1 Samuẹli

12 To godo mẹ, Samuẹli dọna Islaeli pete dọmọ: “Todin, n’ko wà* nuhe mì biọ to asi e lẹpo, podọ n’ko de ahọlu de nado dugán do mì ji.+ 2 Bẹsọn din, ahọlu he na deanana mì* die!+ Na yẹn tọn, n’ko poyọnho bosọ wú owhà, podọ visunnu ṣie lẹ tofi hẹ mì,+ yẹn ko sọ deanana mì sọn jọja whenu ṣie kakajẹ egbé.+ 3 Yẹn die. Mì dekunnu sọta mi to Jehovah nukọn podọ to mẹyiamisisadode etọn+ nukọn: Oyìnsú kavi kẹtẹkẹtẹ mẹnu tọn wẹ n’yí pọ́n?+ Kavi mẹnu wẹ n’hòdu kavi gbidikọna pọ́n? Mẹnu si wẹ n’yí alọgodo-kuẹ te pọ́n nado de nukun sẹ̀ sọn nuhe e wà ji?+ Eyin n’ko wàmọ janwẹ, yẹn na gọ̀ ẹ jo na mì.”+ 4 Yé sọ gblọn dọmọ: “Hiẹ ma hò mí dù kavi gbidikọna mí kavi kẹalọyi nudepope sọn mẹde si pọ́n.” 5 Enẹwutu, e dọna yé dọmọ: “Jehovah yin kunnudetọ sọta mì podọ mẹyiamisisadode etọn yin kunnudetọ to egbé ga dọ mì ma mọ nudepope he mẹ mì na sawhẹdokọna mi te.”* Yé sọ gblọn dọmọ: “Ewọ yin kunnudetọ.”

6 Enẹwutu, Samuẹli dọna gbẹtọ lọ lẹ dọmọ: “Jehovah, mẹhe yí Mose po Aalọn po zan bo plan tọgbo mìtọn lẹ sọn aigba Egipti tọn ji+ yin kunnudetọ. 7 Todin, mì nọte whii, na yẹn ni dawhẹna mì to Jehovah nukọn sọgbe hẹ azọ́n dodo tọn lẹpo he Jehovah ko wà na mìwlẹ po tọgbo mìtọn lẹ po.

8 “Tlolo he Jakọbu ko wá Egipti+ bọ tọgbo mìtọn lẹ jẹ awhádo ylọ Jehovah na alọgọ ji,+ Jehovah do Mose+ po Aalọn po hlan nado plan tọgbo mìtọn lẹ jẹgbonu sọn Egipti podọ nado hẹn yé wá nado nọ nọfi.+ 9 Ṣigba, yé wọn Jehovah Jiwheyẹwhe yetọn, ewọ sọ sà yé+ do alọ Sisela,+ he yin ogán awhànpa Hazọli tọn mẹ, do alọ Filistinu lẹ tọn mẹ+ podọ do alọ ahọlu Moabi tọn mẹ+ bọ omẹ ehelẹ hoavùn hẹ yé. 10 Yé sọ dawhá ylọ Jehovah na alọgọ+ bo dọ, ‘Míwlẹ ko waylando,+ na mí ko jo Jehovah do bo ko sẹ̀n Baali lẹ+ po boṣiọ Aṣitolẹti tọn lẹ po;+ todin whlẹn mí sọn alọ kẹntọ mítọn lẹ tọn mẹ, na mí nido nọ sẹ̀n we.’ 11 Whenẹnu, Jehovah do Jelubaali,+ Bedani, Jẹfta+ po Samuẹli+ po hlan bo whlẹn mì sọn alọ kẹntọ he lẹdo mì pé lẹ tọn mẹ, na mì nido nọ nọ̀ hihọ́ mẹ.+ 12 To whenue mì mọdọ Nahaṣi,+ ahọlu Amọninu lẹ tọn ko tọ́nawhàn mì, mì jẹ awhádo hlan mi ji mapote dọ, ‘Lala, míwlẹ ko magbe nado tindo ahọlu de he na dugán do mí ji!’+ mahopọnna dọ Jehovah Jiwheyẹwhe mìtọn wẹ yin Ahọlu mìtọn.+ 13 Todin, ahọlu he mì de lọ die, ehe mì biọ. Pọ́n! Jehovah ko de ahọlu he na dugán do mì ji.+ 14 Eyin mìwlẹ dibusi Jehovah+ bo nọ sẹ̀n ẹn+ bosọ nọ setonuna ogbè etọn,+ bọ mì ma nọ ṣiatẹ sọta gbedide Jehovah tọn, podọ eyin mìwlẹ po ahọlu he to gandu do mì ji po nọ hodo Jehovah Jiwheyẹwhe mìtọn, be e yọ́n. 15 Ṣigba, eyin mì ma nọ setonuna ogbè Jehovah tọn bo nọ ṣiatẹ sọta gbedide Jehovah tọn, be alọ Jehovah tọn na yinuwa jẹagọdo mìwlẹ po otọ́ mìtọn lẹ po.+ 16 Todin, mì nọte whii bo pọ́n onú daho ehe, he Jehovah na wà to nukun mìtọn mẹ. 17 Be e ma yin azán jibẹwawhé likun tọn wẹ yin egbé ya? Yẹn na dawhá ylọ Jehovah bọ ewọ na hẹn hẹviosò dọnú bosọ hẹn jikun ja; whenẹnu mìwlẹ na yọnẹn bo na mọnukunnujẹemẹ dọ nuylankan taun de wẹ mì ko wà to nukun Jehovah tọn mẹ gbọn ahọlu de bibiọ dali.”+

18 Samuẹli sọ dawhá ylọ Jehovah, bọ Jehovah hẹn hẹviosò dọnú bosọ hẹn jikun ja to gbenẹgbe, sọmọ bọ gbẹtọ lọ lẹpo dibu tlala na Jehovah podọ na Samuẹli. 19 Gbẹtọ lọ lẹpo sọ dọna Samuẹli dọmọ: “Hodẹ̀ hlan Jehovah Jiwheyẹwhe towe do devizọnwatọ towe lẹ tamẹ,+ na mí ma jlo na kú, na mí ko yí oylan devo dogọ ylando mítọn lẹpo gbọn ahọlu de bibiọ dali.”

20 Enẹwutu, Samuẹli dọna gbẹtọ lọ lẹ dọmọ: “Mì dibu blo. Nugbo wẹ dọ mì ko wà oylan ehe lẹpo. Amọ́, mì lẹkọ sọn Jehovah hihodo mẹ blo,+ mì nisọ nọ yí ahun mìtọn lẹpo do sẹ̀n Jehovah.+ 21 Mì lẹhlan onú ovọ́* lẹ hihodo kọ̀n blo,+ yèdọ nuhe ma nọ hẹn ale de wá+ bo ma sọgan whlẹnmẹ, na ovọ́* wẹ yé. 22 Na oyín daho Jehovah tọn wutu,+ ewọ ma na gbẹ́ omẹ etọn lẹ dai,+ na Jehovah lọsu wẹ magbe nado hẹn mì zun omẹ etọn lẹ.+ 23 Na yẹn tọn, e ma sọgan wá linlẹn mẹ na mi gbede nado waylando do Jehovah gbọn alọdidotena dẹ̀hiho do ota mìtọn mẹ dali, podọ yẹn na zindonukọn nado to aliho he yin dagbe bosọ sọgbe lọ plọn mì. 24 Mìwlẹ ni saa dibusi Jehovah+ bo nọ yí ahun mìtọn lẹpo do sẹ̀n ẹn po nugbonọ-yinyin po* poun, na mì pọ́n onú daho he ewọ ko wà na mì lẹ.+ 25 Ṣigba, eyin mì gbọn tasinsinyẹn dali wà nuhe ylan, mìwlẹ na yin zizasẹ,+ yèdọ mìwlẹ po ahọlu mìtọn po.”+