Jọṣua

22 To whenẹnu, Jọṣua ylọ Leubẹninu lẹ, Gadinu lẹ po mado-awe hẹnnu Manasse tọn po 2 bo dọna yé dọmọ: “Mìwlẹ ko wà nuhe Mose devizọnwatọ Jehovah tọn degbe etọn na mì lẹpo,+ podọ mì ko setonuna ogbè ṣie to nuhe yẹn degbe etọn na mì lẹpo mẹ.+ 3 Mì ma jo mẹmẹsunnu mìtọn lẹ do sọn whenẹnu gbọ́n kakajẹ egbé;+ podọ mì ko yìn gbedide Jehovah Jiwheyẹwhe mìtọn tọn.+ 4 Todin, Jehovah Jiwheyẹwhe mìtọn ko na gbọjẹ mẹmẹsunnu mìtọn lẹ kẹdẹdile e ko dopagbe etọn na yé do.+ Enẹwutu todin, mì sọgan lẹkọyi gòhọ mìtọn lẹ mẹ to aigba mìtọn ji, ehe Mose devizọnwatọ Jehovah tọn na mì to awà awetọ* Jọdani tọn ji.+ 5 Amọ́, mì to aṣeji taun nado nọ yìn gbedide po Osẹ́n he Mose devizọnwatọ Jehovah tọn ko na mì po,+ enẹ wẹ nado nọ yiwanna Jehovah Jiwheyẹwhe mìtọn,+ bo nọ zinzọnlin to aliho etọn lẹpo ji,+ bosọ nọ yìn gbedide etọn lẹ+ bo tẹdo ewọ go+ podọ nado nọ yí ahun mìtọn lẹpo po alindọn* mìtọn lẹpo po+ do sẹ̀n ẹn.”+

6 Enẹgodo, Jọṣua dona yé bo do yé hlan, yé sọ yì gòhọ yetọn lẹ mẹ. 7 Mose ko na ogú de mado-awe hẹnnu Manasse tọn to Baṣani,+ bọ Jọṣua na ogú de mado-awe hẹnnu lọ tọn he pò lọ to pọmẹ hẹ mẹmẹsunnu yetọn lẹ to whèyihọ-waji Jọdani tọn.+ Humọ, to whenue Jọṣua do yé hlan gòhọ yetọn lẹ mẹ, e sọ dona yé 8 bo dọna yé dọmọ: “Mì lẹkọyi gòhọ mìtọn lẹ mẹ po adọkunnu susu lẹ po gọna kanlin-yìnyìn susugege lẹ, fataka po sika po, gànvẹẹ po gànyuu po, gọna awù susugege lẹ.+ Mì má ogblànnu+ kẹntọ mìtọn lẹ tọn hẹ mẹmẹsunnu mìtọn lẹ.”

9 Enẹgodo, Leubẹninu lẹ, Gadinu lẹ po mado-awe hẹnnu Manasse tọn po tọ́n sọn Islaelivi he pò lẹ dè to Ṣilo to aigba Kenani tọn ji, bo lẹkọyi aigba Giliadi tọn ji,+ yèdọ aigba yetọn titi he ji yé ko nọ nọ̀ dai dile Jehovah ko degbe gbọn Mose gblamẹ do.+ 10 To whenuena yé jẹ agbegbe Jọdani tọn lẹ ji to aigba Kenani tọn ji, Leubẹninu lẹ, Gadinu lẹ po mado-awe hẹnnu Manasse tọn po do agbà de do finẹ sẹpọ Jọdani, yèdọ agbà daho blibata de. 11 To godo mẹ, Islaelivi he pò lẹ sè ehe+ bo dọmọ: “Mì pọ́n! Leubẹninu lẹ, Gadinu lẹ po mado-awe hẹnnu Manasse tọn po ko do agbà de do dogbó aigba Kenani tọn ji to agbegbe Jọdani tọn lẹ ji to awà he yin Islaelivi lẹ tọn lọ ji.” 12 To whenue Islaelivi lẹ sè ehe, Islaelivi lẹpo pli do Ṣilo+ nado yì funawhàn hẹ yé.

13 To whenẹnu, Islaelivi lẹ do Finehasi+ visunnu Eleazali yẹwhenọ lọ tọn hlan Leubẹninu lẹ, Gadinu lẹ po mado-awe hẹnnu Manasse tọn po to aigba Giliadi tọn ji, 14 ahọvi ao sọ hodo e yì, yèdọ ahọvi dopo sọn whédo otọ́ hẹnnu Islaeli tọn lẹ tọn dopodopo mẹ, bọ dopodopo yetọn yin nukọntọ whédo otọ́ yetọn lẹ tọn to omẹ fọtọ́n* Islaeli tọn lẹ mẹ.+ 15 To whenue yé jẹ Leubẹninu lẹ, Gadinu lẹ po mado-awe hẹnnu Manasse tọn po dè to aigba Giliadi tọn ji, yé dọna yé dọmọ:

16 “Nuhe pipli omẹ Jehovah tọn lẹ tọn pete dọ die: ‘Nuyiwa nugbonọ-mayin tọn+ tẹ die he mì ko wà sọta Jiwheyẹwhe Islaeli tọn? Mìwlẹ ko lẹkọ sọn hihodo Jehovah mẹ todin gbọn agbà de dido na mìde bo ṣiatẹ sọta Jehovah dali.+ 17 Be nuhe mí ṣiwà to Peọli ma di nude na mí wẹ? Mí ma ko klọ́ mídelẹ wé sọn e mẹ kakajẹ egbé, mahopọnna dọ azọ̀nylankan de wá pipli omẹ Jehovah tọn lẹ tọn ji.+ 18 Mìwlẹ sọ jlo na lẹkọ sọn hihodo Jehovah mẹ! Eyin mì ṣiatẹ sọta Jehovah to egbé, pipli Islaeli tọn pete go wẹ ewọ na gblehomẹ do to osọ he ja.+ 19 Todin, eyin na aigba mìtọn yin mawé wutu wẹ, mì bo dasá wá aigba Jehovah tọn ji,+ fie gòhọtúntún Jehovah tọn tin te,+ bo wá nọ ṣẹnṣẹn mítọn, ṣigba mì ṣiatẹ sọta Jehovah blo, podọ mì hẹn míwlẹ nado ṣiatẹ gbọn agbà de dido na mìde gbọnvona agbà Jehovah Jiwheyẹwhe mítọn tọn dali blo.+ 20 To whenue Akani+ visunnu Zela tọn yinuwa po nugbonọ-mayin po gando nuhe dona yin vivasudo mlẹnmlẹn lọ go, be e ma yin pipli Islaeli tọn pete ji wẹ homẹgble wá ya?+ Humọ, e ma yin ewọ kẹdẹ wẹ kú na nuṣiwa etọn wutu.’”+

21 To whenẹnu, Leubẹninu lẹ, Gadinu lẹ po mado-awe hẹnnu Manasse tọn po gblọnna nukọntọ pipli omẹ fọtọ́n* Islaeli tọn lẹ+ dọmọ: 22 “Jiwheyẹwhe yẹwhe lẹ tọn, Jehovah! Jiwheyẹwhe yẹwhe lẹ tọn, Jehovah!+ Ewọ yọnẹn, podọ Islaeli lọsu na wá yọnẹn. Eyin atẹ̀ wẹ mí ṣì bo ma yin nugbonọ na Jehovah, mí ni ma yin jijodo ogbẹ̀ to egbehe blo. 23 Eyin nado lẹkọ sọn hihodo Jehovah mẹ podọ nado nọ basi avọ́nunina mimẹ̀ lẹ, avọ́nunina jinukun-lili tọn lẹ po avọ́sinsan jijọho tọn lẹ po wutu wẹ mí do dó agbà de na míde, Jehovah ni sayana mí.+ 24 Lala, nudevo wẹ to ahunmẹduna mí bọ mí do wà ehe, na mí dọ dọ, ‘To sọgodo, ovi mìtọn lẹ na dọna ovi mítọn lẹ dọmọ: “Etẹwẹ mì tindo to kọndopọ mẹ hẹ Jehovah, Jiwheyẹwhe Islaeli tọn? 25 Jehovah ko yí Jọdani do de dogbó do míwlẹ po mì po ṣẹnṣẹn, yèdọ mì Leubẹninu lẹ po Gadinu lẹ po. Mìwlẹ ma tindo nudepope to kọndopọ mẹ hẹ Jehovah.” Ovi mìtọn lẹ nasọ glọnalina ovi mítọn lẹ ma nado nọ sẹ̀n* Jehovah.’

26 “Enẹwutu wẹ mí do dọ dọ, ‘Mì gbọ mí ni tẹnpọn bo yí nude wà nado do agbà de, e ma yin na avọ́nunina mimẹ̀ kavi avọ́sinsan gba, 27 ṣigba na e nido yin kunnudenu de to míwlẹ po mì po ṣẹnṣẹn+ podọ to kúnkan* mítọn he ja lẹ ṣẹnṣẹn dọ mí na nọ yí avọ́nunina mimẹ̀ mítọn lẹ, avọ́sinsan mítọn lẹ po avọ́sinsan jijọho tọn mítọn lẹ po do basi sinsẹ̀n hlan Jehovah to nukọn etọn,+ na ovi mìtọn lẹ nikaa dọna ovi mítọn lẹ to sọgodo dọmọ: “Mìwlẹ ma tindo nudepope to kọndopọ mẹ hẹ Jehovah.”’ 28 Enẹwutu wẹ mí do dọ dọ, ‘Eyin yé wá dọ mọ na mí podọ na kúnkan* mítọn lẹ to sọgodo janwẹ, to whenẹnu mílọsu na dọna yé dọmọ: “Mì pọ́n apajlẹ agbà Jehovah tọn he tọgbo mítọn lẹ basi, e ma yin na avọ́nunina mimẹ̀ kavi avọ́sinsan gba, ṣigba na e nido yin kunnudenu de to míwlẹ po mì po ṣẹnṣẹn.”’ 29 E ma sọgan wá linlẹn mẹ na mí gbede nado ṣiatẹ sọta Jehovah bo lẹkọ sọn hihodo Jehovah mẹ+ to egbé gbọn agbà de dido dali na avọ́nunina mimẹ̀, avọ́nunina jinukun-lili tọn po avọ́sinsan po, gbọnvona agbà Jehovah Jiwheyẹwhe mítọn tọn he tin to gòhọtúntún etọn nukọn!”+

30 To whenue Finehasi yẹwhenọ lọ, ahọvi pipli lọ tọn lẹ gọna nukọntọ pipli omẹ fọtọ́n* Islaeli tọn he tin po e po lẹ sè ohó he kúnkan Leubẹni, Gad po Manasse po tọn lẹ dọ, e yọ́n to nukun yetọn mẹ.+ 31 Enẹwutu, Finehasi visunnu Eleazali yẹwhenọ lọ tọn dọna kúnkan Leubẹni, Gad po Manasse po tọn lẹ dọmọ: “To egbehe, míwlẹ yọnẹn dọ Jehovah tin to ṣẹnṣẹn mítọn, na mì ma ko yinuwa po nugbonọ-mayin po sọta Jehovah wutu. Todin, mì ko whlẹn Islaelivi lẹ sọn alọ Jehovah tọn mẹ.”

32 Enẹgodo, Finehasi visunnu Eleazali yẹwhenọ lọ tọn po ahọvi lọ lẹ po lẹkọ sọn Leubẹninu lẹ po Gadinu lẹ po dè to aigba Giliadi tọn ji yì aigba Kenani tọn ji bo dowẹn na Islaelivi he pò lẹ. 33 Linlin lọ sọ yọ́n to nukun Islaelivi lẹ tọn mẹ. To whenẹnu, Islaelivi lẹ na pipà Jiwheyẹwhe, bo masọ dọho gando yìyì nado funawhàn hẹ Leubẹninu lẹ po Gadinu lẹ po nado và aigba he ji yé nọ nọ̀ lọ sudo go ba.

34 Enẹwutu, Leubẹninu lẹ po Gadinu lẹ po do yinkọ na agbà* lọ, na “kunnudenu de wẹ e yin to ṣẹnṣẹn mítọn dọ Jehovah wẹ Jiwheyẹwhe nugbo lọ.”