Nuhe Owe lọ Bẹhẹn

Mẹhe to wesẹdotẹn de mẹ biọ to tintan whenu sọgan mọ owe voovo he yin dindọnwludopọ lẹ. Ṣigba po zẹẹmẹ vude po do lehe owe lẹ yin tito do, to madẹnmẹ e na yọ́n lehe yè nọ din onú lẹ mọ gbọn. Mọdopolọ, dodinnanu bibasi to Biblu mẹ bọawu to whenuena hiẹ mọnukunnujẹ lehe nuhe e bẹhẹn lẹ yin tito do mẹ.

HOGBE lọ “Biblu” wá sọn hogbe Glẹki tọn bi·bliʹa mẹ, ehe zẹẹmẹdo “papyrus hiha lẹ” kavi “owe lẹ.”¹ Na nugbo tọn Biblu yin bẹplidopọ owe lẹ tọn—yèdọ wesẹdotẹn de—he tindo owe dopodopo 66, ehe kinkan etọn dẹn họ̀ owhe 1 600 delẹ, sọn 1513 J.W.M. jẹ nudi 98 W.M.

Owe 39 tintan lẹ, nudi madatọ̀n nuhe Biblu bẹhẹn tọn, yin yinyọnẹn taidi Owe Wiwe Heblu Tọn lẹ, whenuena e yindọ suhugan yetọn lẹ yin kinkan do ogbè enẹ mẹ. Owe ehelẹ na paa tọn sọgan yin mimá do pipli atọ̀n mẹ: (1) Whenuho tọn, Gẹnẹsisi jẹ Ẹsteli, owe 17; (2) Homilomilo, Job jẹ Ohàn Sọlọmọni tọn, owe 5; podọ (3) Dọdai tọn, sọn Isaia jẹ Malaki, owe 17. Owe Wiwe Heblu Tọn lẹ dọho do whenuho bẹjẹeji aigba po gbẹtọvi tọn po gọna whenuho akọta hohowhenu Islaeli tọn sọn dowhenu etọn jẹ owhe kanweko atọ́ntọ J.W.M.

Owe 27 he pò lẹ yin yinyọnẹn taidi Owe Wiwe Klistiani Glẹki Tọn lẹ, na yé yin kinkan do Glẹkigbe mẹ, ogbè akọjọpli ojlẹ enẹ tọn. Yé yin tito titengbe sọgbe hẹ hosọ he ji yé dọho do: (1) owe whenuho tọn 5 lẹ—Wẹndagbe lẹ po Owalọ lẹ po, (2) wekanhlanmẹ 21 lẹ, podọ (3) Osọhia. Owe Wiwe Klistiani Glẹki Tọn lẹ zinnudo nuplọnmẹ gọna nuwiwa Jesu Klisti tọn lẹ ji po devi etọn lẹ tọn po to owhe kanweko tintan W.M.