1 Tẹsalonikanu lẹ

4 To popolẹpo mẹ, mẹmẹsunnu lẹ emi, kẹdẹdile mí ko na mì anademẹ gando lehe mì dona nọ zinzọnlin nado hẹn homẹ Jiwheyẹwhe tọn hùn do go,+ dile mì to zọnlinzin do na nugbo tọn, todin mí to bibiọ to mì si bo to mì vẹ̀ to oyín Oklunọ Jesu tọn mẹ nado zindonukọn nado to ehe wà to gigọ́ mẹ dogọ. 2 Na mìwlẹ yọ́n anademẹ* he mí na mì gbọn Oklunọ Jesu gblamẹ lẹ.

3 Na ehe wẹ ojlo Jiwheyẹwhe tọn, dọ mì ni yin wiwe+ bo nọla na fẹnnuwiwa zanhẹmẹ tọn.*+ 4 Dopodopo mìtọn ni yọ́n lehe e na nọ deanana agbasa* etọn titi+ do to wiwe-yinyin+ po gbégbò po mẹ, 5 e ma yin to nukunkẹn po ojlo zogbe zanhẹmẹ tọn+ po mẹ, taidi dehe akọta he ma yọ́n Jiwheyẹwhe lẹ tindo nkọ.+ 6 Mẹdepope ma dona zẹ̀ dogbó walọ dagbe tọn go bo tafu mẹmẹsunnu etọn to whẹho ehe mẹ, na Jehovah* nọ sayanamẹ na onú ehe lẹpo, kẹdẹdile mí ko dọna mì wayi bo ko sọ na mì avase sinsinyẹn gandego do. 7 Na Jiwheyẹwhe ylọ mí, e ma yin do mawé kọ̀n, ṣigba do wiwe-yinyin kọ̀n.+ 8 To whelọnu lo, mẹhe yí nukunpẹvi do pọ́n ehe ma to nukunpẹvi yí do pọ́n gbẹtọ gba, ṣigba Jiwheyẹwhe,+ yèdọ mẹhe na mì gbigbọ wiwe etọn.+

9 Ṣigba, na nuhe dù owanyi mẹmẹsunnu tọn,+ nuhudo ma tin dọ mí ni kanwehlan mì, na mìlọsu lẹ ko yin pinplọn gbọn Jiwheyẹwhe dali nado nọ yiwanna ode awetọ.+ 10 Na nugbo tọn, mì to mọwà hlan mẹmẹsunnu lẹpo he tin to Makedonia pete. Ṣigba, mẹmẹsunnu lẹ emi, mí to tudohomẹna mì, nado nọ to mọwà to gigọ́ mẹ dogọ. 11 Mì hẹn ẹn zun yanwle mìtọn nado nọ zan gbẹzan abọẹ-abọẹ+ podọ ma nado nọ dádo whẹho+ mẹdevo lẹ tọn mẹ bo nọ yí alọ mìtọn lẹ do wazọ́n,+ kẹdẹdile mí ko na mì anademẹ etọn do, 12 na mì nido sọgan zinzọnlin jijlọ to nukun mẹhe to gbonu lẹ tọn+ mẹ bo ma gbọagba nudepope tọn.

13 Humọ, mẹmẹsunnu lẹ emi, mí ma jlo dọ mì ni tin to wunvi* mẹ gando mẹhe to amlọndọ to okú mẹ lẹ go gba,+ na mìwlẹ nikaa blawu dile mẹhe pò bo ma tindo todido lẹ nọ wà do.+ 14 Na eyin mí yise dọ Jesu kú bosọ fọ́n, mọdopolọ ga,+ Jiwheyẹwhe na hẹn mẹhe ko damlọn to okú mẹ to kọndopọ mẹ hẹ Jesu lẹ wá ogbẹ̀, na yé nido sọgan nọ po e po.+ 15 Na ehe wẹ nuhe mí dọna mì sọgbe hẹ ohó Jehovah* tọn, dọ mẹhe na pò to ogbẹ̀ to mí mẹ to tintin tofi Oklunọ tọn whenu lẹ ma na jẹnukọn to aliho depope mẹ na mẹhe ko damlọn to okú mẹ lẹ; 16 na Oklunọ lọsu na jẹte sọn olọn mẹ po awhá gbedide tọn de po, po ogbè angẹligán+ tọn de po gọna opẹ̀n Jiwheyẹwhe tọn, bọ mẹhe ko kú to kọndopọ mẹ hẹ Klisti lẹ na fọ́n jẹnukọn.+ 17 Enẹgodo, mẹhe pò to ogbẹ̀ to mí mẹ lẹ na yin zize sọyi aslọ mẹ,+ to pọmẹ hẹ yé, nado pé Oklunọ+ to jẹhọn mẹ; podọ gbọnmọ dali, mí na tin po Oklunọ po to whepoponu.+ 18 Enẹwutu, mì nọ yí ohó ehelẹ do to homẹmiọnna ode awetọ zọnmii.