Owalọ lẹ

7 Ṣigba, yẹwhenọ daho lọ dọmọ: “Be nugbo wẹ onú ehelẹ ya?” 2 Stefani gblọn dọmọ: “Mì mẹmẹsunnu po otọ́ lẹ po emi, mì dotó. Jiwheyẹwhe gigonọ lọ sọawuhia tọgbo mítọn Ablaham to whenue e to Mẹsopotamia, whẹpo e do wá Halani,+ 3 e sọ dọna ẹn dọ: ‘Tọ́nyi sọn aigba towe ji podọ sọn hẹnnumẹ towe lẹ dè bo yì aigba he yẹn na dohia we ji.’+ 4 Whenẹnu, e tọ́nyi sọn aigba Kaldeanu lẹ tọn ji bo sawhé do Halani. Podọ to whenue otọ́ etọn kú godo,+ Jiwheyẹwhe hẹn ẹn nado sẹtẹn sọn finẹ bo wá sawhé do aigba he ji mìwlẹ to ninọ todin ehe ji.+ 5 Ṣogan, e ma na ẹn ogú depope to finẹ, lala, etlẹ yin dehe klo sọ fihe e sọgan ze afọ do; ṣigba e dopagbe nado na ẹn aigba lọ pete taidi nutindo de, podọ na kúnkan* etọn to ewọ godo,+ dile etlẹ yindọ ewọ ma ko tindo ovi de to whenẹnu. 6 Humọ, Jiwheyẹwhe dọna ẹn dọ kúnkan* etọn lẹ na wá yin jonọ to aigba he ma yin yetọn titi de ji bọ akọta lọ na hẹn yé zun afanumẹ bo na sayana yé* họ̀ owhe 400.+ 7 ‘Yẹn nasọ dawhẹna akọta enẹ he yé na yin afanumẹ na,’+ wẹ Jiwheyẹwhe dọ, ‘podọ to onú ehelẹ godo, yé na tọ́njẹgbonu bo na basi sinsẹ̀nzọn wiwe hlan mi tofi.’+

8 “E sọ basi alẹnu adàgbigbo tọn de hẹ ẹ ga,+ bọ gbọnmọ dali, e ji Isaki+ bo gboadà na ẹn to azán ṣinatọ̀ntọ gbè,+ podọ Isaki ji* Jakọbu, Jakọbu sọ ji tatọ́* whẹndo 12 lẹ tọn lẹ. 9 Tatọ́ whẹndo tọn lọ lẹ sọ whànwu Josẹfu+ bo sà ẹ do Egipti.+ Ṣigba, Jiwheyẹwhe tin hẹ ẹ,+ 10 bo whlẹn ẹn sọn nukunbibia etọn lẹpo mẹ bosọ do nukundagbe hia ẹ bo na ẹn nuyọnẹn to ahọlu Falo Egipti tọn nukọn. Ewọ sọ de e nado dugán do Egipti ji podọ do owhé etọn pete ji.+ 11 Ṣigba, huvẹ de tọ́n to Egipti blebu po Kenani po, yèdọ nukunbibia daho de; tọgbo mítọn lẹ masọ tindo núdùdù depope.+ 12 Ṣigba, Jakọbu sè dọ núdùdù* tin to Egipti bọ ewọ do tọgbo mítọn lẹ hlan whla tintan.+ 13 Whla awetọ he yé yì, Josẹfu hẹn ede zun yinyọnẹn na nọvisunnu etọn lẹ, bọ Falo wá yọ́n whẹndo Josẹfu tọn.+ 14 Enẹwutu, Josẹfu dowẹn hlan bo ylọ Jakọbu otọ́ etọn po hẹnnumẹ etọn lẹpo po sọn dọ́n,+ yèdọ yé omẹ* 75 to lẹndopọ mẹ.+ 15 Jakọbu sọ jẹte yì Egipti,+ bosọ kú to finẹ,+ podọ tọgbo mítọn lẹ lọsu ga.+ 16 Yé sọ yin zize yì Ṣekẹmi bo yin titẹ́ do yọdò he Ablaham ko yí fataka-kuẹ sọha de do họ̀ sọn visunnu Hamọli tọn lẹ si to Ṣekẹmi lọ mẹ.+

17 “Dile ojlẹ lọ to sisẹpọ na hẹndi opagbe he Jiwheyẹwhe ko lá na Ablaham tọn, akọta lọ sù bo jideji to Egipti, 18 kakajẹ whenue ahọlu devo dugán do Egipti ji, mẹhe ma yọ́n Josẹfu.+ 19 Ewọ yí ayiha gigẹdẹ zan sọta akọ̀ mítọn bo yí huhlọn do hẹn otọ́ lẹ to aliho agọ̀ mẹ nado jo viyẹyẹ yetọn lẹ do, na ovi lọ lẹ nikaa yin hinhẹn dogbẹ̀.+ 20 To ojlẹ enẹ mẹ wẹ Mose yin jiji, ewọ sọ yọnwhanpẹ tlala, etlẹ yin to nukun Jiwheyẹwhe tọn mẹ. Podọ ewọ yin nukunpedego* na osun atọ̀n to owhé otọ́ etọn tọn gbè.+ 21 Ṣigba, to whenue ewọ yin jijodo,*+ viyọnnu Falo tọn ze e bo penukundego whẹ́n taidi visunnu etọn titi.+ 22 Enẹwutu, nuyọnẹn Egipti tọn lẹpo yin pinplọn Mose. Na nugbo tọn, ewọ yin huhlọnnọ to ohó po nuyiwa po mẹ.+

23 “Todin, to whenuena e ko tindo owhe 40, e basi dide nado yì dla* mẹmẹsunnu etọn lẹ pọ́n, yèdọ ovi Islaeli tọn lẹ.+ 24 To whenue e mọ dopo to yé mẹ to yinyin titafú, e yiavùnlọna ẹn bo yiahọsu na mẹhe yè to yasana lọ gbọn Egiptinu lọ hùhù dali. 25 E lẹndọ mẹmẹsunnu etọn lẹ na mọnukunnujẹemẹ dọ Jiwheyẹwhe wẹ to whinwhlẹn yé gán gbọn alọ emitọn mẹ, ṣigba yé ma mọnukunnujẹ ehe mẹ. 26 To aihọngbè, e sọawuhia yé dile yé to avùnho, e sọ tẹnpọn nado gbò avùn na yé to jijọho mẹ bo dọmọ: ‘Mẹmẹsunnu lẹ emi, nọvi-nọvi wẹ mì. Naegbọn mì do to hùnylan do mìde go?’ 27 Ṣigba, ewọ he to hùnylan do kọmẹnu etọn go bẹ ẹ fú, bo dọ: ‘Mẹnu wẹ de we taidi ogán podọ whẹdatọ do mí ji? 28 Hiẹ ma jlo na hù mi dile hiẹ hù Egiptinu lọ do to osọ he wayi nẹ, kavi hiẹ jlo na wàmọ wẹ?’ 29 To whenue Mose sè ehe, e họnyi bo yì nọ aigba Midiani tọn ji taidi jonọ, fie e ji visunnu awe te.+

30 “To owhe 40 godo, angẹli de sọawuhia ẹ to danfafa Osó Sinai tọn ji to miyọ́n wùnkan he to jiji de tọn mẹ.+ 31 Whenue Mose mọ ehe, nuhe e mọ lọ jiawu na ẹn. Ṣigba dile e to dindọnsẹpọ nado dindona, e sè ogbè Jehovah* tọn he dọmọ: 32 ‘Yẹn wẹ Jiwheyẹwhe tọgbo towe lẹ tọn, Jiwheyẹwhe Ablaham tọn, Isaki tọn podọ Jakọbu tọn.’+ Obu jẹ Mose ji bọ e masọ tẹnpọn nado dindona yinukọn ba. 33 Jehovah* dọna ẹn dọmọ: ‘De afọpa towe lẹ sọn afọ, na aigba wiwe de ji wẹ hiẹ ṣite te. 34 Matin ayihaawe, yẹn ko mọ lehe yè to kọgbidina omẹ ṣie he to Egipti lẹ do, yẹn ko sọ sè hunwinwẹn yetọn+ podọ yẹn ko jẹte yì nado whlẹn yé. Todin, gbọ yẹn ni do we hlan Egipti.’ 35 Mose ehe dopolọ, mẹhe yé gbẹ́ dai, bo dọ: ‘Mẹnu wẹ de we taidi ogán podọ whẹdatọ?’+ wẹ Jiwheyẹwhe dohlan+ taidi ogán podọ whlẹngántọ gbọn angẹli he sọawuhia ẹ to wùnkan mẹ lọ dali. 36 Dawe ehe wẹ plan yé tọ́n+ to whenue e ko basi nujiawu* po ohia lẹ po to Egipti+ podọ to Ohù Vẹẹ mẹ+ podọ to danfafa ji na owhe 40.+

37 “Mose ehe wẹ dọna ovi Islaeli tọn lẹ dọ: ‘Jiwheyẹwhe na ze yẹwhegán he taidi yẹn nkọ de daga na mì sọn mẹmẹsunnu mìtọn lẹ mẹ.’+ 38 Omẹ ehe lọ wẹ wá tin to agun lọ ṣẹnṣẹn to danfafa ji hẹ angẹli lọ+ he dọhona ẹn+ to Osó Sinai tọn ji bọ ewọ dọhona tọgbo mítọn lẹ, ewọ sọ mọ nulila wiwe he dẹn-to-aimẹ lẹ yí nado na mí.+ 39 Tọgbo mítọn lẹ gbẹ́ nado setonuna ẹn, kakatimọ yé bẹ ẹ fú+ podọ to ahun yetọn mẹ, yé lẹkọ do Egipti,+ 40 gbọn didọna Aalọn dali dọmọ: ‘Basi yẹwhe lẹ na mí nado deanana mí. Na mí ma yọ́n nuhe na ko jọ do Mose ehe go, mẹhe plan mí tọ́n sọn aigba Egipti tọn ji.’+ 41 Enẹwutu, yé basi oyìnvu de to azán enẹlẹ gbè bo basi avọ́sinsan de hlan boṣiọ lọ bosọ jẹ ayajẹ ji to azọ́n alọ yetọn tọn lẹ mẹ.+ 42 Enẹwutu, Jiwheyẹwhe dekọ sọn yé go bo ze yé jo nado basi sinsẹ̀nzọn wiwe hlan awhànpa olọn tọn,+ kẹdẹdile e ko yin kinkandai to owe yẹwhegán lẹ tọn mẹ do dọmọ: ‘Owhé Islaeli tọn E, e ma yin yẹn wẹ mìwlẹ yí kanlin lẹ do sanvọ́ hlan bo basi avọ́sinsan lẹ hlan na owhe 40 to danfafa ji gba, kavi yẹn wẹ ya? 43 Ṣigba, gòhọ Moloki tọn+ po sunwhlẹvu yẹwhe Lefani tọn po wẹ mì kẹalọyi, yèdọ boṣiọ he mì basi nado sẹ̀n lẹ. Enẹwutu, yẹn na bẹ mì yì zẹ̀ Babilọni go.’+

44 “Tọgbo mítọn lẹ tindo gòhọ kunnudide tọn to danfafa ji, kẹdẹdile E degbe etọn do to whenue e to hodọna Mose nado basi i kẹdẹdi ohia nuhe e mọ tọn.+ 45 Podọ tọgbo mítọn lẹ dugu etọn bọ yewlẹ po Jọṣua po hẹn ẹn wá aigba akọta lọ lẹ+ he Jiwheyẹwhe yàn sọn tọgbo mítọn lẹ nukọn tọn ji.+ Finẹ wẹ e gbọṣi kakajẹ azán Davidi tọn lẹ gbè. 46 Ewọ mọ nukundagbe Jiwheyẹwhe tọn bo biọ lẹblanulọkẹyi lọ nado wleawuna fininọ de na Jiwheyẹwhe Jakọbu tọn.+ 47 Ṣigba, Sọlomọni wẹ gbá ohọ̀ de na ẹn.+ 48 Ṣogan, Gigogán lọ ma nọ nọ̀ ohọ̀ he yin bibasi po alọ po lẹ mẹ gba,+ kẹdẹdile yẹwhegán lọ dọ do dọmọ: 49 ‘Olọn wẹ ofìn ṣie,+ podọ aigba wẹ tokloafọligbe ṣie.+ Ohọ̀ nankọ wẹ mìwlẹ na gbá na mi? wẹ Jehovah* dọ. Kavi fie wẹ gbọjẹtẹn ṣie te? 50 Alọ ṣie wẹ basi onú ehe lẹpo, kavi e ma yin mọ wẹ?’+

51 “Mì tasinyẹntọ lẹ podọ mì mẹhe ma gboadà to ahun po otó mìtọn lẹ po mẹ emi, whepoponu wẹ mì nọ diọnukunsọ gbigbọ wiwe; dile tọgbo mìtọn lẹ wà do, mọ wẹ mìlọsu nọ wà do.+ 52 Detẹ to yẹwhegán lẹ mẹ wẹ tọgbo mìtọn lẹ ma dohomẹkẹn?+ Mọwẹ, yé hù mẹhe lá wiwá omẹ dodonọ lọ tọn jẹnukọn lẹ,+ yèdọ mẹdehiatọ podọ hlọnhutọ mẹhe tọn mìwlẹ lẹzun todin,+ 53 mìwlẹ mẹhe kẹalọyi Osẹ́n lọ he yin nina gbọn angẹli lẹ dali+ ṣigba bo ma payi e go.”

54 Todin, to whenue yé sè onú ehelẹ, adi do yé sinsinyẹn bọ yé jẹ adúkúnkún dù do e go ji. 55 Ṣigba ewọ, dile e gọ́ na gbigbọ wiwe, zín nukun etọn do olọn bo mọ gigo Jiwheyẹwhe tọn podọ Jesu ṣite to adusilọ Jiwheyẹwhe tọn mẹ,+ 56 ewọ sọ dọmọ: “Mì pọ́n! Yẹn mọ olọn hùndonuvo bọ Visunnu gbẹtọ tọn+ ṣite to adusilọ Jiwheyẹwhe tọn mẹ.”+ 57 Na ehe tọn wutu, yé yí ogbè lélé do dawhá bo yí alọ yetọn lẹ do sú otó yetọn bosọ dlí do e ji to pọmẹ. 58 To whenue yé ko ze e dlan gbonu tòdaho lọ tọn, yé jẹ zannu dlan do e ji.+ Kunnudetọ lọ lẹ+ sọ bẹ awugbó yetọn lẹ do afọ jọja sunnu he nọ yin Saulu tọn kọ̀n.+ 59 Dile yé to zannu dlan do Stefani, ewọ vẹvẹ dọmọ: “Oklunọ Jesu, yí gbigbọ ṣie.” 60 To whenẹnu, e jẹklo bo yí ogbè lélé do dawhá jẹgbonu dọmọ: “Jehovah,* a lẹn ylando ehe dokọna yé blo.”+ Podọ to ehe didọ godo, e damlọn to okú mẹ.