1 Ahọlu lẹ

15 To owhe 18tọ Ahọlu Jeloboami+ visunnu Nebati tọn mẹ, Abijami lẹzun ahọlu Juda tọn.+ 2 E dugán to Jelusalẹm na owhe atọ̀n. Oyín onọ̀ etọn tọn wẹ Maaka,+ yèdọ ovivi Abiṣalọmi tọn. 3 E zindonukọn to ylando dopolọ he otọ́ etọn ko wà jẹnukọnna ẹn lẹpo wiwà mẹ, ahun etọn masọ yin pipé hlan* Jehovah Jiwheyẹwhe etọn taidi ahun Davidi tọgbo etọn tọn. 4 Ṣigba, na Davidi tọn wutu,+ Jehovah Jiwheyẹwhe etọn na ẹn miyọ́ngbán de to Jelusalẹm+ gbọn visunnu etọn zizedaga to godo etọn po Jelusalẹm hinhẹndote po dali. 5 Na Davidi wà nuhe sọgbe to nukun Jehovah tọn mẹ bo ma lẹkọ sọn nuhe E ko degbena ẹn lẹpo mẹ to gbẹzan etọn mẹ, adavo to whẹho Ulia Hetinu lọ tọn mẹ.+ 6 Awhàn sọ gbọṣi aimẹ to Lehoboami po Jeloboami po ṣẹnṣẹn to gbẹzan etọn lẹpo mẹ.+

7 Na nuhe dù otàn Abijami tọn he pò, yèdọ nuhe e wà lẹpo, be e ma yin kinkan do owe whenuho ahọlu Juda tọn lẹ tọn mẹ ya?+ Awhàn sọ tin to Abijami po Jeloboami po ṣẹnṣẹn.+ 8 To godo mẹ, Abijami yin hinhẹn nado mlọnai hẹ tọgbo etọn lẹ, bọ yé dì i do Tòdaho Davidi tọn mẹ; visunnu etọn Asa+ sọ lẹzun ahọlu do otẹn etọn mẹ.+

9 To owhe 20tọ Ahọlu Jeloboami Islaeli tọn mẹ, Asa jẹ gandu ji do Juda ji. 10 E dugán to Jelusalẹm na owhe 41. Oyín onọ̀-daho etọn tọn wẹ Maaka,+ yèdọ ovivi Abiṣalọmi tọn. 11 Asa wà nuhe sọgbe to nukun Jehovah tọn mẹ,+ kẹdẹdi Davidi tọgbo etọn. 12 E yàn sunnu galọtọ tẹmpli mẹ tọn lẹ sẹ̀ sọn aigba lọ ji+ bo de boṣiọ hiọawu* he tọgbo etọn lẹ ko basi lẹpo sẹ̀.+ 13 E tlẹ sọ de Maaka+ onọ̀-daho etọn sẹ̀ sọn otẹn ahọsi daho tọn mẹ, na ewọ ko basi boṣiọ gblezọn de na sinsẹ̀n-bibasi na dòtin wiwe* lọ. Asa sán boṣiọ gblezọn etọn liai+ bo mẹ̀ ẹn to Agbàdo Kidlọni tọn mẹ.+ 14 Ṣigba, ofi yiaga lẹ ma yin didesẹ.+ Etomọṣo, ahun Asa tọn yin pipé hlan* Jehovah to gbẹzan* etọn lẹpo mẹ. 15 E sọ bẹ nuhe ewọ po otọ́ etọn po ko klandowiwe lẹ wá ohọ̀ Jehovah tọn mẹ—yèdọ fataka, sika po nuyizan voovo lẹ po.+

16 Awhàn sọ gbọṣi aimẹ to Asa po Baaṣa+ ahọlu Islaeli tọn po ṣẹnṣẹn. 17 Enẹwutu, Ahọlu Baaṣa Islaeli tọn hẹji wá nado hoavùn hẹ Juda bo jẹ Lama+ gbá ji* nado glọnalina mẹdepope he jlo na tọ́nyi kavi wá* Ahọlu Asa Juda tọn dè.+ 18 Enẹwutu, Asa bẹ fataka po sika po he pò to adọkunnu sẹdotẹn he to ohọ̀ Jehovah tọn mẹ po adọkunnu sẹdotẹn he to owhé* ahọlu tọn gbè lẹpo po na devizọnwatọ etọn lẹ. Ahọlu Asa sọ do yé hlan Bẹni-hadadi visunnu Tablimọni he yin visunnu Heziọni tọn dè, yèdọ ahọlu Silia tọn+ he nọ nọ̀ Damasku bo dọmọ: 19 “Gbekọndopọ* de tin to yẹn po hiẹ po ṣẹnṣẹn podọ to otọ́ ṣie po otọ́ towe po ṣẹnṣẹn. Yẹn to nunina fataka po sika po tọn dohlan we. Wá, sánkanna gbekọndopọ* he to hiẹ po Ahọlu Baaṣa Islaeli tọn po ṣẹnṣẹn, na ewọ nido joagọ sọn dè e.” 20 Bẹni-hadadi sọ dotoaina nuhe Ahọlu Asa dọ bo do awhàngán etọn lẹ hlan sọta tòdaho Islaeli tọn lẹ, yé sọ gbawhàn Ijọni,+ Dani,+ Abẹli-bẹti-maaka, Kinnelẹti pete po aigba Naftali tọn pete po tọn. 21 Whenue Baaṣa sè ehe, e jo Lama gbigbá do* to afọdopolọji bo yì gbọṣi Tilza.+ 22 Ahọlu Asa sọ ylọ Juda pete pli—mẹdepope ma pò—bọ yé bẹ zannu po owhlẹ he Baaṣa ko yí do to azọ́nwa to Lama lẹ po sẹ̀, Ahọlu Asa sọ yí yé do dó Geba*+ to Bẹnjamini gọna Mizpa.+

23 Na nuhe dù otàn Asa tọn he pò, yèdọ huhlọn he e dohia gọna nuhe e wà lẹpo po tòdaho he e do* lẹ po, be e ma yin kinkan do owe whenuho ahọlu Juda tọn lẹ tọn mẹ ya? Ṣigba, to yọnhowhe etọn mẹ, e bẹ afọ-zọ̀n.+ 24 To godo mẹ, Asa yin hinhẹn nado mlọnai hẹ tọgbo etọn lẹ bo yin dìdì dopọ hẹ yé do Tòdaho Davidi tọgbo etọn tọn mẹ; visunnu etọn Jehoṣafati+ sọ lẹzun ahọlu do otẹn etọn mẹ.

25 Nadabi+ visunnu Jeloboami tọn duahọlu do Islaeli ji to owhe awetọ Ahọlu Asa Juda tọn mẹ, e sọ dugán do Islaeli ji na owhe awe. 26 E zindonukọn nado to nuhe ylan to nukun Jehovah tọn mẹ lẹ wà bo zinzọnlin gbọn aliho otọ́ etọn tọn ji+ podọ to ylando etọn he e hẹn Islaeli nado wà lẹ mẹ.+ 27 Baaṣa visunnu Ahija tọn sọn whédo Isakali tọn mẹ blasé do e go, Baaṣa sọ hù i to Gibetọni+ Filistinu lẹ tọn, to whenue Nadabi po Islaeli pete po dosla lẹdo Gibetọni. 28 Baaṣa hù i to owhe atọ̀ntọ Ahọlu Asa Juda tọn mẹ bo lẹzun ahọlu do otẹn etọn mẹ. 29 Podọ tlolo he ewọ duahọlu, e hù mẹhe tin to whédo Jeloboami tọn mẹ lẹpo. E ma pò omẹ Jeloboami tọn depope dogbẹ̀; e hẹn ẹn diun dọ yé yin kúnsúdona sọgbe hẹ ohó he Jehovah ko dọ gbọn devizọnwatọ etọn Ahija Ṣilonu lọ gblamẹ.+ 30 Ehe yinmọ, na ylando he Jeloboami ko wà bo hẹn Islaeli nado wà lẹ wutu, podọ na ewọ ko hẹn homẹgble Jehovah Jiwheyẹwhe Islaeli tọn sinsinyẹn wutu. 31 Na nuhe dù otàn Nadabi tọn he pò, yèdọ nuhe e wà lẹpo, be e ma yin kinkan do owe whenuho ahọlu Islaeli tọn lẹ tọn mẹ ya? 32 Awhàn sọ gbọṣi aimẹ to Asa po Ahọlu Baaṣa Islaeli tọn po ṣẹnṣẹn.+

33 To owhe atọ̀ntọ Ahọlu Asa Juda tọn mẹ, Baaṣa visunnu Ahija tọn lẹzun ahọlu do Islaeli pete ji to Tilza bo dugán na owhe 24.+ 34 Ṣigba, e zindonukọn nado to nuhe ylan to nukun Jehovah tọn mẹ lẹ wà+ bo zinzọnlin gbọn aliho Jeloboami tọn ji podọ to ylando etọn he e ko hẹn Islaeli nado wà lẹ mẹ.+