Johanu

18 To whenue Jesu ko dọ onú ehelẹ godo, ewọ po devi etọn lẹ po tọ́nyi awà awetọ Agbàdo* Kidlọni tọn ji,+ fihe jipa de te, ewọ po devi etọn lẹ po sọ biọ e mẹ.+ 2 Todin, Juda, mẹdehiatọ etọn lọsu yọ́n filọ, na Jesu nọ saba pli po devi etọn lẹ po to finẹ. 3 Enẹwutu, Juda plan pipli awhànfuntọ lẹ tọn gọna ponọ yẹwhenọgán lẹ po Falesi lẹ po tọn lẹ bọ yé hẹn zòwhán lẹ, miyọ́ngbán lẹ po adánwanu lẹ po wá finẹ.+ 4 Enẹwutu, na Jesu ko yọ́n nuhe to na jọ do e go lẹpo wutu, e sẹwá nukọn bo dọna yé dọmọ: “Mẹnu dín wẹ mì te?” 5 Yé gblọnna ẹn dọmọ: “Jesu Nazalẹti tọn.”+ E dọna yé dọmọ: “Yẹn wẹ.” Todin, Juda, mẹdehiatọ etọn lọsu to ote hẹ yé.+

6 Ṣigba, to whenue Jesu dọna yé dọ, “Yẹn wẹ,” yé joagọyigodo bo họ́jai.+ 7 Enẹwutu, e sọ vọ́ kanse yé dọmọ: “Mẹnu dín wẹ mì te?” Yé dọmọ: “Jesu Nazalẹti tọn.” 8 Jesu gblọnna yé dọmọ: “N’dọna mì dọ yẹn wẹ. Enẹwutu, eyin yẹn wẹ mì to dindin, mì gbọ omẹ ehelẹ ni yì.” 9 Ehe yinmọ, na nuhe e dọ lọ nido yin hinhẹndi dọmọ: “Gando mẹhe hiẹ na mi lẹ go, yẹn ma hẹn dopo tata to yé mẹ bu.”+

10 To whenẹnu, Simọni Pita, he tindo ohí de, sún in bo hú afanumẹ yẹwhenọ daho lọ tọn bosọ pà otó adusiwhé tọn na ẹn.+ Oyín afanumẹ lọ tọn wẹ Malkọs. 11 Ṣigba, Jesu dọna Pita dọmọ: “Gọ̀ ohí lọ do apà etọn mẹ.+ Be yẹn ma na nù kọfo he Otọ́ ko na mi lọ wẹ ya?”+

12 To whenẹnu, awhànfuntọ lọ lẹ po awhàngán daho* lọ po gọna ponọ Ju lẹ tọn lẹ wle Jesu bo blá ẹ. 13 Yé plan ẹn yì Annas dè jẹnukọn, na ewọ wẹ asi-tọ́ Kaifa,+ mẹhe yin yẹwhenọ daho to owhe enẹ mẹ lọ tọn.+ 14 Na nugbo tọn, Kaifa wẹ mẹhe na ayinamẹ Ju lẹ dọ alenu wẹ e yin na yé dọ dawe dopo ni kú do ota gbẹtọ lẹ tọn mẹ.+

15 Todin, Simọni Pita po devi devo po to hihodo Jesu.+ Yẹwhenọ daho lọ yọ́n devi enẹ, podọ ewọ hodo Jesu yì awánu yẹwhenọ daho lọ tọn, 16 ṣigba Pita to ote to họngbo ji.* Enẹwutu, devi diẹ lọ, mẹhe yẹwhenọ daho lọ yọnẹn, tọ́njẹgbonu bo dọho hẹ họ̀njinọtọ lọ bosọ plan Pita biọ họmẹ. 17 Whenẹnu, deviyọnnu he yin họ̀njinọtọ lọ dọna Pita dọmọ: “Hiẹ lọsu yin dopo to devi dawe ehe tọn lẹ mẹ ga, kavi e ma yin mọ wẹ?” E sọ dọmọ: “Yẹn ma yin dopo to yé mẹ.”+ 18 Todin, afanumẹ lẹ po ponọ lẹ po to ote lẹdo akán-miyọ́n he yé flọ lọ bo to miyọ́n hú, na avivọ tin wutu. Pita lọsu tin to ote hẹ yé bo to miyọ́n hú.

19 To whenẹnu, yẹwhenọgán lọ kanhose Jesu gando devi etọn lẹ go podọ gando nuplọnmẹ etọn go. 20 Jesu gblọnna ẹn dọmọ: “Yẹn ko dọhona aihọn lọ to gbangba. Whepoponu wẹ yẹn nọ plọnmẹ to sinagọgu mẹ podọ to tẹmpli mẹ,+ fihe Ju lẹpo nọ pli do, yẹn masọ dọ nudepope to nuglọ. 21 Naegbọn hiẹ do to hokanse mi? Kanhose mẹhe ko sè nuhe yẹn dọna yé lẹ. Pọ́n! Ehelẹ yọ́n nuhe yẹn dọ lẹ.” 22 To whenue e ko dọ onú ehelẹ, dopo to ponọ he tin to ote to finẹ lẹ mẹ hotómẹ na Jesu+ bo dọmọ: “Be mọ wẹ hiẹ na na gblọndo yẹwhenọgán lọ do ya?” 23 Jesu gblọnna ẹn dọmọ: “Eyin nuhe n’dọ ylan, dọ nuhe ylan to e mẹ lọ na mi;* ṣigba eyin nuhe n’dọ lọ sọgbe, naegbọn hiẹ do linú mi?” 24 To whenẹnu, Annas do e hlan biblá yì Kaifa yẹwhenọ daho lọ dè.+

25 Todin, Simọni Pita to ote to finẹ bo to miyọ́n hú. To whenẹnu, yé dọna ẹn dọmọ: “Hiẹ lọsu yin dopo to devi etọn lẹ mẹ ga, kavi e ma yin mọ wẹ?” E mọ́n bo dọmọ: “Yẹn ma yin dopo to yé mẹ.”+ 26 Dopo to afanumẹ yẹwhenọ daho lọ tọn lẹ mẹ, he yin hẹnnumẹ mẹhe Pita pà otó na lọ tọn+ dọmọ: “Yẹn mọ we to jipa lọ mẹ hẹ ẹ, kavi yẹn ma mọ we wẹ?” 27 Ṣigba, Pita sọ mọ́n whladopo dogọ bọ koklo dosé to afọdopolọji.+

28 To whenẹnu, yé plan Jesu sọn Kaifa dè yì owhé ayimatẹn-gán lọ tọn gbè.+ Afọnnu fuu sọ wẹ. Ṣigba, yelọsu ma biọ owhé ayimatẹn-gán lọ tọn gbè, na yé nikaa yin hinhẹnflu,+ bọ yé nado penugo nado dù hùnwhẹ Juwayi tọn. 29 Enẹwutu, Pilati tọ́n wá yé dè bo dọmọ: “Whẹsadokọnamẹ tẹwẹ mì hẹnwa sọta dawe ehe?” 30 Yé sọ gblọnna ẹn dọmọ: “Eyin dawe ehe ma yin ylanwatọ* de, mí ma na ko ze e do alọmẹ na we.” 31 Enẹwutu, Pilati dọna yé dọmọ: “Mìlọsu ni plan ẹn bo dawhẹna ẹn sọgbe hẹ osẹ́n mìtọn.”+ Ju lẹ dọna ẹn dọmọ: “E ma sọgbe hẹ osẹ́n dọ mí ni hù mẹdepope.”+ 32 Ehe yinmọ, na ohó Jesu tọn nido sọgan yin hinhẹndi, ehe e dọ nado do okú wunmẹ he ewọ na kú to madẹnmẹ lọ hia.+

33 Enẹwutu, Pilati sọ vọ́ biọ owhé ayimatẹn-gán tọn gbè bo ylọ Jesu bosọ dọna ẹn dọmọ: “Be hiẹ wẹ Ahọlu Ju lẹ tọn ya?”+ 34 Jesu gblọn dọmọ: “Be ojlo towe titi mẹ janwẹ hiẹ to ehe kanse sọn ya, kavi mẹdevo lẹ wẹ dọhona we gando go e?” 35 Pilati gblọn dọmọ: “Yẹn ma yin Ju de, kavi e ma yin mọ wẹ? Akọta towe titi po yẹwhenọgán lẹ po wẹ ze we jo na mi. Etẹwẹ hiẹ wà?” 36 Jesu gblọn dọmọ:+ “Ahọluduta ṣie ma yin apadewhe aihọn ehe tọn.+ Eyin Ahọluduta ṣie ko yin apadewhe aihọn ehe tọn wẹ, devizọnwatọ ṣie lẹ na ko hoavùn bọ yẹn ma na ko yin zizejo na Ju lẹ.+ Ṣigba, nalete, Ahọluduta ṣie ma yin sọn aihọn ehe mẹ.” 37 Enẹwutu, Pilati dọna ẹn dọmọ: “Eyọn todin, be ahọlu de wẹ hiẹ yin ya?” Jesu gblọn dọmọ: “Hiẹ lọsu wẹ to didọ dọ n’yin ahọlu de.+ Na ehe wutu wẹ n’do yin jiji, podọ na ehe wutu wẹ n’ko wá aihọn mẹ, na yẹn nido dekunnu gando nugbo lọ go.+ Mẹdepope he to adà nugbo lọ tọn mẹ nọ dotoaina ogbè ṣie.” 38 Pilati dọna ẹn dọmọ: “Etẹwẹ yin nugbo?”

Whenue e ko dọ ehe godo, e sọ vọ́ tọ́nyi Ju lẹ dè bo dọna yé dọmọ: “Yẹn ma mọ oylan de to okọ̀ na ẹn.+ 39 Humọ, mì tindo aṣa de dọ yẹn ni nọ tún mẹde dote na mì to hùnwhẹ Juwayi tọn whenu.+ Enẹwutu, be mìwlẹ jlo dọ yẹn ni tún Ahọlu Ju lẹ tọn lọ dote na mì ya?” 40 Yé sọ vọ́ dawhá dọmọ: “E ma yin dawe ehe gba, ṣigba Balabas!” Nalete, Balabas yin jaguda de.+