Luku

18 Enẹgodo, e zindonukọn nado na apajlẹ de devi lẹ gando nuhudo lọ nado nọ hodẹ̀ to whepoponu podọ ma nado gbọjọ gbede go,+ 2 dọmọ: “Dawe whẹdatọ de tin to tòdaho de mẹ he ma nọ dibusi Jiwheyẹwhe bo masọ nọ si gbẹtọ. 3 Asuṣiọsi de sọ tin to tòdaho enẹ mẹ he nọ yì e dè whẹwhẹ, bo nọ dọmọ, ‘Hẹn ẹn diun dọ yẹn mọ whẹdida dodo yí do mẹhe yẹn pé-whẹ̀ hẹ lọ ji.’ 4 Na ojlẹ de, ewọ ma tindo ojlo, ṣigba to godo mẹ, e dọna ede dọ, ‘Dile etlẹ yindọ yẹn ma nọ dibusi Jiwheyẹwhe kavi na sisi mẹdepope sọ, 5 na asuṣiọsi ehe to tuklado mi mapote wutu, yẹn na hẹn ẹn diun dọ e mọ whẹdida dodo yí, na e nikaa to wiwá bo hẹn agbọ́ pé mi po obiọ mapote etọn lẹ po.’”*+ 6 Enẹgodo, Oklunọ dọmọ: “Mì sè nuhe whẹdatọ lọ dọ, dile ewọ tlẹ yin mawadodonọ do sọ! 7 To whelọnu lo, na nugbo tọn, be Jiwheyẹwhe ma na hẹn ẹn diun dọ whẹdida dodo yin bibasi na mẹdide etọn lẹ he to awhádo hlan ẹn to okle po ozán po,+ dile etlẹ yindọ e to homẹfa hlan yé ya?+ 8 Yẹn dọna mì dọ, ewọ na hẹn ẹn diun dọ whẹdida dodo yin bibasi na yé po awuyiya po. Etomọṣo, whenuena Visunnu gbẹtọ tọn na wá, be ewọ na mọ yise ehe* to aigba ji nugbonugbo ya?”

9 Ewọ sọ na apajlẹ ehe mẹdelẹ he nọ deji dọ emi yin dodonọ bo nọ pọ́n mẹdevo lẹ hlan di nuvọ́nọ, dọmọ: 10 “Dawe awe hẹji yì tẹmpli mẹ nado hodẹ̀, dopo yin Falesi de bọ awetọ yin tòkuẹ-ṣinyantọ de. 11 Falesi lọ ṣite bo jẹ dẹ̀ho ji bosọ to onú ehelẹ dọ to ede mẹ dọmọ, ‘Jiwheyẹwhe E, n’dopẹna we dọ n’ma taidi mẹhe pò lẹ—yèdọ alọslonamẹtọ lẹ, mawadodonọ lẹ, ayọdetọ lẹ—kavi etlẹ yin taidi tòkuẹ-ṣinyantọ ehe. 12 Yẹn nọ blanù whla awe to osẹ dopo mẹ; yẹn nọ na mado-ao nuhe n’tindo lẹpo tọn.’+ 13 Amọ́, tòkuẹ-ṣinyantọ lọ he ṣite to olá ma tlẹ jlo nado ze nukun etọn lẹ daga hlan olọn, ṣigba to akọ́nnu etọn hò bosọ to didọmọ, ‘Jiwheyẹwhe E, do ojọmiọn hia mi,* yẹn ylandonọ.’+ 14 Yẹn dọna mì dọ, dawe ehe yì owhé etọn gbè bo yin dodonọ hú Falesi enẹ.+ Na mẹdepope he ze ede daga wẹ yè na whiwhẹ, ṣigba mẹdepope he whiwhẹ ede wẹ yè na zedaga.”+

15 Todin, gbẹtọ lẹ sọ to yọpọ yetọn lẹ hẹnwa e dè, na e nido doalọ yé go, amọ́ to whenue devi lẹ mọ ehe, yé jẹ nugbẹna yé ji.+ 16 Ṣigba, Jesu ylọ yọpọ lẹ wá ede dè, bo dọmọ: “Mì gbọ yọpọvu lẹ ni wá dè e, mì sọ tẹnpọn nado glọnalina yé blo, na omẹ mọnkọtọn lẹ wẹ Ahọluduta Jiwheyẹwhe tọn tin na.+ 17 Nugbo wẹ yẹn dọna mì dọ, mẹdepope he ma yí Ahọluduta Jiwheyẹwhe tọn taidi yọpọvu de ma na biọ e mẹ to aliho depope mẹ.”+

18 Dopo to ogán lọ lẹ mẹ sọ kanbiọ ẹ dọmọ: “Mẹplọntọ Dagbe, etẹwẹ yẹn dona wà nado dugu ogbẹ̀ madopodo tọn?”+ 19 Jesu gblọnna ẹn dọmọ: “Naegbọn hiẹ do ylọ mi dọ mẹdagbe? Mẹdepope ma yin mẹdagbe, adavo mẹdopo, yèdọ Jiwheyẹwhe.+ 20 Hiẹ yọ́n gbedide lọ lẹ he dọ: ‘Hiẹ deayọ blo,+ hiẹ hùhlọ̀n blo,+ hiẹ fìnnú blo,+ hiẹ dekunnu lalo blo,+ gbògbéna otọ́ towe po onọ̀ towe po.’”+ 21 To whenẹnu, e dọmọ: “Yẹn ko nọ yìn onú ehe lẹpo sọn ovu whenu gbọ́n.” 22 To whenue Jesu sè enẹ, e dọna ẹn dọmọ, “Onú dopo wẹ gbẹ́ to whiwhè do we: Sà nuhe a tindo lẹpo bo má nuhe a mọ sọn e mẹ lẹ na wamọnọ lẹ, a nasọ tindo adọkun to olọn mẹ; enẹgodo wá lẹzun hodotọ ṣie.”+ 23 To whenue e sè ehe, e blawu tlala, na ewọ yin adọkunnọ taun wutu.+

24 Jesu pọ́n ẹn bo dọmọ: “Lehe e na vẹawuna mẹhe tindo akuẹ lẹ nado biọ Ahọluduta Jiwheyẹwhe tọn mẹ do sọ!+ 25 Na nugbo tọn, e bọawuna kanklosọ́ de nado gbọn onù yẹnvi he nọ tọ̀ avọ̀ de tọn mẹ hú na adọkunnọ de nado biọ Ahọluduta Jiwheyẹwhe tọn mẹ.”+ 26 Mẹhe sè ehe lẹ dọmọ: “Mẹnu wẹ sọgan yin whinwhlẹngán lo?”+ 27 E dọmọ: “Nuhe ma yọnbasi na gbẹtọ lẹ yọnbasi na Jiwheyẹwhe.”+ 28 Ṣigba, Pita dọmọ: “Pọ́n! Míwlẹ ko jo onú mítọn lẹ do bo hodo we.”+ 29 E dọna yé dọmọ: “Nugbo wẹ yẹn dọna mì dọ, mẹdepope ma tin he jo owhé, asi, nọvisunnu lẹ, mẹjitọ lẹ kavi ovi lẹ do, na Ahọluduta Jiwheyẹwhe tọn wutu+ 30 he ma na mọyi do donu susu ji to ojlẹ ehe mẹ podọ ogbẹ̀ madopodo to titonu* he ja mẹ.”+

31 Enẹgodo, e plan Omẹ Wiawe lẹ dovo bo dọna yé dọmọ: “Mì pọ́n! Mí hẹji jei Jelusalẹm, bọ nuhe yin kinkandai gbọn yẹwhegán lẹ gblamẹ gando Visunnu gbẹtọ tọn go lẹpo na yin hinhẹndi.*+ 32 Di apajlẹ, ewọ na yin zizedo alọmẹ na omẹ akọta lẹ tọn+ bo na yin yíyí do davlẹ+ bo nasọ yin nuyiwa hẹ po kanyinylan po bo na yin tántún do e go.+ 33 Podọ to hihò e godo, yé na hù i,+ ṣigba e na fọ́n to azán atọ̀ntọ gbè.”+ 34 Ṣogan, yé ma mọnukunnujẹ depope to onú ehelẹ mẹ, na ohó ehelẹ yin whiwhla do yé, bọ yé ma mọnukunnujẹ nuhe yin didọ lẹ mẹ.

35 Todin, dile Jesu to sisẹpọ Jẹliko, dawe nukuntọ́nnọ de tin to aisinsin to alitó bo to nubiọ.+ 36 Na e sè ogbè gbẹtọgun he juwajei de tọn wutu, e jẹ nuhe to jijọ lọ kanbiọ ji. 37 Yé dọna ẹn dọmọ: “Jesu Nazalẹti tọn lọ wẹ juwajei!” 38 Enẹwutu, e dawhá dọmọ: “Jesu, hiẹ Visunnu Davidi tọn, wàlẹblanuna mi!” 39 Mẹhe sọ to nukọn lẹ jẹ gbededo e ji bo dọna ẹn nado nabọẹ, ṣigba e sọ vọ́ to awhádo gángán mapote dọmọ: “Wàlẹblanuna mi, hiẹ Visunnu Davidi tọn!” 40 To whenẹnu, Jesu nọte bo degbe dọ dawe lọ ni yin pinplan wá e dè. Whenue e dọnsẹpọ, Jesu kanse e dọmọ: 41 “Etẹwẹ hiẹ jlo dọ yẹn ni wà na we?” Ewọ dọmọ: “Oklunọ, dike nukun ṣie ni hùn.” 42 Enẹwutu, Jesu dọna ẹn dọmọ: “Nukun towe ni hùn; yise towe ko hẹn we jẹgangan.”+ 43 Podọ nukun etọn hùn to afọdopolọji, bọ e jẹ hihodo e ji+ bosọ to gigopana Jiwheyẹwhe. Humọ, to whenue gbẹtọ lẹ mọ ehe, yemẹpo na pipà Jiwheyẹwhe.+