2 Johanu

1 Yẹn sunnu mẹhomẹ* lọ, to wekanhlan yọnnu dide lọ po ovi etọn lẹ po, he n’yiwanna nugbonugbo, podọ e ma yin yẹn kẹdẹ, ṣigba mẹhe ko wá yọ́n nugbo lọ lẹpo ga, 2 na nugbo he gbọṣi mí mẹ bo nasọ tin hẹ mí kakadoi lọ wutu. 3 Nukundagbe majẹhẹ, lẹblanu po jijọho po sọn Jiwheyẹwhe Otọ́ dè podọ sọn Jesu Klisti Visunnu Otọ́ tọn dè na tin hẹ mí, to nugbo po owanyi po mẹ.

4 Yẹn nọ jaya tlala, na n’ko mọdọ delẹ to ovi towe lẹ mẹ to zọnlinzin to nugbo lọ mẹ,+ kẹdẹdile mí ko mọ gbedide lọ yí sọn Otọ́ lọ dè do. 5 Enẹwutu, yẹn to bibiọ to hiẹ si todin, hiẹ yọnnu e, dọ mí ni yiwanna ode awetọ. (E ma yin gbedide yọyọ de wẹ n’to kinkan hlan we gba, ṣigba dehe mí ko mọyi sọn bẹjẹeji lọ.)+ 6 Podọ nuhe owanyi zẹẹmẹdo die, dọ mí ni to zọnlinzin zọnmii sọgbe hẹ gbedide etọn lẹ.+ Ehe wẹ gbedide lọ, kẹdẹdile mìwlẹ ko sè do sọn bẹjẹeji, dọ mì ni to zọnlinzin to e mẹ zọnmii. 7 Na mẹklọtọ susu wẹ ko sọawuhia to aihọn mẹ,+ yé he ma yigbe dọ Jesu Klisti wá to agbasalan mẹ lẹ.+ Mẹklọtọ lọ po agọjẹdoklistitọ lọ po niyẹn.+

8 Mì payi mìde go, na mì nikaa hẹn sinsẹ́n azọ́n he mí ko wà lẹ tọn bu, ṣigba na mì nido sọgan mọ ale gigọ́ yí.+ 9 Mẹdepope he yinukọn zẹ̀ nuplọnmẹ Klisti tọn go bo ma gbọṣi e mẹ ma tindo Jiwheyẹwhe.+ Mẹhe gbọṣi nuplọnmẹ ehe mẹ, ewọ wẹ tindo Otọ́ lọ po Visunnu lọ po.+ 10 Eyin mẹdepope wá mì dè bo ma hẹn nuplọnmẹ ehe, mì yí i do owhé mìtọn gbè+ kavi dọnudo e blo. 11 Na mẹhe dọnudo e yin mimátọ to azọ́n ylankan etọn lẹ mẹ.

12 Dile etlẹ yindọ n’tindo nususu nado kàn hlan mì, yẹn ma jlo nado wàmọ gbọn wema po wesin po yiyizan dali gba, ṣigba n’to linlẹn nado wá mì dè podọ nado dọho hẹ mì nukun sọ nukun, na ayajẹ mìtọn nido yin to gigọ́ mẹ.

13 Ovi nọviyọnnu towe, he yin mẹdide lọ tọn lẹ yí nudọdomẹ yetọn hlan we.