azọ́ntẹn wunmẹ lẹpo mẹ; delẹ to Levinu lẹ mẹ sọ yin wekantọ lẹ, anademẹtọ lẹ po họ̀njinọtọ lẹ po.+

14 Dile yé to akuẹ he ko yin hinhẹnwa ohọ̀ Jehovah tọn mẹ lẹ bẹ sọyi,+ Hilkia yẹwhenọ lọ mọ owe Osẹ́n Jehovah tọn+ he yin nina gbọn Mose* gblamẹ lọ.+ 15 Enẹwutu, Hilkia dọna Ṣafani wekantọ lọ dọmọ: “Yẹn ko mọ owe Osẹ́n lọ tọn to ohọ̀ Jehovah tọn mẹ.” Hilkia sọ ze owe lọ jo na Ṣafani. 16 Enẹgodo, Ṣafani ze owe lọ yì na ahọlu bo dọna ẹn dọmọ: “Devizọnwatọ towe lẹ to azọ́n he yin didena yé lẹpo wà. 17 Yé ko kọ̀n akuẹ he yin mimọ to ohọ̀ Jehovah tọn mẹ lẹ sọn númẹ bo ko bẹ jo na sunnu he yin dide lọ lẹ po mẹhe to azọ́n lọ wà lẹ po.” 18 Humọ, Ṣafani wekantọ lọ dọna ahọlu dọmọ: “Hilkia yẹwhenọ lọ ko ze owe de na mi.”+ Ṣafani sọ jẹ owe lọ hia na ahọlu ji.+

19 Tlolo he ahọlu sè ohó he to Osẹ́n lọ mẹ lẹ, e tlẹ́n awù etọn lẹ.+ 20 Ahọlu sọ na gbedide ehe Hilkia, Ahikami+ visunnu Ṣafani tọn, Abdọni visunnu Mika tọn, Ṣafani wekantọ lọ po Asaia devizọnwatọ ahọlu tọn lọ po dọmọ: 21 “Mì yì kanhose Jehovah do ota ṣie mẹ podọ do ota omẹ Islaeli po Juda po tọn he pò lẹ tọn mẹ, gando ohó he to owe he ko yin mimọ lọ mẹ lẹ go; na adi Jehovah tọn he na yin kinkọnjẹgbonu do mí ji lọ sinyẹn taun, na tọgbo mítọn lẹ ma setonuna ohó Jehovah tọn bo ma payi nuhe yin kinkan do owe ehe mẹ lẹpo go.”+

22 Enẹwutu, Hilkia po mẹhe ahọlu dohlan dogọ ẹ lẹ po yì Hulda yẹwhegán-yọnnu lọ dè.+ Ewọ wẹ yin asi Ṣalumi visunnu Tikva he yin visunnu Halhasi tọn, yèdọ mẹhe nọ penukundo fie avọ̀ lẹ nọ yin bibẹ do go lọ, podọ yọnnu lọ nọ nọ̀ Agbegbe Awetọ Jelusalẹm tọn ji; yé sọ yì dọho hẹ ẹ to finẹ.+ 23 E dọna yé dọmọ: “Nuhe Jehovah Jiwheyẹwhe Islaeli tọn dọ die, ‘Mì dọna dawe he do mì hlan dè e lọ dọ: 24 “Nuhe Jehovah dọ die, ‘Yẹn na hẹn nugbajẹmẹji wá nọtẹn ehe po mẹhe nọ nọ̀ e mẹ lẹ po ji,+ yèdọ dẹ̀hodo he yin kinkan do owe+ he yé hia to ahọlu Juda tọn nukọn lọ mẹ lẹpo. 25 Na yé ko gbẹ́ mi dai+ bo to avọ́sinsan mimẹ̀ lẹ basi na yẹwhe devo lẹ nado yí azọ́n alọ yetọn tọn lẹpo do hẹn homẹgble mi+ wutu, adi ṣie na yin kinkọnjẹgbonu do nọtẹn ehe ji bo ma na yin alọhẹndotena.’”+ 26 Ṣigba, nuhe mì dona dọna ahọlu Juda tọn he do mì hlan nado kanhose Jehovah die, “Nuhe Jehovah Jiwheyẹwhe Islaeli tọn dọ die: ‘Na nuhe dù ohó he hiẹ ko sè lẹ,+ 27 na ahun towe yawu yinuwa* bọ hiẹ whiwhẹ dewe to Jiwheyẹwhe nukọn to whenue a sè nuhe e dọ gando nọtẹn ehe po mẹhe nọ nọ̀ e mẹ lẹ po go, bọ hiẹ whiwhẹ dewe to nukọn ṣie bo tlẹ́n awù towe lẹ bosọ viavi to nukọn ṣie wutu, yẹnlọsu ko sè towe,+ wẹ Jehovah dọ. 28 Enẹ wẹ zọ́n bọ yẹn na hẹn we nado yin dìdì taidi tọgbo towe lẹ,* bọ hiẹ na yin hinhẹn nado mlọnai to yọdò towe mẹ to jijọho mẹ, podọ nukun towe lẹ ma na mọ nugbajẹmẹji lọ lẹpo he yẹn na hẹnwa nọtẹn ehe po mẹhe nọ nọ̀ e mẹ lẹ po ji.’”’”+

Enẹgodo, yé wá dogbè na ahọlu. 29 Ahọlu sọ dowẹn hlan bo ylọ mẹho Juda po Jelusalẹm po tọn lẹpo pli.+ 30 Enẹgodo, ahọlu hẹji yì ohọ̀ Jehovah tọn mẹ to pọmẹ hẹ mẹho Juda tọn lẹpo, mẹhe nọ nọ̀ Jelusalẹm lẹ, yẹwhenọ lẹ po Levinu lẹ po—yèdọ gbẹtọ lọ lẹpo, mẹho po yọpọ po. E sọ hia nuhe to owe alẹnu tọn lọ he ko yin mimọ to ohọ̀ Jehovah tọn mẹ lẹpo na yé.+ 31 Ahọlu nọte to otẹn etọn mẹ bo basi alẹnu de*+ to Jehovah nukọn dọ ewọ na yí ahun lẹpo po alindọn* lẹpo+ po do hodo Jehovah bo payi gbedide etọn lẹ, nuflinmẹ etọn lẹ po aṣẹdai etọn lẹ po go gbọn tonusisena ohó alẹnu lọ tọn lẹ dali, ehe ko yin kinkan do owe ehe mẹ.+ 32 Humọ, e hẹn omẹ Jelusalẹm po Bẹnjamini tọn lẹpo po nado yigbena alẹnu lọ. Mẹhe nọ nọ̀ Jelusalẹm lẹ sọ yinuwa to kọndopọ mẹ hẹ alẹnu Jiwheyẹwhe tọn lọ, yèdọ Jiwheyẹwhe tọgbo yetọn lẹ tọn.+ 33 Josia de osùnú* lẹpo sẹ̀ sọn aigba he yin Islaelivi lẹ tọn lẹpo ji bo hẹn mẹhe to Islaeli lẹpo+ nado nọ sẹ̀n Jehovah Jiwheyẹwhe yetọn. To gbẹwhenu etọn blebu,* yé ma lẹ́ sọn Jehovah Jiwheyẹwhe tọgbo yetọn lẹ tọn hihodo mẹ.