2 Otànnugbo lẹ

14 To godo mẹ, Abija yin hinhẹn nado mlọnai hẹ tọgbo etọn lẹ, bọ yé dì i do Tòdaho Davidi tọn mẹ;+ visunnu etọn Asa sọ lẹzun ahọlu do otẹn etọn mẹ. To azán etọn lẹ gbè, aigba lọ vò na owhe ao.

2 Asa wà nuhe yọ́n bo sọgbe to nukun Jehovah Jiwheyẹwhe etọn tọn mẹ. 3 E de agbà jonọ+ lẹ po ofi yiaga lẹ po sẹ̀ bo gbà dòtin wiwe zannu tọn lẹ hányán+ bosọ sán dòtin wiwe* lẹ liai.+ 4 Humọ, e dọna omẹ Juda tọn lẹ nado dín Jehovah Jiwheyẹwhe tọgbo yetọn lẹ tọn bo payi Osẹ́n po gbedide lọ po go. 5 Gbọnmọ dali, e de ofi yiaga lẹ po agbà nuyọnwan tọn+ lẹ po sẹ̀ sọn tòdaho Juda tọn lẹpo mẹ, bọ ahọluduta lọ zindonukọn matin tukla depope to aṣẹpipa etọn glọ. 6 E do tòdaho gángán lẹ do Juda,+ to whenuena e yindọ aigba lọ vò sọn tukla si bọ awhàn depope ma yin fùnfùn sọta ẹ to owhe ehelẹ gblamẹ, na Jehovah ko na ẹn gbọjẹ wutu.+ 7 E dọna Juda dọmọ: “Mì gbọ mí ni do tòdaho ehelẹ bo do adó lẹ lẹdo yé gọna atọ̀họ̀ lẹ,+ họngbo* lẹ po dòtin lẹ po. Na aigba lọ gbẹ́ pò to alọ mítọn mẹ, na mí ko dín Jehovah Jiwheyẹwhe mítọn. Mí ko dín, bọ ewọ ko na mí gbọjẹ lẹdo pé.” Enẹwutu, azọ́n họ̀gbigbá tọn yetọn tindo kọdetọn dagbe.+

8 Asa tindo awhànpa de he bẹ omẹ Juda tọn 300 000 hẹn he nọ hẹn awọ̀yinu daho lẹ po owhán lẹ po. Podọ awhànfuntọ huhlọnnọ 280 000 wá sọn omẹ Bẹnjamini tọn lẹ mẹ bo nọ hẹn gaglo* po ogá lẹ po.+

9 To nukọn mẹ, Zela Etiopianu lọ tọ́navùn yé po awhànpa de po he bẹ sunnu 1 000 000 po osọ́-kẹkẹ 300 po hẹn.+ Whenue e jẹ Malẹṣa,+ 10 Asa tọ́njẹgbonu nado funawhàn sọta ẹ bọ yé to yede kannukannu to Agbàdo Zefata tọn mẹ to Malẹṣa. 11 Asa sọ ylọ Jehovah Jiwheyẹwhe etọn+ bo dọmọ: “Jehovah E, e ma nọ di nude na we eyin mẹhe a to alọgọna lẹ sù kavi ma tindo huhlọn.+ Gọalọna mí, Jehovah Jiwheyẹwhe mítọn E, na hiẹ go wẹ mí ganjẹ,+ podọ oyín towe mẹ wẹ mí tọ́navùn gbẹtọgun ehe te.+ Jehovah E, hiẹ wẹ Jiwheyẹwhe mítọn. A dike gbẹtọ tata duto ji we blo.”+

12 Enẹwutu, Jehovah gbawhàn Etiopianu lẹ tọn to Asa nukọn podọ to Juda nukọn, bọ Etiopianu lẹ họ̀n.+ 13 Asa po mẹhe to e dè lọ lẹ po sọ dómọna yé kaka yì Gelali,+ Etiopianu lẹ sọ to aijẹ kaka bọ dopo tata to yé mẹ ma pò togbẹ̀, na Jehovah po awhànpa etọn po ko gídí yé. Enẹgodo, yé bẹ ogblànnu susugege sọyi. 14 Humọ, yé hù mẹhe to tòdaho he lẹdo Gelali pé lẹpo mẹ lẹ, na obu Jehovah tọn ko jẹ yé ji wutu; yé sọ bẹ ogblànnu lẹ to tòdaho lọ lẹpo mẹ, na ogblànnu susugege wẹ to yé mẹ. 15 Yé sọ tọ́navùn gòhọ kanlin-yìntọ lẹ tọn lẹ bo bẹ lẹngbọ po kanklosọ́ susugege po bosọ lẹkọyi Jelusalẹm to enẹgodo.