Ezekiẹli

18 Ohó Jehovah tọn sọ vọ́ wá dè e dọmọ: 2 “Etẹwẹ oló he mì nọ do to aigba Islaeli tọn ji lọ zẹẹmẹdo he dọ dọ, ‘Otọ́ lẹ wẹ dù ovẹn sinsẹ́n he vẹsin, bọ e wá wle adú na visunnu lẹ’?+

3 “‘Dile yẹn togbẹ̀,’ wẹ Oklunọ Nupojipetọ Jehovah dọ, ‘mìwlẹ ma nasọ nọ yí aṣagbe ehe zan to Islaeli ba. 4 Pọ́n! Ṣie wẹ alindọn* lẹpo. Dile alindọn otọ́ tọn yin ṣie do, mọjanwẹ alindọn visunnu tọn yin ṣie do niyẹn. Alindọn he* waylando, ewọ lọ wẹ na kú.

5 “‘Eyin mẹde yin dodonọ bo nọ wà dodo po nuhe sọgbe po. 6 E ma nọ dù nuhe yin yíyí do sanvọ́ hlan boṣiọ lẹ to osó lẹ ji;+ e ma nọ jlọkọ̀ pọ́n boṣiọ hiọawu* owhé Islaeli tọn lẹ tọn; e masọ nọ hẹn asi kọmẹnu etọn tọn flu+ kavi tindo kọndopọ zanhẹmẹ tọn hẹ yọnnu he to ojlẹ lajijẹ tọn etọn mẹ;+ 7 e ma nọ sayana mẹdepope,+ ṣigba nọ gọ̀ nudepope he e yí taidi afàsúnú jo;+ e ma nọ hò mẹdepope dù,+ ṣigba e nọ yí núdùdù etọn titi na mẹhe huvẹ to hùhù+ bo nọ ṣinyọ́n avọ̀ na mẹhe to omẹ́;+ 8 e ma nọ donukun akuẹvi kavi ale,+ ṣigba e nọ dapana mawadodo;+ e nọ dawhẹ dodo na gbẹtọ lẹ;+ 9 e nọ yìn osẹ́ndoai ṣie lẹ bo nọ setonuna nudide whẹdida tọn ṣie lẹ nado yinuwa po nugbonọ-yinyin po. Dodonọ wẹ omẹ mọnkọtọn, ewọ nasọ nọgbẹ̀ dandan,’+ wẹ Oklunọ Nupojipetọ Jehovah dọ.

10 “‘Ṣigba, eyin ewọ wá yin otọ́ visunnu de tọn he yin jaguda,+ hlọnhutọ*+ kavi he nọ wà onú mọnkọtọn depope 11 (dile etlẹ yindọ otọ́ lọ ma ko wà depope to onú ehelẹ mẹ)—yèdọ eyin visunnu lọ nọ dù nuhe yin yíyí do sanvọ́ hlan boṣiọ lẹ to osó lẹ ji, nọ hẹn asi kọmẹnu etọn tọn flu, 12 nọ sayana agbátọnọ po wamọnọ po,+ nọ hòmẹdu, ma nọ gọ̀ nuhe e yí taidi afàsúnú jo, nọ jlọkọ̀ pọ́n boṣiọ hiọawu lẹ,+ nọ wà osùnú lẹ,+ 13 bo nọ donukun ale po akuẹvi po+—whenẹnu, ewọ ma na nọgbẹ̀. Na osùnú ehe lẹpo he e ko wà wutu, ewọ na yin hùhù dandan. Ohùn etọn nasọ tin to okọ̀ na ẹn.

14 “‘Ṣigba, eyin otọ́ de tindo visunnu de he mọ ylando he otọ́ etọn ko wà lẹpo, podọ dile ewọ tlẹ mọ nuhe e wà lẹ, ewọ ma wà onú mọnkọtọn lẹ. 15 Ewọ ma dù nuhe yin yíyí do sanvọ́ hlan boṣiọ lẹ to osó lẹ ji; e ma jlọkọ̀ pọ́n boṣiọ hiọawu owhé Islaeli tọn lẹ tọn; e ma hẹn asi kọmẹnu etọn tọn flu; 16 e ma sayana mẹdepope; e ma nọ ṣí nuhe e yí taidi afàsúnú lẹ ji; e ma hò nudepope yí to mẹde si; ewọ nọ yí núdùdù etọn titi na mẹhe huvẹ to hùhù bo nọ ṣinyọ́n avọ̀ na mẹhe to omẹ́; 17 e ma nọ bianukunna wamọnọ; e ma nọ donukun ale kavi akuẹvi; ewọ nọ setonuna nudide whẹdida tọn ṣie lẹ bo nọ yìn osẹ́ndoai ṣie lẹ. Omẹ mọnkọtọn ma na kú na nuṣiwa otọ́ etọn tọn wutu. Ewọ na nọgbẹ̀ dandan. 18 Ṣigba, na otọ́ etọn hòmẹdu, tafu nọvisunnu etọn bo wà oylan to omẹ etọn lẹ ṣẹnṣẹn wutu, ewọ na kú na nuṣiwa etọn.

19 “‘Ṣigba, mìwlẹ na dọmọ: “Naegbọn visunnu lọ ma hẹn agbàn nuṣiwa otọ́ etọn tọn?” To whenuena e yindọ visunnu lọ ko doafọna nuhe sọgbe po dodowiwa po, ewọ ko yìn osẹ́ndoai ṣie lẹpo bo ko sọ setonuna yé, e na nọgbẹ̀ dandan.+ 20 Alindọn he* waylando, ewọ wẹ na kú.+ Visunnu de ma na hẹn agbàn nuṣiwa otọ́ etọn tọn, podọ otọ́ de ma na hẹn agbàn nuṣiwa visunnu etọn tọn. Dodonọ wẹ na duale dodowiwa etọn tọn na ede, podọ danuwatọ lọsu wẹ na jiya kọdetọn danuwiwa etọn tọn.+

21 “‘Todin, eyin mẹylankan de lẹkọ sọn ylando he e ko wà lẹpo mẹ bo yìn osẹ́ndoai ṣie lẹ bosọ wà nuhe sọgbe po dodo po, ewọ na nọgbẹ̀ dandan. E ma na kú.+ 22 Depope to sẹ́nhẹngba etọn lẹ mẹ ma na yin hihia* dokọna ẹn.+ Ewọ na nọgbẹ̀ na dodowiwa etọn wutu.’+

23 “‘Be yẹn nọ mọ awuvivi depope to okú mẹylankan de tọn mẹ wẹ ya?’+ wẹ Oklunọ Nupojipetọ Jehovah dọ. ‘Be ojlo ṣie ma wẹ yindọ e ni diọ sọn aliho etọn lẹ mẹ bo nọgbẹ̀ ya?’+

24 “‘Ṣigba, eyin dodonọ gbẹkọ dodowiwa etọn go bo wà oylan* gbọn osùnú he mẹylankan lẹ nọ wà lẹpo wiwà dali, be ewọ na nọgbẹ̀ ya? Depope to azọ́n dodo tọn he e ko wà lẹ mẹ ma na yin finflin.+ Na nugbonọ-mayin etọn po ylando he e ko wà po wutu, e na kú.+

25 “‘Ṣigba, mìwlẹ na dọmọ: “Aliho Jehovah tọn yin mawadodo tọn.”+ Owhé Islaeli tọn E, jaale bo dotoai! Be aliho ṣie wẹ yin mawadodo tọn ya?+ Be e ma yin aliho mìwlẹ tọn wẹ yin mawadodo tọn ya?+

26 “‘Eyin dodonọ de gbẹkọ dodowiwa etọn go bo wà oylan bosọ kú na enẹ wutu, e kú na ylanwiwa etọn titi wutu.

27 “‘Podọ, eyin mẹylankan de lẹkọ sọn ylanwiwa etọn mẹ bo jẹ nuhe sọgbe bo yin dodo wà ji, ewọ na whlẹn ogbẹ̀* ede tọn.+ 28 Eyin ewọ wá doayi sẹ́nhẹngba etọn lẹpo go bo diọ, ewọ na nọgbẹ̀ dandan. E ma na kú.

29 “‘Ṣigba, owhé Islaeli tọn na dọmọ: “Aliho Jehovah tọn yin mawadodo tọn.” Owhé Islaeli tọn E, be aliho ṣie lẹ wẹ yin mawadodo tọn nugbonugbo ya?+ Be e ma yin aliho mìwlẹ tọn wẹ yin mawadodo tọn ya?’

30 “‘Enẹwutu, owhé Islaeli tọn E, yẹn na dawhẹna mẹdopodopo sọgbe hẹ aliho etọn lẹ,’+ wẹ Oklunọ Nupojipetọ Jehovah dọ. ‘Mì lẹkọ, mọwẹ, mì lẹkọ mlẹnmlẹn sọn sẹ́nhẹngba mìtọn lẹpo mẹ, na yé nikaa lẹzun zannu ahlida tọn he na hẹn whẹhuhu wá mì ji. 31 Mì gbẹ́ sẹ́nhẹngba he mì ko wà lẹpo dai,+ bo wleawuna ahun yọyọ de po ayiha yọyọ de po,*+ naegbọn mì nado kú,+ mì owhé Islaeli tọn E?’

32 “‘Yẹn ma nọ mọ awuvivi depope to okú mẹde tọn mẹ,’+ wẹ Oklunọ Nupojipetọ Jehovah dọ. ‘Enẹwutu, mì lẹkọ bo nọgbẹ̀.’”+