1 Samuẹli

14 To gbèdopo, Jonatani+ visunnu Sauli tọn dọna devizọnwatọ he nọ hẹn awhànfunnu na ẹn dọmọ: “Wá mí ni dasá yì osla awhànfun-gbẹ́ Filistinu lẹ tọn mẹ to awà awetọ ji.” Ṣigba, e ma dọna otọ́ etọn. 2 Sauli tin to gbonu Gibea+ tọn to atin pomeglanate* tọn de glọ to Miglọni, bọ nudi sunnu 600 tin to e dè.+ 3 (Podọ Ahija, visunnu Ahitubi+ tọn, nọvisunnu Ikabọdi+ tọn, visunnu Finehasi tọn,+ visunnu Eli+ he yin yẹwhenọ Jehovah tọn to Ṣilo+ hẹn efọdi*+ lọ.) Gbẹtọ lẹ masọ yọnẹn dọ Jonatani ko yì. 4 Todin, to ali he ji Jonatani to tintẹnpọn nado gbọn dasá yì osla awhànfun-gbẹ́ Filistinu lẹ tọn mẹ lọ lẹ ṣẹnṣẹn, osé de he taidi adú tin to adà ehe ji bọ osé de he taidi adú sọ tin to adà awetọ ji; oyín dopo tọn wẹ Bozẹzi bọ oyín awetọ tọn wẹ Senẹ. 5 Osé lọ dopo yin dòtin de to agewaji bo pannukọn Mikmaṣi bọ awetọ tin to hùwaji bo pannukọn Geba.+

6 Enẹwutu, Jonatani dọna gbaja hẹntọ etọn dọmọ: “Wá mí ni dasá yì osla awhànfun-gbẹ́ sunnu he ma gboadà ehelẹ tọn mẹ.+ Vlavo Jehovah na yinuwado ota mítọn mẹ, na nudepope ma sọgan glọnalina Jehovah nado whlẹnmẹ vlavo gbọn mẹsusu dali kavi gbọn omẹ vude dali.”+ 7 Gbaja hẹntọ etọn sọ dọna ẹn dọmọ: “Wà nudepope he ahun towe dọna we. Lẹhlan fidepope he a jlo, yẹn nasọ hodo we yì fidepope he ahun towe dọna we.” 8 Whenẹnu, Jonatani dọmọ: “Mí na dasá yì sunnu ehelẹ dè bo na sọawuhia yé. 9 Eyin yé dọna mí dọ, ‘Mì nọte whii kakajẹ whenue mí na wá mì dè!’ be mí na nọte do fihe mí te bo ma na hẹji yì yé dè. 10 Ṣigba, eyin yé dọ, ‘Mì hẹji wá mí ji!’ be mí na hẹji yì, na Jehovah na jo yé do alọ mítọn mẹ. Ehe wẹ na yin ohia lọ na mí.”+

11 Whenẹnu, yé omẹ awe lẹ sọawuhia hlan osla awhànfun-gbẹ́ Filistinu lẹ tọn. Filistinu lẹ sọ dọmọ: “Mì pọ́n! Heblu lẹ ko to tintọ́njẹgbonu sọn odò he mẹ yé whlá yede do lẹ.”+ 12 Enẹwutu, sunnu he to osla awhànfun-gbẹ́ lọ tọn mẹ lẹ dọna Jonatani po gbaja hẹntọ etọn po dọmọ: “Mì hẹji wá mí dè, mí nasọ yí nukun mìtọn do mọ ṣinatọ̀n!”+ To afọdopolọji, Jonatani dọna gbaja hẹntọ etọn dọmọ: “Hodo mi, na Jehovah na jo yé do alọ Islaeli tọn mẹ.”+ 13 Jonatani sọ yí alọ po afọ etọn lẹ po do sá hẹaga, bọ gbaja hẹntọ etọn hodo e; Filistinu lẹ sọ jẹ aijẹ ji to Jonatani nukọn, bọ gbaja hẹntọ etọn sọ to yé hù to godo na ẹn. 14 To mẹgbeyinyan tintan he Jonatani po gbaja hẹntọ etọn po basi lọ whenu, yé hù nudi sunnu 20 to nudi odaa ogle jijlẹ dopo tọn* gblamẹ.

15 Whenẹnu, obu jẹ yemẹpo ji to osla danji tọn lọ mẹ podọ to mẹhe to awhànfun-gbẹ́ lọ mẹ lẹpo ṣẹnṣẹn, bọ obu tlẹ jẹ awhànpa he to avùnho+ lọ lọsu ji. Aigba sọ jẹ sisọsisọ ji bọ obu Jiwheyẹwhe tọn jẹ yé ji. 16 Nuhọ́tọ Sauli tọn he to Gibea+ Bẹnjamini tọn lẹ mọdọ zingidi lọ to kandlẹn jẹ filẹpo.+

17 Sauli dọna mẹhe topọ hẹ ẹ lẹ dọmọ: “Mì jaale bo hia gbẹtọ lẹ bo pọ́n mẹhe whè sọn mí mẹ.” Whenue yé hia gbẹtọ lọ lẹ, yé mọdọ Jonatani po gbaja hẹntọ etọn po wẹ ma to finẹ. 18 Todin, Sauli dọna Ahija+ dọmọ: “Hẹn Apotin Jiwheyẹwhe nugbo lọ tọn sẹpọ!” (Na Apotin Jiwheyẹwhe nugbo lọ tọn tin to Islaelivi lẹ dè to ojlẹ enẹ mẹ.)* 19 Podọ dile Sauli to hodọna yẹwhenọ lọ, zingidi he to osla Filistinu lẹ tọn mẹ lọ fọ́n bo to sinsinyẹn deji. Whenẹnu, Sauli dọna yẹwhenọ lọ dọmọ: “Doalọtena nuhe wà a te.”* 20 Enẹwutu, Sauli po mẹhe topọ hẹ ẹ lẹpo po pli dopọ bo dedo awhànfun gbé, yé sọ mọ to dọ́n dọ Filistinu lẹ ko lilẹ́ ohí yetọn lẹ sọta ode awetọ yetọn, bọ zingidi lọ sinyẹn taun. 21 Humọ, Heblu he ko yì kọnawudopọ hẹ Filistinu lẹ dai bo ko hodo yé wá osla lọ mẹ lẹ jẹ kọlẹwá omẹ Islaeli tọn lẹ mẹ ji, yèdọ wá anademẹ Sauli po Jonatani po tọn glọ. 22 To whenue sunnu Islaeli tọn he ko whlá yede+ do lẹdo osó tọn Eflaimi tọn mẹ lẹpo sè dọ Filistinu lẹ ko họ̀n, yelọsu wá kọnawudopọ hẹ Islaelivi lẹ to awhàn lọ mẹ nado dómọna yé. 23 Mọ wẹ Jehovah whlẹn Islaeli do to azán enẹ gbè+ bọ awhàn lọ dlẹnkan kaka yì Bẹti-aveni.+

24 Ṣigba, sunnu Islaeli tọn lẹ tin to ninọmẹ sinsinyẹn mẹ to azán enẹ gbè, na Sauli ko hẹn yé nado whlé dọmọ: “Mẹhodẹ̀do wẹ sunnu depope he dù núdùdù* depope jẹnukọnna whèjai, yèdọ kakajẹ whenue yẹn na ko yiahọsu to kẹntọ ṣie lẹ go!” Enẹwutu, depope to gbẹtọ lọ lẹ mẹ ma dù núdùdù depope.+

25 Gbẹtọ lọ lẹpo* sọ wá zungbo mẹ bo mọ owín to kọmẹ to finẹ. 26 To whenue gbẹtọ lọ lẹ wá zungbo lọ mẹ, yé mọ owín to kùnkùn, ṣigba mẹdepope ma gán hẹn alọ etọn yì nùmẹ, na yé to budina whiwhle lọ wutu. 27 Ṣigba, Jonatani ma ko sè dọ otọ́ etọn ko hẹn gbẹtọ lẹ nado whlé gba,+ enẹwutu ewọ dlẹn bẹ́nu opò he to alọmẹ na ẹn lọ tọn bo ylọn ẹn do owínjá lọ mẹ. To whenue e hẹn alọ etọn gọ̀ yì nùmẹ, nukunmẹ etọn họ́n. 28 Whenẹnu, dopo to gbẹtọ lọ lẹ mẹ dọmọ: “Otọ́ towe ko hẹn gbẹtọ lẹ nado whlé sinsinyẹn dọ, ‘Mẹhodẹ̀do wẹ sunnu depope he dùnú to egbé!’+ Enẹwutu wẹ agbọ́ do pé gbẹtọ lọ lẹ sọmọ.” 29 Ṣigba, Jonatani dọmọ: “Nuhahun daho* wẹ otọ́ ṣie hẹnwa aigba lọ ji. Mì pọ́n lehe nukunmẹ ṣie họ́n do, na owín ehe vude he n’dọ́pọ́n poun wutu. 30 Lehe e na ko pọnte hugan do sọ eyin gbẹtọ lọ lẹ ko dù sọn ogblànnu kẹntọ yetọn lẹ tọn mẹ to egbehe dile e jlo yé do!+ Enẹ na tlẹ sọ zọ́n bọ mí na ko hù Filistinu lẹ humọ.”

31 To azán enẹ gbè, yé to Filistinu lẹ hù sọn Mikmaṣi kaka yì Aijalọni,+ bọ agbọ́ wá pé gbẹtọ lọ lẹ taun. 32 Enẹwutu, gbẹtọ lọ lẹ yí nukunkẹn do zlọn jẹ ogblànnu lẹ ji, yé sọ yí lẹngbọ lẹ, oyìn lẹ po oyìnvu lẹ po bo hù yé do kọmẹ tata bosọ dù olàn lọ po ohùn po.+ 33 Linlin sọ yin nina Sauli dọmọ: “Pọ́n! Gbẹtọ lọ lẹ to ylando wà do Jehovah gbọn olàn po ohùn etọn po dùdù dali.”+ Ewọ sọ dọmọ: “Mì ko yinuwa matin yise. Mì bli zannu daho de wá na mi to afọdopolọji.” 34 Enẹgodo, Sauli dọmọ: “Mì gbàpe biọ gbẹtọ lọ lẹ ṣẹnṣẹn bo dọna yé dọ, ‘Dopodopo mìtọn ni hẹn oyìnsú po lẹngbọ etọn po wá bo hù yé tofi, enẹgodo mì dù yé. Mì waylando do Jehovah gbọn olàn po ohùn etọn po dùdù dali blo.’”+ Enẹwutu, dopodopo yetọn hẹn oyìnsú etọn wá to ozán enẹ mẹ bo hù i to finẹ. 35 Sauli sọ do agbà de na Jehovah.+ Ehe wẹ yin agbà tintan he ewọ do na Jehovah.

36 Enẹgodo, Sauli dọmọ: “Mì gbọ mí ni jẹte yì Filistinu lẹ ji to zánmẹ bo bẹ nutindo yetọn lẹ di ogblànnu kakajẹ afọnnu. Mí ma na jo mẹdopo tata dogbẹ̀.” Yé sọ gblọn dọmọ: “Wà nudepope he yọ́n to nukun towe mẹ.” Yẹwhenọ lọ sọ dọmọ: “Mì gbọ mí ni dọnsẹpọ Jiwheyẹwhe nugbo lọ tofi.”+ 37 Sauli sọ kanhose Jiwheyẹwhe dọmọ: “Yẹn ni jẹte yì Filistinu lẹ ji wẹ ya?+ Be hiẹ na jo yé do alọ Islaeli tọn mẹ ya?” Ṣigba, Jiwheyẹwhe ma siọ ẹ to azán enẹ gbè. 38 Enẹwutu, Sauli dọmọ: “Mì ogán gbẹtọ lọ lẹ tọn lẹpo emi, mì wáfi bo dindona ylando he ko yin wiwà to egbé. 39 Na dile Jehovah, mẹhe whlẹn Islaeli togbẹ̀, eyin etlẹ wá họnwun dọ Jonatani visunnu ṣie wẹ, ewọ dona kú.” Ṣigba, depope to gbẹtọ lọ lẹ mẹ ma gblọn nude na ẹn. 40 Whenẹnu, e dọna Islaeli pete dọmọ: “Mìwlẹ na pli do awà dopo ji bọ yẹn po visunnu ṣie Jonatani po na tin to awà awetọ ji.” Gbẹtọ lọ lẹ sọ gblọnna Sauli dọmọ: “Wà nudepope he yọ́n to nukun towe mẹ.”

41 Enẹgodo, Sauli dọna Jehovah dọmọ: “Jiwheyẹwhe Islaeli tọn E, na gblọndo gbọn Tumimi gblamẹ!”+ Whenẹnu, Jonatani po Sauli po yin dide, bọ owhẹ̀ jo mẹhe pò lẹ. 42 Todin, Sauli dọmọ: “Mì de ovò+ nado yọ́n mẹhe wẹ to yẹn po visunnu ṣie Jonatani po ṣẹnṣẹn.” Jonatani sọ yin dide. 43 Whenẹnu, Sauli dọna Jonatani dọmọ: “Dọna mi, etẹwẹ hiẹ ko wà?” Jonatani sọ dọna ẹn dọmọ: “Owín vude poun wẹ n’dọ́pọ́n sọn bẹ́nu opò he to alọmẹ na mi lọ tọn.+ Yẹn die! N’to gbesisọ mẹ nado kú!”

44 Whenẹnu, Sauli dọmọ: “Na Jiwheyẹwhe ni sayana mi sinsinyẹn eyin hiẹ, Jonatani ma yin hùhù.”+ 45 Ṣigba, gbẹtọ lọ lẹ dọna Sauli dọmọ: “Be e jẹ dọ Jonatani—mẹhe hẹn awhàngbigba* daho ehe wá+ na Islaeli ni kú ya? Gbede pọ́n! Dile Jehovah togbẹ̀, dopo tata to oda he to ota na ẹn lẹ mẹ ma na flẹ jai, na po alọgọ Jiwheyẹwhe tọn po wẹ e yinuwa to egbé.”+ Gbọnmọ dali, gbẹtọ lọ lẹ whlẹn Jonatani* bọ e ma yin hùhù.

46 Enẹwutu, Sauli doalọtena mẹgbeyinyan sọta Filistinu lẹ bọ Filistinu lẹ lẹkọyi aigba yetọn ji.

47 Sauli hẹn ahọlu-yinyin etọn do Islaeli ji lodo bo hoavùn sọta kẹntọ etọn lẹpo to awà lẹpo ji, yèdọ sọta Moabinu lẹ,+ Amọninu lẹ,+ Edominu lẹ,+ ahọlu Zoba+ tọn lẹ po Filistinu lẹ+ po; ewọ sọ nọ gbawhàn to fidepope he e yì. 48 E sọ yí adọgbigbo do hoavùn bo gbawhàn Amalẹkinu lẹ tọn+ bosọ whlẹn Islaeli sọn alọ mẹhe nọ bẹ nutindo yetọn lẹ tọn lẹ mẹ.

49 Visunnu Sauli tọn lẹ wẹ Jonatani, Iṣvi po Malki-ṣua po.+ Ewọ sọ tindo viyọnnu awe; oyín mẹho lọ tọn wẹ Mẹlabi+ bọ yọpọvu lọ tọn wẹ Mikali.+ 50 Oyín asi Sauli tọn wẹ Ahinoami, viyọnnu Ahimaazi tọn. Oyín ogán awhànpa etọn tọn wẹ Abneli,+ visunnu Neli tọn, yèdọ tavẹ Sauli tọn. 51 Kiṣi+ wẹ yin otọ́ Sauli tọn bọ Neli+ he yin otọ́ Abneli tọn yin visunnu Abiẹli tọn.

52 Awhàn sinsinyẹn wẹ Sauli fùn hẹ Filistinu lẹ to gbẹwhenu etọn pete.+ Whedepopenu he Sauli mọ sunnu huhlọnnọ kavi adọgbotọ de, e nọ yí i do awhànpa etọn mẹ.+