Ẹzla

10 Dile Ẹzla to dẹ̀ho+ bo to gbeyina ylando lẹ, bosọ to avivi bo ṣinyọ́n akọ́nnu ai to ohọ̀ Jiwheyẹwhe nugbo lọ tọn nukọn, gbẹtọgun daho de he bẹ Islaelivi sunnu, yọnnu po ovi lẹ po hẹn pli lẹdo e, na mẹlọ lẹ to avivi badabada. 2 Whenẹnu wẹ Ṣekania visunnu Jehiẹli+ tọn he yin dopo to visunnu Elami+ tọn lẹ mẹ dọna Ẹzla dọmọ: “Mí ko yinuwa po nugbonọ-mayin po sọta Jiwheyẹwhe mítọn gbọn yọnnu jonọ aigba lọ tọn lẹ didà* dali.+ Mahopọnna ehe, todido gbẹ́ tin na Islaeli. 3 Todin, mì gbọ mí ni basi alẹnu de hẹ Jiwheyẹwhe mítọn+ nado yàn asi lọ lẹpo po ovi he yé ji lẹ po, sọgbe hẹ anademẹ Jehovah tọn po anademẹ mẹhe nọ dibusi* gbedide Jiwheyẹwhe mítọn tọn lẹ tọn po.+ Mì gbọ mí ni yinuwa sọgbe hẹ Osẹ́n lọ. 4 Fọ́n, na azọngban towe wẹ whẹho ehe yin podọ míwlẹ to godona we. Yin huhlọnnọ bo yinuwa.”

5 Whenẹnu wẹ Ẹzla fọ́n bo biọ to ogán yẹwhenọ lẹ tọn lẹ, Levinu lẹ po Islaeli pete po si nado whlé dọ yé na yinuwa sọgbe hẹ nuhe ko yin didọ lọ.+ Yé sọ whlé. 6 Todin, Ẹzla fọ́n sọn ohọ̀ Jiwheyẹwhe nugbo lọ tọn nukọn bo yì abò* Jehohanani visunnu Eliaṣibi tọn mẹ. Dile ewọ tlẹ yì finẹ, e ma dùnú mọ e ma nùsin, na aluẹmẹ wẹ e tin te, na nugbonọ-mayin mẹhe lẹkọwa sọn kanlinmọgbenu lọ lẹ tọn wutu.+

7 To whenẹnu, yé basi nulila de gbọn Juda po Jelusalẹm po mẹ lẹdo pé dọ kanlinmọ dai tọn lẹpo ni pli dopọ to Jelusalẹm; 8 podọ sọgbe hẹ nudide ahọvi po mẹho lẹ po tọn, nutindo mẹdepope he ma wá to azán atọ̀n gblamẹ lẹpo tọn na yin yíyí sọn e si,* bọ e na yin yinyan dogbé sọn agun mẹhe lẹkọwa sọn kanlinmọgbenu lẹ tọn mẹ.+ 9 Enẹwutu, sunnu Juda po Bẹnjamini po tọn lẹpo pli dopọ do Jelusalẹm to azán atọ̀n gblamẹ, enẹ wẹ to azán 20tọ osun ṣinẹnẹtọ tọn gbè. Mẹlọ lẹpo wẹ sinai to awánu ohọ̀ Jiwheyẹwhe nugbo lọ tọn mẹ bo to sisọsisọ, na whẹho he to aimẹ lọ podọ na jikun sinsinyẹn lọ wutu.

10 Whenẹnu wẹ Ẹzla yẹwhenọ lọ fọ́n bo dọna yé dọmọ: “Mì ko yinuwa po nugbonọ-mayin po gbọn alọwiwle hẹ yọnnu jonọ lẹ dali,+ mì ko sọ gbọnmọ dali yidogọna whẹhuhu Islaeli tọn. 11 Todin, mì yigbe ylando mìtọn lẹ tọn to Jehovah Jiwheyẹwhe tọgbo mìtọn lẹ tọn nukọn bo wà ojlo etọn. Mì klan mìde dovo na omẹ aigba lọ tọn lẹ podọ sọn asi jonọ ehelẹ go.”+ 12 Whenẹnu wẹ agun lọ blebu yí ogbè lélé do gblọn dọmọ: “Azọngban mítọn wẹ nado wà pẹpẹ dile a dọ do. 13 Ṣigba, mẹlọ lẹ sù bọ jikun whenu sọ wẹ. E ma yọnbasi nado gbọṣi gbonu, podọ e ma yin azán dopo kavi awe poun wẹ whẹho lọ na họ̀ gba, na mí ko ṣiatẹ sinsinyẹn to whẹho ehe mẹ wutu. 14 Enẹwutu, gbọ ahọvi mítọn lẹ ni ze afọ agun lọ blebu tọn dai;+ podọ gbọ mẹhe to tòdaho mítọn lẹ mẹ bo ko dà yọnnu jonọ lẹ ni wá to ojlẹ tangan de mẹ, gọna mẹho po whẹdatọ tòdaho dopodopo tọn lẹ po, kakajẹ whenue mí na lẹ́ homẹgble sinsinyẹn Jiwheyẹwhe mítọn tọn sọn míde ji gando whẹho ehe go.”

15 Ṣigba, Jonatani visunnu Asahẹli tọn po Jazeia visunnu Tikva tọn po jẹagọdo nudide enẹ bọ Meṣulami po Ṣabetai+ po he yin Levinu lẹ nọgodona yé. 16 Ṣigba, kanlinmọ dai tọn lọ lẹ yinuwa sọgbe hẹ nudide lọ; Ẹzla yẹwhenọ lọ po nukọntọ whédo otọ́ yetọn lẹ tọn po he yin dide gbọn yinkọ dali lẹpo sọ pli dovo to azán tintan osun aotọ tọn gbè nado dindona whẹho lọ; 17 podọ to azán tintan osun tintan tọn gbè, yé ko didẹ whẹho sunnu he dà yọnnu jonọ lẹpo tọn. 18 E sọ yin ayidego dọ delẹ to visunnu yẹwhenọ lẹ tọn mẹ ko dà yọnnu jonọ lẹ:+ sọn visunnu Jeṣua+ visunnu Jehozadaki tọn lẹ mẹ po nọvisunnu etọn lẹ po, yèdọ Maaseia, Eliezẹli, Jalibi po Gedalia po. 19 Ṣigba, yé dopà* nado yàn asi yetọn lẹ, podọ na yé ko hùwhẹ wutu, yé na na agbò dopo sọn lẹngbọpa lọ mẹ na whẹhuhu yetọn.+

20 Sọn visunnu Imẹli+ tọn lẹ mẹ, yè mọ Hanani po Zebadia po; 21 podọ sọn visunnu Halimi+ tọn lẹ mẹ, Maaseia, Elija, Ṣemaia, Jehiẹli po Uzia po; 22 podọ sọn visunnu Paṣuli+ tọn lẹ mẹ, Elioenai, Maaseia, Iṣmaeli, Netanẹli, Jozabadi po Eleasa po. 23 Podọ sọn Levinu lẹ mẹ, yè mọ Jozabadi, Ṣimei, Kelaia (enẹ wẹ Kelita), Petahia, Juda po Eliezẹli po; 24 podọ sọn hànjitọ lẹ mẹ, Eliaṣibi; podọ sọn họ̀njinọtọ lẹ mẹ, Ṣalumi, Telẹmi po Uli po.

25 Podọ sọn Islaelivi lẹ mẹ, sọn visunnu Paloṣi+ tọn lẹ mẹ, yè mọ Lamia, Izia, Malkija, Mijamini, Eleazali, Malkija po Bẹnaia po; 26 podọ sọn visunnu Elami+ tọn lẹ mẹ, Matania, Zekalia, Jehiẹli,+ Abdi, Jelemọti po Elija po; 27 podọ sọn visunnu Zatu+ tọn lẹ mẹ, Elioenai, Eliaṣibi, Matania, Jelemọti, Zabadi po Aziza po; 28 podọ sọn visunnu Bebai+ tọn lẹ mẹ, Jehohanani, Hanania, Zabai po Atlai po; 29 podọ sọn visunnu Bani tọn lẹ mẹ, Meṣulami, Maluk, Adaia, Jaṣubi, Ṣeali po Jelemọti po; 30 podọ sọn visunnu Pahati-moabi+ tọn lẹ mẹ, Adna, Kẹlali, Bẹnaia, Maaseia, Matania, Bezalẹli, Binnui po Manasse po; 31 podọ sọn visunnu Halimi+ tọn lẹ mẹ, Eliezẹli, Iṣija, Malkija,+ Ṣemaia, Ṣimeoni, 32 Bẹnjamini, Maluk po Ṣemalia po; 33 sọn visunnu Haṣumi+ tọn lẹ mẹ, Matenai, Matata, Zabadi, Elifelẹti, Jelemai, Manasse po Ṣimei po; 34 sọn visunnu Bani tọn lẹ mẹ, Maadai, Amlami, Uẹli, 35 Bẹnaia, Bedeia, Kẹluhi, 36 Vania, Melemọti, Eliaṣibi, 37 Matania, Matenai po Jaasu po; 38 podọ sọn visunnu Binnui tọn lẹ mẹ, Ṣimei, 39 Ṣelemia, Natani, Adaia, 40 Maknadebai, Ṣaṣai, Ṣalai, 41 Azalẹli, Ṣelemia, Ṣemalia, 42 Ṣalumi, Amalia po Josẹfu po; 43 podọ sọn visunnu Nebo tọn lẹ mẹ, Jeiẹli, Matitia, Zabadi, Zẹbina, Jadai, Joẹli po Bẹnaia po. 44 Omẹ enẹ lẹpo wẹ ko dà yọnnu jonọ lẹ,+ yé sọ yàn asi yetọn lẹ to pọmẹ hẹ visunnu yetọn lẹ.+