2 Samuẹli

3 Awhàn he to whédo Sauli tọn po whédo Davidi tọn po ṣẹnṣẹn gbẹ́ zindonukọn; huhlọn Davidi tọn fọ́n bo to jijẹ e ji,+ bọ huhlọn whédo Sauli tọn fọ́n bo to didepo.+

2 To ojlẹ enẹ mẹ, visunnu lẹ yin jiji na Davidi to Heblọni.+ Oyín plọnji etọn tọn wẹ Amnọni,+ he Ahinoami+ he wá sọn Jezleẹli ji. 3 Visunnu etọn awetọ wẹ Kileabi, he Abigaili+ he yin asuṣiọsi Nabali Kalmẹlinu lọ tọn ji; podọ atọ̀ntọ wẹ Absalọmi,+ visunnu Maaka he yin viyọnnu Talmai+ ahọlu Gẹṣuli tọn tọn. 4 Ẹnẹtọ wẹ Adonija,+ visunnu Hagiti tọn, podọ atọ́ntọ wẹ Ṣefatia visunnu Abitali tọn. 5 Ṣidopotọ wẹ Itleami he Egla asi Davidi tọn ji. Visunnu ehelẹ wẹ yin jiji na Davidi to Heblọni.

6 Dile awhàn he to whédo Sauli tọn po whédo Davidi tọn po ṣẹnṣẹn to nukọnzindo, Abneli+ zindonukọn nado to otẹn etọn hẹn lodo to whédo Sauli tọn mẹ. 7 Sauli ko tindo asimọwhlá de dai he nọ yin Lizpa,+ yèdọ viyọnnu Aia tọn. To godo mẹ, Iṣi-boṣẹti+ dọna Abneli dọmọ: “Naegbọn hiẹ do zanhẹ asimọwhlá otọ́ ṣie tọn?”+ 8 Abneli sọ gblehomẹ sinsinyẹn na ohó he Iṣi-boṣẹti dọ lẹ wutu bo dọmọ: “Avún Juda tọn tata de wẹ a yí mi do mọ ya? Kakajẹ egbé, n’ko do owanyi nugbo hia whédo otọ́ towe Sauli tọn, gọna nọvisunnu etọn lẹ po họntọn etọn lẹ po, podọ n’ma de we jo do alọ Davidi tọn mẹ; ṣogan to egbé, a wá to bibiọ dọ ma dogbè na nuṣiwa he gando yọnnu de go. 9 Na Jiwheyẹwhe ni sayana mi sinsinyẹn, eyin yẹn, Abneli ma yinuwa hẹ Davidi kẹdẹdile Jehovah ko whlé na ẹn+ do: 10 yèdọ nado de gandudu lọ sẹ̀ sọn whédo Sauli tọn mẹ bo hẹn ofìn Davidi tọn lodo do Islaeli po Juda po ji, sọn Dani kaka yì Beẹli-ṣeba.”+ 11 Ewọ masọ penugo nado gblọn nudevo depope na Abneli ba, na e to budina ẹn wutu.+

12 To afọdopolọji, Abneli do wẹnsagun lẹ hlan Davidi dọmọ: “Mẹnu tọn wẹ aigba lọ yin?” E yidogọ dọmọ: “Basi alẹnu de hẹ mi, podọ yẹn na wà nuhe go n’pé lẹpo* nado lẹ́ omẹ Islaeli tọn lẹpo do adà towe mẹ.”+ 13 Enẹwutu, e gblọn dọmọ: “Eyọn! N’na basi alẹnu de hẹ we. Onú dopo gee he n’to bibiọ to asi we wẹ yindọ, eyin a ja dè e, plan Mikali+ viyọnnu Sauli tọn wá whẹ́, eyin e ma yinmọ, ma tlẹ haji dọ emi na mọ nukunmẹ ṣie blo.” 14 Enẹgodo, Davidi do wẹnsagun lẹ hlan Iṣi-boṣẹti,+ visunnu Sauli tọn dọmọ: “Yí asi ṣie Mikali na mi, mẹhe yẹn jo ayú tintan vijinu sunnu Filistinu 100 tọn whẹpo do dà.”+ 15 Enẹwutu, Iṣi-boṣẹti domẹhlan nado plan ẹn wá sọn asu etọn he yin Paltiẹli+ visunnu Laiṣi tọn dè. 16 Ṣigba, asu etọn hodo e bo to avivi to godo na ẹn kaka wá Bahulimi.+ To whenẹnu, Abneli dọna ẹn dọmọ: “Lẹkọ bo dedo!” Ewọ sọ lẹkọ.

17 To ojlẹ enẹ gblamẹ, Abneli dowẹn hlan mẹho Islaeli tọn lẹ dọmọ: “E ko yì ojlẹ de din bọ mìwlẹ jlo dọ Davidi ni duahọlu do mì ji. 18 Todin, mì yinuwa, na Jehovah ko dọna Davidi dọmọ: ‘Gbọn alọ Davidi devizọnwatọ ṣie+ tọn gblamẹ wẹ yẹn na whlẹn Islaeli omẹ ṣie lẹ gán sọn alọ Filistinu lẹ tọn mẹ podọ sọn alọ kẹntọ yetọn lẹpo tọn mẹ.’” 19 Enẹgodo, Abneli dọhona omẹ Bẹnjamini+ tọn lẹ. Abneli sọ gbọn nuglọ wá Davidi dè to Heblọni nado hẹn nuhe Islaeli po whédo Bẹnjamini tọn pete po ko yigbe nado wà zun yinyọnẹn na ẹn.

20 Whenue Abneli po sunnu 20 po zọ̀n wá Davidi dè to Heblọni, Davidi basi hùnwhẹ de na Abneli po sunnu he tin to e dè lẹ po. 21 To whenẹnu, Abneli dọna Davidi dọmọ: “Dike ma yì bo bẹ Islaeli pete pli do oklunọ ṣie ahọlu dè, na yé nido basi alẹnu de hẹ we, bọ hiẹ na lẹzun ahọlu do mẹhe jlo we lẹpo ji.”* Enẹwutu, Davidi do Abneli hlan bọ e dedo to jijọho mẹ.

22 To ojlẹ enẹ mẹ pẹẹ, devizọnwatọ Davidi tọn lẹ po Joabi po ko lẹkọ sọn awhànfun gbé bo hẹn ogblànnu susugege gọ̀. Abneli ma gbẹsọ pò to Davidi dè to Heblọni to whenẹnu, na Davidi ko do e hlan to jijọho mẹ. 23 Whenue Joabi+ po awhànpa he to e dè pete po wá, e yin didọna Joabi dọmọ: “Abneli+ visunnu Neli+ tọn wá ahọlu dè, ahọlu sọ do e hlan bọ e dedo to jijọho mẹ.” 24 Enẹwutu, Joabi biọ họmẹ yì ahọlu dè bo dọmọ: “Etẹ die he hiẹ ko wà? Abneli wá dè we fi. Naegbọn hiẹ do dó e hlan bọ e yì awuyẹyẹ-afọyẹyẹ? 25 Hiẹ lọsu yọ́n Abneli visunnu Neli tọn ganji! E wáfi nado klọ we wẹ, na e nido yọ́n yìyì po gigọ̀ po towe lẹpo podọ nado yọ́n nuhe wà a te lẹpo.”

26 Enẹwutu, Joabi tọ́n sọn Davidi dè bo do wẹnsagun lẹ hlan Abneli, bọ yé plan ẹn lẹkọ sọn osindò Silahi tọn kọ̀n; ṣigba Davidi ma yọ́n nudepope gando ehe go. 27 Whenue Abneli lẹkọwa Heblọni,+ Joabi plan ẹn jẹ apadopo to họngbo lọ mẹ nado dọho hẹ ẹ edeṣo. Ṣigba, e sọ́ ohí adọ̀mẹ na ẹn bọ e kú;+ e wà ehe, na ewọ ko hù* nọvisunnu etọn Asahẹli wutu.+ 28 To godo mẹ, whenue Davidi sè ehe, e dọmọ: “Yẹn po ahọluduta ṣie po yin homẹvọnọ kakadoi to Jehovah nukọn, na nuhe dù hùnhọ́+ Abneli visunnu Neli tọn. 29 E ni tin to okọ̀ na Joabi+ po whédo otọ́ etọn tọn pete po. Na sunnu he onú mawé de to sisà jẹgbonu sọn vijinu etọn mẹ,+ kavi pòtọnọ,+ kavi sunnu he nọ yí avọ̀lọnnú do wazọ́n,* kavi mẹhe jai gbọn ohí dali, kavi huvẹtọnọ de ni ma hán to whédo Joabi tọn mẹ gbede blo!”+ 30 Mọ wẹ Joabi po nọvisunnu etọn Abiṣai+ po hù Abneli+ do, na ewọ ko hù nọvisunnu yetọn Asahẹli to awhàngbenu+ to Gibeọni wutu.

31 Whenẹnu, Davidi dọna Joabi po mẹhe tin to e dè lẹpo po dọmọ: “Mì tlẹ́n awù mìtọn lẹ bo sìn odẹ́vọ̀ dogo bosọ doavihàn do Abneli ji.” Ahọlu Davidi lọsu to zọnlinzin to apotinjan lọ godo. 32 Yé dì Abneli do Heblọni; ahọlu sọ viavi daga to yọdò Abneli tọn kọ̀n, bọ gbẹtọ lọ lẹpo sọ jẹ avivi ji. 33 Ahọlu sọ jihàn do Abneli ji dọmọ:

“Be Abneli dona kú di gugutọ de wẹ?

Hiẹ kú taidi mẹhe sẹ́nhẹngbatọ* lẹ hù.”+

Enẹwutu, gbẹtọ lọ lẹpo sọ vọ́ viavi do e ji.

35 To godo mẹ, gbẹtọ lọ lẹpo wá nado na núdùdù homẹmiọnnamẹ tọn* Davidi to whenue okle gbẹ́ pò to ote, ṣigba Davidi whlé dọmọ: “Na Jiwheyẹwhe ni sayana mi sinsinyẹn eyin núdùdù kavi nudepope jẹ onù na mi whẹpo owhè nido yihọ!”+ 36 Gbẹtọ lọ lẹpo sọ doayi ehe go, bọ homẹ yetọn hùn. Kẹdẹdi nuhe ahọlu ko wà lẹpo, ehe lọsu hẹn homẹ gbẹtọ lọ lẹpo tọn hùn. 37 Gbọnmọ dali, gbẹtọ lọ lẹpo gọna Islaeli pete yọnẹn to gbenẹgbe dọ ahọlu ma mọdona okú Abneli visunnu Neli tọn.+ 38 Whenẹnu, ahọlu dọna devizọnwatọ etọn lẹ dọmọ: “Be mìwlẹ ma yọnẹn dọ ahọvi de podọ sunnu nukundeji de wẹ kú to Islaeli to egbé ya?+ 39 Awú kú mi to egbé, mahopọnna dọ n’ko yin amisisayidode di ahọlu,+ podọ sunnu ehelẹ, yèdọ visunnu Zeluia+ tọn lẹ ko ylanhùn gbau na mi.+ Na Jehovah ni suahọ ylanwatọ sọgbe hẹ ylanwiwa etọn titi.”+