2 Ahọlu lẹ

3 Jeholami+ visunnu Ahabi tọn lẹzun ahọlu do Islaeli ji to Samalia to owhe 18tọ Ahọlu Jehoṣafati Juda tọn mẹ, e sọ dugán na owhe 12. 2 E sọ to nuhe ylan to nukun Jehovah tọn mẹ lẹ wà mapote, ṣigba e ma yì jẹ obá otọ́ etọn po onọ̀ etọn po tọn mẹ, na e de dòtin wiwe zannu tọn Baali tọn he otọ́ etọn ko basi sẹ̀.+ 3 Ṣigba, e zindonukọn to ylando Jeloboami visunnu Nebati tọn he ewọ ko hẹn Islaeli nado wà lẹ mẹ.+ E ma lẹ́ sọn yé kọ̀n.

4 Todin, Meṣa ahọlu Moabi tọn yin lẹngbọyìntọ de, bọ e nọ saba bẹ lẹngbọvu 100 000 po agbò 100 000 he yè ma pà ofún na po jo na ahọlu Islaeli tọn di takuẹ. 5 Tlolo he Ahabi kú+ wẹ ahọlu Moabi tọn fọngu do ahọlu Islaeli tọn ji.+ 6 Enẹwutu, Ahọlu Jeholami tọ́n sọn Samalia to gbenẹgbe bo bẹ Islaeli pete pli. 7 E sọ dowẹn hlan Ahọlu Jehoṣafati Juda tọn dọmọ: “Ahọlu Moabi tọn ko fọngu do ji e. Hiẹ na zọnhẹ mi nado yì funawhàn hẹ Moabi ya?” Ewọ sọ gblọn dọmọ: “Yẹn na yì.+ Mẹdopolọ wẹ yẹn po hiẹ po. Mẹdopolọ sọ wẹ omẹ ṣie lẹ po omẹ towe lẹ po. Osọ́ ṣie lẹ sọ yin osọ́ towe lẹ.”+ 8 Ewọ sọ kanse dọmọ: “Aliho tẹwẹ mí na gbọn do hẹji yì?” E gblọn dọmọ: “Aliho danfafa Edomi tọn.”

9 Ahọlu Islaeli tọn sọ dedo to pọmẹ hẹ ahọlu Juda tọn po ahọlu Edomi+ tọn po. Whenue yé ko zingbejizọnlin lẹdo pé na azán ṣinawe godo, osin vọ̀ do mẹhe to osla lọ mẹ lẹ po kanlin whégbè tọn he hodo yé to godo lẹ po. 10 Ahọlu Islaeli tọn dọmọ: “Adángbòmẹ tẹ die! Jehovah ko ylọ ahọlu atọ̀n ehelẹ pli kiki nado jo yé do alọ Moabi tọn mẹ!” 11 Whenẹnu, Jehoṣafati dọmọ: “Yẹwhegán Jehovah tọn depope ma tofi he gblamẹ mí sọgan kanhose Jehovah te wẹ?”+ Enẹwutu, dopo to devizọnwatọ ahọlu Islaeli tọn lẹ mẹ gblọn dọmọ: “Eliṣa+ visunnu Ṣafati tọn he nọ do osin alọ na Elija* dai lọ tofi.”+ 12 Jehoṣafati sọ dọmọ: “Jehovah nọ dọho gbọn ewọ gblamẹ.” Enẹwutu, ahọlu Islaeli tọn po Jehoṣafati po, gọna ahọlu Edomi tọn jẹte yì e dè.

13 Eliṣa dọna ahọlu Islaeli tọn dọmọ: “Etẹwẹ yẹn tindo nado wà hẹ we?*+ Yì yẹwhegán otọ́ towe tọn lẹ po yẹwhegán onọ̀ towe tọn lẹ po dè.”+ Ṣigba, ahọlu Islaeli tọn dọna ẹn dọmọ: “Lala, na Jehovah wẹ ko ylọ ahọlu atọ̀n ehelẹ pli nado jo yé do alọ Moabi tọn mẹ.” 14 Whenẹnu wẹ Eliṣa dọmọ: “Dile Jehovah awhànpa lẹ tọn he n’nọ sẹ̀n* lọ togbẹ̀, eyin e ma yin Ahọlu Jehoṣafati+ Juda tọn wẹ, n’ma na tlẹ pọ́n we kavi na we ayidonugo.+ 15 Todin, mì ylọ ajalẹnhotọ*+ de wá na mi.” Tlolo he ajalẹnhotọ lọ jẹ núhò ji, huhlọn Jehovah tọn wá e ji.+ 16 E sọ dọmọ, “Nuhe Jehovah dọ die: ‘Mì kùn osinwhín debọdo-dego do agbàdo* ehe mẹ, 17 na nuhe Jehovah dọ die: “Mì ma na mọ bọ jẹhọn na yìn, mọ mì ma na mọ jikun; etomọṣo agbàdo ehe na gọ́ na osin+ bọ mì na nù sọn e mẹ, yèdọ mìwlẹ po kanlin-yìnyìn mìtọn lẹ po gọna kanlin mìtọn devo lẹ.”’ 18 Ṣigba, onú vlẹkẹsẹ de wẹ ehe yin to nukun Jehovah tọn mẹ,+ na ewọ nasọ jo Moabi do alọ mìtọn mẹ.+ 19 Tòdaho gángán+ po tòdaho dagbe lẹpo po wẹ mìwlẹ dona họliai, mì sọ dona sán atin dagbe lẹpo liai bo sú asisa osin tọn lẹpo bosọ yí zannu lẹ do hẹn aigba dagbe lẹpo gble.”+

20 To afọnnu, to ojlẹ he mẹ avọ́nunina jinukun-lili tọn+ nọ yin bibasi te, osin sà wá to ajiji mẹ sọn Edomi waji bọ aigba lọ pete gọ́ na osin.

21 Moabinu lẹpo sọ sè dọ ahọlu lọ lẹ ko hẹji wá nado hoavùn hẹ yé, enẹwutu yé ylọ sunnu he sọgan hẹn awhànfunnu* lẹpo pli bọ yemẹpo nọte to dogbó lọ ji. 22 Whenue yé fọ́n to afọnnu fuu, hinhọ́n owhè tọn ko to sisẹ́ to osin nukunmẹ, podọ na Moabinu lẹ he to adà awetọ ji, osin lọ bia to nukun yetọn mẹ di ohùn. 23 Yé sọ dọmọ: “Ohùn die be! Ayihaawe ma tin dọ ahọlu lọ lẹ na ko yí ohí do hù ode awetọ. Enẹwutu, Moabi E, wá yì bẹ ogblànnu!”+ 24 Whenue yé biọ osla Islaeli tọn mẹ, Islaelivi lẹ fọ́n bo jẹ Moabinu lẹ hù ji, yé sọ họ̀n sọn nukọn yetọn.+ Islaelivi lẹ sọ zindonukọn kakajẹ Moabi bo to Moabinu lẹ hù dile yé to yìyì. 25 Yé họ́ tòdaho lọ lẹ liai, podọ sunnu dopodopo dlan zannu do aigba dagbe he yé mọ to otò lọ mẹ lẹpo ji bo hẹn zannu lẹ gọ́ e mẹ; yé sú asisa osin tọn lẹpo+ bo sán atin dagbe lẹpo liai.+ To godo mẹ, adó zannu tọn Kili-halesẹti+ tọn lẹ kẹdẹ wẹ pò to ote, akòtopẹ́-yìntọ lẹ sọ lẹdo e bo họ́ ẹ liai.

26 Whenue ahọlu Moabi tọn mọdọ emi ko ṣíawhàn, e bẹ sunnu 700 he nọ hẹn ohí lẹ gọna ede nado dín ali yì ahọlu Edomi tọn dè;+ amọ́ e ma pà yé. 27 Enẹwutu, e yí visunnu plọnji etọn he na wá dugán do otẹn etọn mẹ do basi avọ́sinsan mimẹ̀+ to adó lọ ji. Homẹgble daho sọ fọ́n do Islaeli ji, bọ yé joagọ sọn e dè bo lẹkọyi aigba yetọn ji.