2 Otànnugbo lẹ

19 Ahọlu Jehoṣafati Juda tọn sọ lẹkọyi owhé* etọn titi gbè to Jelusalẹm awuyẹyẹ-afọyẹyẹ.*+ 2 Jehu+ visunnu Hanani+ numọtọ lọ tọn tọ́njẹgbonu wá pé e bo dọna Ahọlu Jehoṣafati dọmọ: “Be mẹylankan wẹ hiẹ na gọalọna ya,+ podọ be mẹhe gbẹwanna Jehovah lẹ wẹ hiẹ na yiwanna ya?+ Na ehe wutu, homẹgble Jehovah tọn tin sọta we. 3 Etomọṣo, nudagbe delẹ ko yin mimọ to hiẹ mẹ,+ na hiẹ ko de dòtin wiwe* lẹ sẹ̀ sọn aigba lọ ji bo ko wleawuna ahun towe* nado dín Jiwheyẹwhe nugbo lọ wutu.”+

4 Jehoṣafati sọ zindonukọn nado nọ nọ̀ Jelusalẹm, podọ e vọ́ tọ́njẹgbonu yì gbẹtọ lọ lẹ dè sọn Beẹli-ṣeba kaka yì lẹdo osó tọn Eflaimi tọn+ mẹ nado hẹn yé gọwá Jehovah Jiwheyẹwhe tọgbo yetọn lẹ tọn dè.+ 5 Humọ, e de whẹdatọ lẹ gbọn aigba lọ pete ji to tòdaho gángán Juda tọn lẹpo mẹ, yèdọ tòdaho dopodopo.+ 6 E sọ dọna whẹdatọ lọ lẹ dọmọ: “Mì payi nuhe wà mì te go, na e ma yin gbẹtọ wẹ zọ́n azọ́n whẹdida tọn mì, ṣigba Jehovah wẹ, podọ ewọ tin hẹ mì whenue mì to whẹda.+ 7 Todin, mì gbọ budisi Jehovah ni tin to mì ji.+ Mì to aṣeji gando nuhe wà mì te go, na mawadodo,+ mẹnukuntahihopọn+ po alọgodo-kuẹ yíyí+ po ma tin to Jehovah Jiwheyẹwhe mítọn dè.”

8 To Jelusalẹm lọsu, Jehoṣafati de Levinu po yẹwhenọ delẹ po gọna nukọntọ whédo otọ́ Islaeli tọn lẹ tọn delẹ nado wadevizọn taidi whẹdatọ do Jehovah tamẹ podọ nado nọ dọwhẹgbọ na mẹhe nọ nọ̀ Jelusalẹm lẹ.+ 9 E sọ degbena yé dọmọ: “Nuhe mì na yí budisi Jehovah, nugbonọ-yinyin po ahun pipé* de po do wà die: 10 Whedepopenu he nọvisunnu mìtọn lẹ he nọ nọ̀ tòdaho yetọn lẹ mẹ hẹn whẹho hùnsọndai tọn+ de kavi dehe gando osẹ́n de, gbedide de, aṣẹdai lẹ kavi whẹdida lẹ go wá, mì dona na yé avase, na yé nikaa lẹzun whẹhutọ to Jehovah nukọn; e ma yinmọ, homẹgble etọn na tin sọta mìwlẹ po nọvisunnu mìtọn lẹ po. Nuhe mì dona wà niyẹn, na mì nikaa hùwhẹ. 11 Amalia yẹwhenọgán lọ die, mẹhe na deanana mì na nuhe dù whẹho Jehovah tọn lẹpo.+ Zebadia visunnu Iṣmaeli tọn wẹ yin nukọntọ whédo Juda tọn na nuhe dù whẹho ahọlu tọn lẹpo. Levinu lẹ nasọ wadevizọn taidi anademẹtọ lẹ na mì. Mì yin huhlọnnọ bo yinuwa, podọ Jehovah ni tin hẹ mẹhe to nudagbe wà lẹ.”*+