Salmu lẹ

Ojlo vẹkuvẹku he n’tindo na we to hinhẹn mi* dakú

To aigba-klo he hú taun de ji, fie osin ma tin te.+

 2 Enẹwutu, yẹn ko pọ́n we hlan to ofi wiwe lọ;

N’ko mọ huhlọn towe po gigo towe po.+

 3 Na owanyi nugbo towe pọnte hú ogbẹ̀ wutu,+

Nùflo ṣie lẹ na nọ pagigona we.+

 4 Mọ wẹ yẹn na nọ pà we do to gbẹwhenu ṣie pete;

Yẹn na nọ dlẹnalọ ṣie lẹ daga, to oyín towe mẹ.

 5 N’nọ* dù adà dagbe he yọ́n hugan lọ* gọ́ho,

Enẹwutu, yẹn na nọ yí onù ṣie do pà we po ayajẹ po.+

 6 N’nọ flin we to adọzan ṣie ji;

Yẹn nọ lẹnayihamẹpọn gando gowe to zánhomẹ.+

 7 Na hiẹ wẹ alọgọtọ ṣie,+

Yẹn sọ nọ yí ayajẹ do dawhá to oyẹ̀ awà towe lẹ tọn glọ.+

 8 Yẹn* tẹdo gowe pẹkipẹki;

Adusilọ towe hẹn go e gligli.+

 9 Ṣigba, yé mẹhe to tintẹnpọn nado hù mi* lẹ

Na jẹte yì odò he siso mẹ.

10 Yé na yin huhusudo gbọn ohí dali;

Yé na lẹzun núdùdù na avún gbémẹ tọn* lẹ.

Mẹdepope he nọ whlé gbọn Ewọ dali na nọ jẹaglin,*

Na yè na bọnùdo na mẹhe nọ dolalo lẹ.