2 Otànnugbo lẹ

9 Todin, ahọsi Ṣeba+ tọn ko sè linlin gando Sọlomọni go, enẹwutu e wá Jelusalẹm nado yí kanbiọ gigẹdẹ* lẹ do tẹ́n Sọlomọni pọ́n. Omẹ susugege wẹ hodo e wá po kanklosọ́ lẹ po he bẹ amì balsami* tọn gọna sika+ po zannu akuẹgegenu tọn susugege po. E yì Sọlomọni dè bo dọ nuhe to ahun etọn mẹ lẹpo+ na ẹn. 2 Sọlomọni sọ na gblọndo kanbiọ etọn lẹpo tọn. Nudepope ma vẹawu gbau na* Sọlomọni nado basi zẹẹmẹ etọn na ẹn.

3 Whenue ahọsi Ṣeba tọn ko mọ nuyọnẹn Sọlomọni tọn,+ owhé he e gbá,+ 4 núdùdù he nọ wá tafo etọn ji,+ lehe devizọnwatọ etọn lẹ nọ sinai do, lehe núdùdù-mátọ etọn lẹ nọ wazọ́n do podọ nusisọ́ yetọn, ahànjinọtọ etọn lẹ po nusisọ́ yetọn po gọna avọ́sinsan mimẹ̀ he ewọ nọ basi whẹwhẹ to ohọ̀ Jehovah tọn mẹ lẹ,+ awuji i tlala.* 5 Enẹwutu, e dọna ahọlu dọmọ: “Nugbo wẹ linlin he n’sè to otò ṣie titi mẹ gando nuwadotana* towe lẹ po nuyọnẹn towe po go. 6 Amọ́, n’ma yí linlin lọ lẹ sè kakajẹ whenue n’wá bo yí nukun ṣie titi do mọ.+ Podọ pọ́n! N’ma tlẹ ko sè odaa nuyọnẹn daho towe tọn dai.+ A yiaga zẹ̀ nuhe n’ko sè lẹ go taun.+ 7 Ayajẹnọ wẹ omẹ towe lẹ, podọ ayajẹnọ wẹ devizọnwatọ he nọ nọte to nukọn towe to whepoponu bo nọ to nuyọnẹn towe dotó lẹ! 8 Na Jehovah Jiwheyẹwhe towe ni yin pipà, ewọ he hùnhomẹ do gowe bo ze we do ofìn etọn ji taidi ahọlu na Jehovah Jiwheyẹwhe towe. Na Jiwheyẹwhe towe yiwanna Islaeli+ bo jlo na hẹn ẹn gbọṣi aimẹ kakadoi wutu wẹ e do de we taidi ahọlu do e ji nado hẹn whẹdida po dodowiwa po ṣẹ.”

9 Whenẹnu, e na ahọlu lọ talẹnti* sika tọn 120+ po amì balsami* tọn susugege po gọna zannu akuẹgegenu tọn lẹ. Mẹde ma ko sọ hẹn amì balsami* tọn wá pọ́n bọ e sù sọ dehe ahọsi Ṣeba tọn hẹnwa na Ahọlu Sọlomọni.+

10 Humọ, devizọnwatọ Hilami tọn lẹ po devizọnwatọ Sọlomọni tọn lẹ po he hẹn sika wá sọn Ofili+ sọ hẹn atin algọmi tọn lẹ po zannu akuẹgegenu tọn lẹ po wá ga.+ 11 Ahọlu yí atin algọmi tọn lọ lẹ do basi pèkán lẹ na ohọ̀ Jehovah tọn+ podọ na owhé* ahọlu tọn,+ e sọ yí do basi ajalẹn po hànjinu okànnọ lẹ po na hànsinọ lẹ.+ Onú mọnkọ lẹ ma ko yin mimọ pọ́n to aigba Juda tọn ji.

12 Ahọlu Sọlomọni sọ na ahọsi Ṣeba tọn nuhe ahọsi lọ jlo bo biọ lẹpo, hugan* nuhe ewọ lọsu ko na ahọlu lẹ. Enẹgodo, ahọsi lọ dedo bo lẹkọyi aigba etọn titi ji to pọmẹ hẹ devizọnwatọ etọn lẹ.+

13 Zínpinpẹn sika he nọ biọ whégbè na Sọlomọni to whemẹwhemẹ tọn yì talẹnti sika tọn 666, + 14 mahia dehe ajọwatọ lẹ, ajọtọ lẹ, ahọlu Alabianu lẹ tọn lẹpo po ayimatẹn-gán aigba lọ tọn lẹ po nọ hẹnwa, yèdọ yé mẹhe nọ hẹn sika po fataka po wá na Sọlomọni.+

15 Ahọlu Sọlomọni sọ yí sika flusọ́ do basi awọ̀yinu daho 200+ (sika flusọ́ ṣekẹli* 600 wẹ yin yiyizan na awọ̀yinu dopodopo)+ 16 gọna gaglo* 300 he yè yí sika flusọ́ do basi (sika mina* atọ̀n wẹ yin yiyizan na gaglo dopodopo). Enẹgodo, ahọlu bẹ yé do Ohọ̀ Zungbo Lẹbanọni tọn+ lọ mẹ.

17 Ahọlu sọ yí ajinnakú-dú do basi ofìn daho de bo và sika akú na ẹn.+ 18 Pèkán debọdo-dego ṣidopo wẹ yì ofìn lọ kọ̀n, tokloafọligbe he yè yí sika do basi de sọ to ofìn lọ go, bọ aisintẹn lọ tindo awà awe, kinnikinni awe+ sọ to ote to awà lọ lẹ pá. 19 Humọ, kinnikinni 12+ to ote to pèkán ṣidopo lọ lẹ ji, yèdọ dopo to tónu dopodopo pèkán ṣidopo lọ lẹ tọn. Ahọluduta devo depope ma ko basi ehe nkọ pọ́n. 20 Sinnu-gbán Ahọlu Sọlomọni tọn lẹpo wẹ yè yí sika do basi, podọ núzinzan Ohọ̀ Zungbo Lẹbanọni tọn lọ tọn lẹpo wẹ yè yí sika akú do basi. Yè ma yí fataka do basi nudepope, na fataka ma nọ yin pinpọnhlan di nujọnu to azán Sọlomọni tọn lẹ gbè.+ 21 Na tọjihun ahọlu tọn lẹ nọ yì Talṣiṣi+ po devizọnwatọ Hilami tọn lẹ+ po. Whladopo to owhe atọ̀n mẹ, tọjihun Talṣiṣi tọn lẹ nọ doagban sika, fataka po ajinnakú-dú+ po tọn wá, gọna ozín lẹ po ahlínhán lẹ po.

22 Gbọnmọ dali, Ahọlu Sọlomọni hugan ahọlu he to aigba ji lẹpo to adọkun po nuyọnẹn po mẹ taun.+ 23 Ahọlu he to aigba ji lẹpo wẹ nọ dín nado wá Sọlomọni nukọn* nado dotó nuyọnẹn he Jiwheyẹwhe nugbo lọ zedo ahun etọn mẹ.+ 24 Dopodopo yetọn nọ hẹn nunina de wá—yèdọ núzinzan fataka tọn lẹ, núzinzan sika tọn lẹ, awù lẹ,+ gbaja, amì balsami* tọn, osọ́ lẹ po otlò* lẹ po—podọ mọ wẹ e nọ yindo to whemẹwhemẹ. 25 Sọlomọni sọ tindo apó 4 000 na osọ́ po osọ́-kẹkẹ etọn lẹ po gọna osọ́* 12 000,+ e sọ bẹ yé do tòdaho osọ́-kẹkẹ lẹ tọn mẹ sẹpọ fie ahọlu te to Jelusalẹm.+ 26 E sọ dugán do ahọlu lẹpo ji sọn Tọ̀sisa* lọ kọ̀n yì aigba Filistinu lẹ tọn ji podọ jẹ dogbó Egipti tọn kọ̀n.+ 27 Ahọlu hẹn fataka sù tlala to Jelusalẹm taidi zannu, bọ atin kedali tọn sù tlala taidi atin sikomoli tọn to Ṣefela.+ 28 Osọ́ lẹ sọ nọ yin hinhẹnwa na Sọlomọni sọn Egipti+ podọ sọn aigba he pò lẹpo ji.

29 Na nuhe dù otàn Sọlomọni tọn he pò,+ sọn bẹjẹeji kakajẹ vivọnu, be e ma yin kinkan do kandai Natani+ yẹwhegán lọ tọn, dọdai Ahija+ Ṣilonu lọ tọn podọ kandai numimọ lẹ tọn Ido+ numọtọ lọ tọn he gando Jeloboami+ visunnu Nebati tọn go mẹ ya? 30 Sọlomọni dugán do Islaeli pete ji to Jelusalẹm na owhe 40. 31 Enẹgodo, Sọlomọni yin hinhẹn nado mlọnai hẹ tọgbo etọn lẹ. Yé sọ dì i do Tòdaho Davidi otọ́ etọn tọn mẹ;+ visunnu etọn Lehoboami sọ lẹzun ahọlu do otẹn etọn mẹ.+