Jọṣua

14 Todin, nuhe Islaelivi lẹ yí taidi ogú to aigba Kenani tọn ji niyẹn, ehe Eleazali yẹwhenọ lọ, Jọṣua visunnu Nuni tọn gọna nukọntọ whédo otọ́ hẹnnu Islaeli tọn lẹ tọn na yé nado dugu etọn.+ 2 Ogú yin mimá na yé gbọn ovò dide dali,+ kẹdẹdile Jehovah ko degbe etọn gbọn Mose gblamẹ do nado na hẹnnu ṣinẹnẹ daa lọ lẹ.+ 3 Mose ko má ogú na hẹnnu awe daa diẹ lẹ to awà awetọ* Jọdani tọn ji,+ bo masọ má ogú de na Levinu lẹ to ṣẹnṣẹn yetọn.+ 4 Kúnkan Josẹfu tọn lẹ nọ yin pinpọnhlan di hẹnnu awe,+ yèdọ Manasse po Eflaimi po;+ podọ nude ma yin mimá na Levinu lẹ to aigba lọ ji, adavo tòdaho+ he mẹ yé na nọ nọ̀ lẹ gọna kanlindugbo lẹ na kanlin-yìnyìn yetọn lẹ po nutindo yetọn lẹ po.+ 5 Mọ wẹ Islaelivi lẹ má aigba lọ do, kẹdẹdile Jehovah ko degbena Mose do.

6 Enẹgodo, sunnu Juda tọn lẹ wá Jọṣua dè to Gilgali,+ bọ Kalẹbi+ visunnu Jẹfunnẹ Kenizinu lọ tọn dọna ẹn dọmọ: “Hiẹ lọsu yọ́n nuhe Jehovah dọna+ Mose, omẹ Jiwheyẹwhe nugbo lọ tọn,+ gando yẹn po hiẹ po go to Kadẹṣi-balnea+ ganji. 7 Owhe 40 wẹ yẹn tindo to whenue Mose devizọnwatọ Jehovah tọn do mi hlan sọn Kadẹṣi-balnea nado yì bẹ̀ aigba lọ pọ́n,+ podọ to whenue yẹn lẹkọ, n’dọ nuhe n’mọ lẹpo na ẹn kẹdẹdile e te do pẹpẹ.*+ 8 Dile etlẹ yindọ mẹmẹsunnu ṣie he hẹji yì hẹ mi lẹ hẹn ahun gbẹtọ lọ lẹ tọn gbàdo,* yẹn hodo Jehovah Jiwheyẹwhe ṣie po ahun lẹpo po.*+ 9 Mose whlé to gbenẹgbe dọmọ: ‘Aigba he ji afọ towe gbọn na lẹzun ogú tẹgbẹ tọn de na hiẹ po visunnu towe lẹ po, na hiẹ ko hodo Jehovah Jiwheyẹwhe ṣie po ahun lẹpo po wutu.’+ 10 Todin, Jehovah ko hẹn mi dogbẹ̀+ kẹdẹdile e ko dopagbe etọn do,+ sọn owhe 45 die gbọ́n he Jehovah dopagbe ehe na Mose to whenue Islaeli zingbejizọnlin gbọn danfafa ji;+ yẹn gbẹ́ pò tofi to egbehe bo ko tindo owhe 85. 11 Podọ yẹn gbẹ́ tindo huhlọn to egbehe taidi to azán he gbè Mose do mi hlan. Dile huhlọn ṣie te do to whenẹnu na awhàn po nudevo lẹ po, mọ wẹ e gbẹ́ te do todin. 12 Enẹwutu, na mi lẹdo osó tọn ehe, he Jehovah ko dopagbe etọn to gbenẹgbe. Dile etlẹ yindọ hiẹ sè to gbenẹgbe dọ Anakimi+ lẹ tin to finẹ bọ tòdaho gángán lẹ+ sọ tin to finẹ, ayihaawe ma tin dọ* Jehovah na tin hẹ mi,+ bọ yẹn na yàn yé sẹ̀ kẹdẹdile Jehovah ko dopagbe etọn do.”+

13 To whenẹnu, Jọṣua dona Kalẹbi visunnu Jẹfunnẹ tọn bo na ẹn Heblọni taidi ogú de.+ 14 Enẹ wẹ zọ́n bọ Heblọni do lẹzun ogú de na Kalẹbi visunnu Jẹfunnẹ Kenizinu lọ tọn kakajẹ egbehe, na e hodo Jehovah Jiwheyẹwhe Islaeli tọn po ahun lẹpo po wutu.+ 15 Kiliati-alba wẹ Heblọni nọ yin dai+ (Alba ehe wẹ dawe huhlọnnọ lọ to Anakimi lẹ ṣẹnṣẹn). Aigba lọ sọ vò sọn awhànfunfun mẹ.+