Matiu

25 “Humọ, Ahọluduta olọn tọn sọgan yin yiyijlẹdo awhli* ao go he ze miyọ́ngbán yetọn lẹ+ bo tọ́nyi nado pé asisunọ yọyọ.+ 2 Atọ́n to yé mẹ yin nulunọ, bọ atọ́n yin nuyọnẹntọ.*+ 3 Na nuhe dù nulunọ lọ lẹ, yé ze miyọ́ngbán yetọn lẹ ṣigba bo ma hẹn amì dovo, 4 amọ́ nuyọnẹntọ lọ lẹ hẹn miyọ́ngbán yetọn lẹ, bosọ hẹn amì do ogo mẹ dogọ. 5 Dile asisunọ yọyọ lọ to dindẹn, yemẹpo samlọngọ bo damlọn. 6 To whenue e jẹ zánhomẹ pete, awhá de di dọmọ: ‘Asisunọ yọyọ lọ die! Mì tọ́n wá pé e.’ 7 To whenẹnu, awhli lọ lẹpo fọ́n bo wleawuna miyọ́ngbán yetọn lẹ.+ 8 Nulunọ lọ lẹ dọna nuyọnẹntọ lọ lẹ dọ, ‘Mì na mí amì mìtọn pẹẹde, na miyọ́ngbán mítọn lẹ to ṣíṣí.’ 9 Nuyọnẹntọ lọ lẹ gblọnna yé dọmọ: ‘Vlavo e sọgan nọma pé na míwlẹ po mì po. Enẹwutu, mì gbọ bo yì mẹhe nọ sà lẹ dè bo jẹ mìtọn.’ 10 Dile yé tọ́n jei jijẹ gbé, asisunọ yọyọ lọ wá. Awhli he ko wleawufo lọ lẹ biọ họmẹ hẹ ẹ yì hùnwhẹ alọwle tọn lọ,+ ohọ̀n lọ sọ yin súsú. 11 Enẹgodo, awhli he pò lẹ lọsu wá, bo to didọmọ, ‘Mẹdaho, Mẹdaho, hùnhọ̀n na mí!’+ 12 E gblọnna yé dọ, ‘Nugbo wẹ yẹn dọna mì dọ, yẹn ma yọ́n mì.’

13 “Enẹwutu, mì gbọṣi nukle,+ na mì ma yọ́n azán kavi gànmẹ lọ gba.+

14 “Na e tin taidi dawe de, he jlo na tọ́nwhẹ̀n yì tògodo bo ylọ afanumẹ etọn lẹ pli bosọ ze nutindo etọn lẹ do alọmẹ na yé.+ 15 E yí talẹnti* atọ́n na omẹ tintan, bo yí awe na omẹ awetọ, bosọ yí dopo na omẹ atọ̀ntọ, yèdọ mẹdopodopo sọgbe hẹ nugopipe etọn, bosọ yì tògodo. 16 Mẹhe mọ talẹnti atọ́n yí lọ tọ́nyi to afọdopolọji bo yí yé do wàjọ bosọ duale talẹnti atọ́n tọn dogọ. 17 Mọdopolọ, mẹhe mọ awe yí lọ lọsu duale awe tọn dogọ. 18 Ṣigba, afanumẹ he mọ dopo gee yí lọ tọ́nyi bo kùndò bosọ whlá akuẹ* klunọ etọn tọn do e mẹ.

19 “To ojlẹ dindẹn de godo, klunọ afanumẹ lọ lẹ tọn wá bo biọ to yé si nado basi lẹnjo na ẹn.+ 20 To whenẹnu, mẹhe mọ talẹnti atọ́n yí lọ wá bo hẹn talẹnti atọ́n wá dogọ, bo dọmọ, ‘Klunọ, talẹnti atọ́n wẹ hiẹ zedo alọmẹ na mi; pọ́n, yẹn duale talẹnti atọ́n tọn dogọ.’+ 21 Klunọ etọn dọna ẹn dọmọ: ‘A basi do ganji, hiẹ afanumẹ dagbe podọ nugbonọ! Hiẹ ko yin nugbonọ do onú pẹvi de ji. Yẹn na de we do nususu ji.+ Biọ ayajẹ klunọ towe tọn mẹ.’+ 22 Enẹgodo, mẹhe mọ talẹnti awe yí lọ wá bo dọmọ, ‘Klunọ, talẹnti awe wẹ hiẹ zedo alọmẹ na mi; pọ́n, yẹn duale talẹnti awe tọn dogọ.’+ 23 Klunọ etọn dọna ẹn dọmọ: ‘A basi do ganji, hiẹ afanumẹ dagbe podọ nugbonọ! Hiẹ ko yin nugbonọ do onú pẹvi de ji. Yẹn na de we do nususu ji. Biọ ayajẹ klunọ towe tọn mẹ.’

24 “To godo mẹ, afanumẹ he mọ talẹnti dopo yí lọ wá bo dọmọ: ‘Klunọ, yẹn yọnẹn dọ gbẹtọ sinsinyẹn de wẹ hiẹ, bo nọ gbẹ̀n to fie hiẹ ma do dó bosọ nọ bẹpli to fie hiẹ ma fú te.+ 25 Enẹ wẹ zọ́n bọ yẹn dibu bo tọ́nyi bosọ whlá talẹnti towe do okọ́ glọ. Onú towe die.’ 26 Klunọ etọn gblọnna ẹn dọmọ: ‘Hiẹ afanumẹ ylankan podọ adidọnọ, a yọnẹn domọ, dọ yẹn nọ gbẹ̀n to fie yẹn ma do dó bosọ nọ bẹpli to fie yẹn ma fú te, kavi e ma yin mọ wẹ? 27 Eyọn, to whelọnu lo, hiẹ dona ko ze akuẹ* ṣie do akuẹsẹdotẹn, bọ whenuena yẹn wá, yẹn na ko gọ̀ ẹ mọyi po akuẹvi po.

28 “‘Enẹwutu, mì yí talẹnti lọ sọn e si bo yí i na mẹhe tindo talẹnti ao lọ.+ 29 Na mẹdepope he tindo, e na yin nina ẹn dogọ bọ e na tindo susugege. Ṣigba, na mẹhe ma tindo, yèdọ nuhe e tlẹ tindo lọsu na yin yíyí sọn e si.+ 30 Todin, mì dlan afanumẹ nuvọ́nọ lọ do zinvlu mẹ to gbonu. Finẹ wẹ e na viavi bo dù adúkúnkún te.’

31 “To whenuena Visunnu gbẹtọ tọn+ na wá to gigo etọn mẹ po angẹli lẹpo po,+ to whenẹnu wẹ e na sinai to ofìn gigonọ etọn ji. 32 Akọta lẹpo nasọ yin bibẹpli do nukọn etọn, bọ e na klan gbẹtọ lẹ dovo, yèdọ ode sọn awetọ go, kẹdẹdile lẹngbọhọtọ de nọ klan lẹngbọ lẹ sọn gbọgbọẹ lẹ go do. 33 E nasọ bẹ lẹngbọ lẹ+ do adusilọ etọn mẹ, ṣigba gbọgbọẹ lẹ do amiyọn etọn mẹ.+

34 “To whenẹnu, Ahọlu lọ na dọna mẹhe to adusi etọn mẹ lẹ dọmọ: ‘Mì wá, mì mẹhe Otọ́ ṣie ko dona lẹ, mì dugu Ahọluduta lọ tọn he ko yin awú etọn wle dai na mì sọn whenue aihọn ko yin didoai. 35 Na huvẹ hù mi bọ mì na mi nude nado dù; nugbla hù mi bọ mì na mi nude nado nù. Yẹn yin jonọ bọ mì yí mi po gbigbọ johẹmẹ tọn po;+ 36 yẹn to omẹ́* bọ mì ṣinyọnavọ̀na mi.+ Yẹn jẹazọ̀n bọ mì penukundo go e. Yẹn to gànpamẹ bọ mì wá dla mi pọ́n.’+ 37 To whenẹnu wẹ dodonọ lẹ na gblọnna ẹn dọmọ: ‘Oklunọ, whetẹnu wẹ míwlẹ mọ we to huvẹ bo na núdùdù we, kavi bọ nugbla hù we, bo na nude we nado nù?+ 38 Whetẹnu wẹ mí mọ bọ a yin jonọ bo yí we po gbigbọ johẹmẹ tọn po, kavi bọ hiẹ to omẹ́ bo ṣinyọnavọ̀na we? 39 Whetẹnu wẹ mí mọ bọ a to azọ̀njẹ kavi to gànpamẹ bo wá dla we pọ́n?’ 40 Ahọlu lọ na gblọnna yé dọmọ, ‘Nugbo wẹ yẹn dọna mì dọ, dile mìwlẹ ko basi i na dopo to mẹhe whè hugan to mẹmẹsunnu ṣie ehelẹ mẹ, yẹn wẹ mì basi i na.’+

41 “Enẹgodo, e na dọna mẹhe to amiyọn etọn mẹ lẹ dọmọ: ‘Mì tọ́n sọn dè e,+ mì mẹhe ko yin dẹ̀hodo lẹ, mì yì miyọ́n madopodo+ he ko yin awú etọn wle dai na Lẹgba po angẹli etọn lẹ po mẹ.+ 42 Na huvẹ hù mi, ṣigba mì ma na mi nude nado dù; podọ nugbla hù mi, ṣigba mì ma na mi nude nado nù. 43 Yẹn yin jonọ, ṣigba mì ma yí mi po gbigbọ johẹmẹ tọn po; yẹn to omẹ́, ṣigba mì ma ṣinyọnavọ̀na mi; yẹn jẹazọ̀n podọ yẹn to gànpamẹ, ṣigba mì ma penukundo go e.’ 44 To whenẹnu, yelọsu na gblọn dọmọ: ‘Oklunọ, whetẹnu wẹ míwlẹ mọ we to huvẹ kavi bọ nugbla hù we kavi yin jonọ kavi to omẹ́ kavi jẹazọ̀n kavi to gànpamẹ bo ma yilizọn na we?’ 45 Whenẹnu wẹ e na gblọnna yé dọmọ, ‘Nugbo wẹ yẹn dọna mì dọ, dile mìwlẹ ma ko basi i na dopo to mẹhe whè hugan to omẹ ehelẹ mẹ, yẹn wẹ mì ma basi i na.’+ 46 Omẹ ehelẹ nasọ yin sinsánsẹ* kakadoi,+ ṣigba dodonọ lẹ na nọgbẹ̀ kakadoi.”+