Owalọ lẹ

14 Todin, to Ikonioni, yé biọ sinagọgu Ju lẹ tọn mẹ dopọ bo dọho to aliho dagbe mẹ sọmọ bọ gbẹtọgun daho de he bẹ Ju lẹ po Glẹkinu lẹ po hẹn lẹzun yisenọ. 2 Ṣigba, Ju he ma yise lẹ fọnadán bo yinuwado omẹ* akọta lẹ tọn ji to aliho agọ̀ mẹ sọta mẹmẹsunnu lẹ.+ 3 Enẹwutu, yé nọ finẹ na ojlẹ de bo yí adọgbigbo do to hodọ gbọn huhlọn Jehovah* tọn dali, yèdọ mẹhe dekunnu gando ohó nukundagbe majẹhẹ tọn etọn go gbọn dotẹnmẹ nina yé nado basi ohia po nujiawu* lẹ po dali.+ 4 Ṣigba, susugege mẹhe to tòdaho lọ mẹ lẹ tọn klan; mẹdelẹ kọnawudopọ hẹ Ju lẹ ṣigba mẹdevo lẹ hẹ apọsteli lẹ. 5 To whenue omẹ akọta lẹ tọn po Ju lẹ po gọna ogán yetọn lẹ tẹnpọn nado yinuwa po kanyinylan po hẹ yé podọ nado dlan zannu do yé,+ 6 yé sè ehe bo họnyi tòdaho Likaonia tọn lẹ mẹ, yèdọ Listla po Delbe po gọna otò he lẹdo yé pé mẹ.+ 7 Yé sọ zindonukọn nado to wẹndagbe lọ lá to finẹ.

8 Todin, to Listla, dawe de tin to aisinsin to finẹ he afọ etọn lẹ kúsẹ́. Ewọ yin sẹkunọ sọn jiji whenu bo ma zinzọnlin pọ́n. 9 Dawe ehe to todoaina Paulu dile ewọ to hodọ. To whenue Paulu pọ́n ẹn tlintlin bo mọdọ e tindo yise he na hẹn ẹn jẹgangan,+ 10 e dọ po ogbè lélé po dọmọ: “Fọnṣite to afọ towe lẹ ji.” Dawe lọ sọ lọ́n ṣite bo jẹ zọnlinzin ji.+ 11 To whenue gbẹtọgun lọ lẹ mọ nuhe Paulu ko wà, yé dawhá bo to didọ to ogbè Likaonia tọn mẹ dọmọ: “Yẹwhe lẹ ko lẹzun gbẹtọ lẹ bo ko jẹte wá mí dè!”+ 12 Yé sọ jẹ Balnaba ylọdọ Zeus* ji, ṣigba Paulu dọ Helme,* na ewọ wẹ yin nukọntọ to hodidọ mẹ. 13 Podọ yẹwhenọ Zeus tọn, mẹhe tẹmpli etọn tin to họngbo tòdaho lọ tọn ji, hẹn oyìnsú lẹ po vounvoun* linlọ̀n lẹ po wá họngbo lọ lẹ ji bo jlo na basi avọ́sinsan lẹ hẹ gbẹtọgun lọ lẹ.

14 Ṣigba, to whenue apọsteli Balnaba po Paulu po sè ehe, yé tlẹ́n awù yetọn lẹ bo lọ́n biọ gbẹtọgun lọ ṣẹnṣẹn bosọ dawhá dọmọ: 15 “Mì gbẹtọ lẹ emi, naegbọn mì do to onú ehelẹ wà? Gbẹtọ wẹ mílọsu lẹ yin ga, bo tindo awugbopo lẹ taidi mìlọsu.+ Mí sọ to wẹndagbe lọ lá na mì, na mìwlẹ nido lẹ́ sọn onú ovọ́ ehelẹ kọ̀n do Jiwheyẹwhe ogbẹ̀nọ he dá olọn, aigba, ohù po nuhe tin to yé mẹ lẹpo po dè.+ 16 To whẹndo he wayi lẹ mẹ, ewọ na dotẹnmẹ akọta lẹpo nado to nuhe jlo yé lẹ wà,+ 17 dile etlẹ yindọ e wleawuna kunnudenu de+ gbọn nudagbe he e wà lẹ gblamẹ, bo nọ na mì jikun sọn olọn podọ ojlẹ sinsẹ́n susugege lẹ tọn+ bosọ nọ yí núdùdù do pekọna mì bo nọ yí ayajẹ do gọ́ ahun mìtọn.”+ 18 Ṣogan, mahopọnna onú ehelẹ didọ, po awusinyẹn po wẹ yé glọnalina gbẹtọgun lọ lẹ ma nado sanvọ́ hlan yé.

19 Ṣigba, Ju lẹ wá sọn Antioku po Ikonioni po bo diọlinlẹnna gbẹtọgun lọ lẹ,+ yé sọ dlan zannu do Paulu bosọ dọ̀n ẹn dlan gbonu tòdaho lọ tọn, bo lẹndọ e ko kú.+ 20 Ṣigba, to whenue devi lẹ lẹdo e pé, e fọnṣite bo biọ tòdaho lọ mẹ. To aihọngbè, ewọ po Balnaba po yì Delbe.+ 21 Whenue yé ko lá wẹndagbe lọ na tòdaho enẹ bo ko hẹn omẹ sọha delẹ zun devi godo, yé lẹkọyi Listla, Ikonioni po Antioku po. 22 Yé sọ hẹn devi lẹ* lodo+ to finẹ bo na tuli yé nado gbọṣi yise mẹ bosọ dọmọ: “Mí dona gbọn nukunbibia susu mẹ biọ Ahọluduta Jiwheyẹwhe tọn mẹ.”+ 23 Humọ, yé de mẹho lẹ na yé to agun dopodopo mẹ,+ bo to dẹ̀ho bosọ to nùbla,+ podọ yé ze yé do alọmẹ na Jehovah,* mẹhe mẹ yé yise te.

24 Enẹgodo, yé jugbọn Pisidia bo wá Pamfilia,+ 25 podọ to whenue yé ko lá ohó lọ to Pẹlga godo, yé yì Attalia. 26 Sọn finẹ, yé súnhún yì Antioku, fihe yè ko ze yé do alọ nukundagbe majẹhẹ Jiwheyẹwhe tọn mẹ te na azọ́n he yé ko wadotana todin lọ.+

27 To whenue yé ko wá Antioku bo ko bẹ agun lọ pli dopọ, yé dọ nususu he Jiwheyẹwhe ko wà gbọn yé gblamẹ lẹ gọna lehe ewọ ko hùn ohọ̀n yise tọn na akọta lẹ do.+ 28 Enẹwutu, yé nọ devi lẹ dè na ojlẹ de.