1 Samuẹli

20 To whenẹnu, Davidi họnyi sọn Naiọti to Lama. Ṣigba, e wá Jonatani dè bo dọmọ: “Etẹwẹ n’wà yindo?+ Owhẹ̀ tẹwẹ n’hù, podọ ylando tẹwẹ n’wà do otọ́ towe bọ ewọ do to okú* ṣie dín?” 2 Jonatani sọ dọna ẹn dọmọ: “Gbede pọ́n!+ Hiẹ ma na kú gba. Pọ́n! Otọ́ ṣie ma nọ wà nudepope, vlavo onú daho kavi pẹvi, eyin e ma hẹn zun yinyọnẹn na mi whẹ́. Naegbọn otọ́ ṣie nado ze ehe whlá do mi? Ehe ma gán jọ.” 3 Ṣigba, Davidi whlé yinukọn dogọ bo dọmọ: “Matin ayihaawe, otọ́ towe yọnẹn dọ n’ko mọ nukundagbe towe,+ enẹwutu e na ko dọ, ‘Jonatani ni ma yọ́n ehe blo, eyin e ma yinmọ ewọ na gblehomẹ.’ Amọ́, dile Jehovah togbẹ̀ podọ dile e họnwun dọ hiẹ* togbẹ̀, afọdide dopo poun wẹ to yẹn po okú po ṣẹnṣẹn!”+

4 Whenẹnu, Jonatani dọna Davidi dọmọ: “Nudepope he a* dọ, yẹn na basi i na we.” 5 Davidi dọna Jonatani dọmọ: “Osọ he ja wẹ osun yọyọ na tọ́n,+ podọ yè to nukundo mi nado wá sinai hẹ ahọlu nado dùnú; do mi hlan, na yẹn nido yì whlá dee do danji kakajẹ azán atọ̀ntọ gbè whèjai. 6 Eyin otọ́ towe jẹdò ṣie janwẹ, whenẹnu dọna ẹn dọ, ‘Davidi vẹ̀ mi nado nagbè e, na ewọ nido yawu yì tòdaho etọn mẹ to Bẹtlẹhẹm,+ na avọ́sinsan whemẹwhemẹ tọn de to dọ́n na whẹndo etọn pete.’+ 7 Eyin ewọ gblọn dọ, ‘Enẹ yọ́n,’ be ehe zẹẹmẹdo jijọho na devizọnwatọ towe. Ṣigba, eyin e gblehomẹ, hiẹ ni bo yọnẹn dọ ewọ ko magbe nado wà nuylankan sọta mi. 8 Do owanyi nugbo hia devizọnwatọ towe,+ na hiẹ ko hẹn devizọnwatọ towe biọ alẹnu Jehovah tọn de mẹ hẹ we.+ Ṣigba, eyin owhẹ̀ ṣie wẹ ma whẹ́n,+ hiẹ lọsu ni bo hù mi. Naegbọn a nado ze mi jo na otọ́ towe?”

9 Jonatani gblọn dọmọ: “E ma sọgan wá linlẹn mẹ nado lẹn enẹ gando gowe! Eyin n’sè dọ otọ́ ṣie ko magbe nado wà nuylankan sọta we, be n’ma na dọna we ya?”+ 10 Whenẹnu, Davidi dọna Jonatani dọmọ: “Mẹnu wẹ na dọna mi eyin otọ́ towe ylangbè na we kavi lala?” 11 Jonatani dọna Davidi dọmọ: “Wá, gbọ mí ni tọ́nyi danji.” Yé omẹ awe lẹ sọ tọ́nyi danji. 12 Jonatani sọ dọna Davidi dọmọ: “Gbọ Jehovah Jiwheyẹwhe Islaeli tọn ni yin kunnudetọ dọ ojlẹ ehe nkọ mẹ to osọ he ja kavi to azán atọ̀n gbè, yẹn na yí ohó do dindona linlẹn otọ́ ṣie tọn. Eyin ewọ hùnhomẹ gando Davidi go, be yẹn ma na dowẹn hlan we nado hẹn ẹn zun yinyọnẹn na we ya? 13 Ṣigba, eyin otọ́ ṣie to linlẹn nado wà nuylankan sọta we, Jehovah ni bo sayana yẹn Jonatani sinsinyẹn eyin n’ma hẹn ẹn zun yinyọnẹn na we bo do we hlan to jijọho mẹ. Na Jehovah ni tin hẹ we,+ kẹdẹdile e ko tin hẹ otọ́ ṣie do.+ 14 Podọ be hiẹ ma na do owanyi nugbo Jehovah tọn hia mi to whenue yẹn gbẹ́ togbẹ̀ podọ to whenue yẹn na tlẹ ko kú ya?+ 15 A de owanyi nugbo towe sẹ̀ sọn whédo ṣie ji blo,+ etlẹ yin to whenue Jehovah na ko sán kẹntọ Davidi tọn lẹpo sẹ̀ sọn nukunmẹ aigba tọn ji.” 16 Enẹwutu, Jonatani basi alẹnu de hẹ owhé Davidi tọn dọ, “Jehovah na kanbiọ bo nasọ hẹn kẹntọ Davidi tọn lẹ nado dogbè.” 17 Jonatani sọ hẹn Davidi nado whlé whladopo dogọ gbọn owanyi he e tindo na ẹn dali, na ewọ yiwanna ẹn di edetiti.*+

18 Whenẹnu, Jonatani dọna ẹn dọmọ: “Osọ he ja wẹ osun yọyọ na tọ́n,+ podọ mí na jẹdò towe, na azinpo towe na to ovọ́. 19 To azán atọ̀ntọ gbè, mí na tlẹ jẹdò towe hugan, hiẹ sọ dona wá fihe a whlá dewe do to azán diẹ die* bo gbọṣi zannu lọ kọ̀n fi. 20 Yẹn nasọ de ogá do adà etọn dopo ji whla atọ̀n, taidi dọ nude wẹ n’to ogá de do nkọ. 21 Yẹn nasọ do devizọnwatọ ṣie hlan bo dọna ẹn dọ, ‘Yì dín ogába lọ lẹ.’ Eyin n’dọna devizọnwatọ lọ dọ, ‘Pọ́n! Ogába lọ lẹ tin to adà ehe ji na we, yì ṣinyan yé wá,’ be hiẹ sọgan lẹkọwa whé, na dile Jehovah togbẹ̀, enẹ zẹẹmẹdo dọ jijọho tin na we to nulẹpo mẹ bọ owù depope ma tin. 22 Ṣigba, eyin n’dọna dẹpẹ lọ dọ, ‘Pọ́n! Ogába lọ lẹ tin to nukọn towe,’ to whenẹnu họnyi, na Jehovah ko do we hlan. 23 Gando opagbe he yẹn po hiẹ po ko do lọ go,+ na Jehovah ni tin to ṣẹnṣẹn mítọn kakadoi.”+

24 Enẹwutu, Davidi whlá ede do danji. To whenue osun yọyọ lọ tọ́n, ahọlu sinai to núdùdù kọ̀n nado dùnú.+ 25 Ahọlu to aisinsin to otẹn etọn mẹ to adó pá. Jonatani pannukọn ẹn, bọ Abneli+ to aisinsin to Sauli pá, ṣigba otẹn Davidi tọn to ovọ́. 26 Sauli ma dọ nudepope to gbenẹgbe, na e dọna ede dọmọ: ‘Nude wẹ na ko jọ ehe zọ́n bọ ewọ ma yin wiwe.+ Mọwẹ, e dona ko lẹzun mawé.’ 27 Podọ to azán he bọdo osun yọyọ lọ go, yèdọ to azán awetọ gbè, otẹn Davidi tọn gbẹ́ to ovọ́. Whenẹnu, Sauli dọna Jonatani visunnu etọn dọmọ: “Naegbọn visunnu Jẹsse tọn+ ma do wá núdùdù lọ tẹnmẹ to osọ he wayi kavi to egbé?” 28 Jonatani sọ gblọnna Sauli dọmọ: “Davidi vẹ̀ mi nado nagbè e, na e nido yì Bẹtlẹhẹm.+ 29 Ewọ dọna mi dọ, ‘Jaale, nagbè mi nado yì, na mí tindo avọ́sinsan whẹndo tọn de to tòdaho lọ mẹ bọ nọvisunnu ṣie dowẹn hlan mi. Enẹwutu, eyin n’ko mọ nukundagbe towe, jaale gbọ ma yì bleun nado mọ nọvisunnu ṣie lẹ.’ Nuhewutu ewọ ma do wá tafo ahọlu tọn kọ̀n niyẹn.” 30 Whenẹnu, Sauli gblehomẹ sinsinyẹn do Jonatani go bo dọna ẹn dọmọ: “Hiẹ visunnu yọnnu atẹṣitọ tọn, a lẹndọ n’ma yọnẹn dọ hiẹ ko de nado nọ adà visunnu Jẹsse tọn mẹ, na winyan towe titi podọ na winyan onọ̀ towe tọn* wẹ ya? 31 Dile e na dẹnsọ bọ visunnu Jẹsse tọn na togbẹ̀ to aigba ji, hiẹ po ahọlu-yinyin towe po ma na yin hinhẹn lodo.+ Enẹwutu, domẹhlan todin nado yì hẹn ẹn wá na mi, na ewọ dona kú.”*+

32 Ṣigba, Jonatani dọna Sauli otọ́ etọn dọmọ: “Naegbọn ewọ nado yin hùhù?+ Etẹwẹ e wà?” 33 Whenẹnu, Sauli yìn owhán do e nado hù i,+ enẹwutu Jonatani yọnẹn dọ otọ́ emitọn ko magbe nado hù Davidi.+ 34 To afọdopolọji, Jonatani fọ́n sọn tafo lọ kọ̀n po homẹgble daho po bo ma dù nudepope to azán awetọ osun yọyọ lọ tọn gbè, na adi to dido e na Davidi tọn wutu+ podọ na otọ́ etọn titi ko dowinyan ẹn wutu.

35 To afọnnu, Jonatani tọ́nyi danji na dope etọn hẹ Davidi, bọ devizọnwatọ jọja de hodo e.+ 36 Ewọ sọ dọna devizọnwatọ etọn dọmọ: “Jaale, họ̀nwezun yì dín ogába he n’de lẹ.” Devizọnwatọ lọ bẹwezun bọ Jonatani de ogá lọ hlan nukọn etọn. 37 Whenue devizọnwatọ lọ jẹ fihe Jonatani de ogá lọ do, Jonatani dọhlan devizọnwatọ lọ dọmọ: “E ma yin ogába lọ niyẹn to nukọn towe ya?” 38 Jonatani sọ dọhlan devizọnwatọ lọ dọmọ: “Yawu! Yawu dedo! A dọngbàn blo!” Devizọnwatọ Jonatani tọn sọ yì ṣinyan ogába lọ lẹ bo lẹkọwa klunọ etọn dè. 39 Devizọnwatọ lọ ma mọnukunnujẹ nudepope mẹ gando whẹho lọ go; Jonatani po Davidi po kẹdẹ wẹ yọ́n nuhe ehe zẹẹmẹdo. 40 To whenẹnu, Jonatani bẹ adánwanu etọn lẹ jo na devizọnwatọ etọn bo dọna ẹn dọmọ: “Yì, bẹ yé yì tòdaho lọ mẹ.”

41 To whenue devizọnwatọ lọ ko yì godo, Davidi fọ́n sọn fie to yakẹ de to hùwaji. Enẹgodo, e dẹ́ do odò bo ṣinyọ́n nukunmẹ ai whla atọ̀n, yé sọ donùnùgo na yede bo viavi na ode awetọ, ṣigba Davidi wẹ viavi hugan. 42 Jonatani sọ dọna Davidi dọmọ: “Yì to jijọho mẹ, na mí omẹ awe lẹ ko whlé+ to oyín Jehovah tọn mẹ dọ, ‘Na Jehovah ni tin to ṣẹnṣẹn na yẹn po hiẹ po podọ to ṣẹnṣẹn na kúnkan* towe po kúnkan* ṣie po kakadoi.’”+

To whenẹnu, Davidi fọ́n bo dedo bọ Jonatani lẹkọyi tòdaho lọ mẹ.