Alọgọ Nado Dùto Obu Mítọn lẹ Ji

BE E bọawu na we nado sẹ̀n Jehovah ya?⁠— Mẹplọntọ Daho lọ ma dọ dọ e na bọawu gba. To ozán he jẹnukọnna hùhù Jesu tọn mẹ, e dọna apọsteli etọn lẹ dọmọ: “Eyin aihọn gbẹwanna mì, mì yọnẹn dọ, e ko gbẹwanna mi, whẹpo e do gbẹwanna mì.”—Johanu 15:18.

Pita doawagun dọ emi ma na gbẹ́ Jesu dai pọ́n gbede, ṣigba Jesu dọ dọ Pita na mọ́n emi whla atọ̀n to ozán enẹ mẹ. Podọ nuhe Pita basi pẹpẹ niyẹn. (Matiu 26:31-35, 69-75) Nawẹ enẹ jọ gbọn?⁠— Ehe jọ na Pita po apọsteli he pò lẹ po dibu wutu.

Be a yọ́n nuhewutu apọsteli lẹ dibu ya?⁠— Yé gboawupo nado wà onú titengbe de. Ehe yinyọnẹn sọgan gọalọna mí to egbehe nado sẹ̀n Jehovah, mahopọnna nuhe mẹdepope sọgan dọ kavi wà na mí. Ṣigba, tintan whẹ́, mí dona gbadopọnna nuhe jọ to ozán godo tọn he Jesu yizan hẹ apọsteli etọn lẹ mẹ.

Jẹnukọn whẹ́, yé basi hùnwhẹ Juwayi tọn dopọ. Ehe yin hùnwhẹ vonọtaun de he nọ yin bibasi to owhe dopodopo mẹ nado flinnu omẹ Jiwheyẹwhe tọn lẹ gando whlẹngán yetọn sọn kanlinmọgbenu to Egipti go. Enẹgodo Jesu ze hùnwhẹ vonọtaun devo de dai hẹ yé. Mí na dọhodo ehe ji to weta devo mẹ to nukọnmẹ bo na basi zẹẹmẹ lehe hùnwhẹ enẹ nọ gọalọna mí nado flin Jesu do. To hùnwhẹ ehe po hogbe tulinamẹ tọn lẹ didọna apọsteli etọn lẹ po godo, Jesu plan yé yì jipa Gẹtsemani tọn mẹ. Ehe yin fide he yé yiwanna bo nọ yawu pli do.

Jesu tọ́nsọn devi lẹ dè bọ ewọ dopokẹdẹ yì nukọn vude to jipa lọ mẹ nado yì hodẹ̀. E sọ dọna Pita, Jakobu, po Johanu po nado hodẹ̀. Ṣigba amlọn wẹ yé dọ́. Whla atọ̀n wẹ Jesu jo yé do nado yì hodẹ̀, podọ to whenuena e lẹkọwa to whla atọ̀n lọ lẹpo whenu wẹ e mọ Pita po hagbẹ etọn lẹ po to amlọndọ! (Matiu 26:36-47) Be a yọ́n nuhewutu e jẹ dọ yé ni nọ nukle nado hodẹ̀ ya?— Gbọ mí ni dọhodo ehe ji.

Juda Iskaliọti tin to Juwayi lọ tẹnmẹ hẹ Jesu po apọsteli he pò lẹ po to whèjai lọ. A na flindọ, Juda ko lẹzun ajotọ. Podọ todin e ko lẹzun mẹdehiatọ. E yọ́n fie Jesu po apọsteli etọn lẹ po nọ saba pli do to jipa Gẹtsemani tọn mẹ. Enẹwutu Juda plan awhànfuntọ lẹ wá finẹ nado wle Jesu. To whenuena yé wá finẹ, Jesu kanse yé dọmọ: “Mẹnu wẹ mìwlẹ to dindin?”

Awhànfuntọ lọ lẹ gblọn dọ: “Jesu.” Jesu ma dibu, enẹwutu e gblọn dọ: “Yẹn wẹ.” Adọgbigbo Jesu tọn paṣa awhànfuntọ lọ lẹ sọmọ bọ yé joagọyigodo bo jai. Enẹgodo Jesu dọmọ: ‘Eyin yẹn wẹ mì to dindin, mì bo gbọ apọsteli ṣie lẹ ni yì.’—Johanu 18:1-9.

To whenuena awhànfuntọ lẹ wle Jesu bo blá alọ etọn lẹ, obu di apọsteli lẹ bọ yé họnyi. Ṣigba Pita po Johanu po jlo na yọ́n nuhe yé na wà na Jesu, enẹwutu yé hodo e to godo. Enẹgodo, Jesu yin hinhẹn yì owhé Kaifa, yẹwhenọ daho lọ tọn gbè. Na yẹwhenọ daho lọ yọ́n Johanu wutu, họngbó-ṣọ́tọ lọ dike na ewọ po Pita po ni biọ whégbè.

Afọ yẹwhenọ lẹ tọn ko pli do owhé Kaifa tọn gbè nado dawhẹna Jesu. Nuhe yé jlo lẹpo wẹ yindọ Jesu ni yin hùhù. Enẹwutu yé hẹn kunnudetọ lẹ wá nado dolalo dokọna Jesu. Gbẹtọ lẹ linú Jesu bo hotómẹ na ẹn. Pita ma dẹn do finẹ to whenuena ehe lẹpo to jijọ.

Viyọnnu awhli họngbó-ṣọ́tọ he dike Pita po Johanu po ni biọ họmẹ lọ doayi Pita go. Bo dọna ẹn dọmọ: ‘Hiẹ ga nọ zọnhẹ Jesu be!’ Ṣigba Pita mọ́n dọ emi ma tlẹ yọ́n Jesu. To ojlẹ vude godo viyọnnu devo sọ yọ́n Pita bo dọna mẹhe tin to ote to finẹ lẹ dọmọ: ‘Dawe ehe nọ zọnhẹ Jesu.’ Whladopo dogọ Pita gbẹ́ dọ emi ma yọn ẹn. To ojlẹ vude godo, pipli de sọ mọ Pita bo dọ na ẹn dọmọ: “Sọn nugbo de mẹ, dopo to yé mẹ wẹ hiẹ ga.” Whla atọ̀ntọ, Pita gbẹ́ gbidigbidi, bo dọmọ: “Yẹn ma yọ́n dawe lọ gba.” Pita tlẹ whlé dọ nugbo dọ wẹ emi te, enẹgodo Jesu lẹgodo bo pọ́n ẹn.—Matiu 26:57-75; Luku 22:54-62; Johanu 18:15-27.

Be a yọ́n nuhewutu Pita dolalo ya?⁠— Obu wutu wẹ. Ṣigba etẹwutu wẹ e do dibu? Etẹwẹ e gboawupo nado wà nado sọgan gboadọ? Lẹnnupọndeji. Etẹwẹ Jesu wà he na ẹn adọgbigbo?⁠— E hodẹ̀ hlan Jiwheyẹwhe, bọ Jiwheyẹwhe gọalọna ẹn nado tindo adọgbigbo. Podọ flindọ, Jesu dọna Pita whla dopodopo atọ̀n nado hodẹ̀ bo nọ nukle bosọ họ́ali. Ṣigba etẹwẹ jọ?—

Amlọn wẹ Pita dọ́. E ma hodẹ̀, mọ e masọ họ́ali. Enẹwutu e ma tin to aṣeji to whenuena Jesu yin wiwle. To godo mẹ to whẹdida lọ whenu, to whenuena Pita mọ bọ yé linú Jesu bo basi tito nado hù i, Pita dibu taun. Ṣigba etẹwẹ Jesu ko dọna apọsteli etọn lẹ to ganhiho kleun delẹ die nado donukun?⁠— Jesu dọna yé dọ kẹdẹdile aihọn ko gbẹwanna emi do, mọwẹ e na gbẹwanna yé lọsu do ga.

Todin gbọ mí ni lẹnnupọn do nude ji he sọgan jọ do mí go he taidi nuhe jọ do Pita go. Mí ni dọ dọ hiẹ to klasi towe bọ hagbẹ towe lẹ jẹ onú agọ̀ dọ ji gando mẹhe ma nọ dọnudo asia kavi mẹhe ma nọ dù Noẹli lẹ go. Enẹgodo dopo to yé mẹ lẹhlan we bo kanse dọ: “Be nugbo wẹ dọ hiẹ ma nọ dọnudo asia ya?” Kavi mẹdevo dọmọ: “Mí sè dọ hiẹ ma tlẹ nọ dù Noẹli!” Be obu na di we nado dọ nugbo wẹ ya?⁠— Be hiẹ na yin whiwhlepọn nado dolalo, dile Pita basi do wẹ ya?⁠—

E wá vẹ́ na Pita to godo mẹ taun dọ e mọ́n Jesu. To whenuena e gọ̀ biọ ede mẹ bo yọ́n pinpẹn nuhe e wà tọn, e tọnjẹgbonu bo viavi. Mọwẹ, e lẹkọwa Jesu dè. (Luku 22:32) Lẹnnupọndo ehe ji todin. Etẹwẹ sọgan gọalọna mí ma nado dibu sọmọ bo na dọ nuhe Pita dọ?⁠— Flindọ, Pita gboawupo nado hodẹ̀ bo họ́ali. Enẹwutu, etẹwẹ hiẹ lẹndọ mí dona basi nado yin hodotọ Mẹplọntọ Daho lọ tọn?⁠—

Na taun tọn, mí dona nọ hodẹ̀ hlan Jehovah na alọgọ. To whenuena Jesu hodẹ̀, be a yọ́n nuhe Jiwheyẹwhe wà na ẹn ya?⁠— E do angẹli de hlan nado hẹn ẹn lodo. (Luku 22:43) Be angẹli Jiwheyẹwhe tọn sọgan gọalọna mí to egbehe ya?⁠— Biblu dọmọ: “Angẹli OKLUNỌ tọn lẹdo yé he dibusi i lẹ pé, bosọ whlẹn yé.” (Psalm 34:7) Ṣigba nado sọgan mọ alọgọ Jiwheyẹwhe tọn yí, e biọ nususu hugan nado hodẹ̀ bo biọ ẹ poun. Be a yọ́n nuhe mí sọ dona wà ya?⁠— Jesu dọna hodotọ etọn lẹ nado nọ nukle bo to alihọ́. Etẹwẹ a lẹndọ e sọgan gọalọna mí nado wàmọ?⁠—

Mí dona nọ dotoai po sọwhiwhe po na nuhe nọ yin didọ to opli Klistiani tọn lẹ ji podọ bo nọ setonuna nuhe mí hia to Biblu mẹ lẹ. Ṣigba mí sọ dona nọ hodẹ̀ hlan Jehovah to gbesisọmẹ bo na nọ dọna ẹn nado gọalọna mí nado sẹ̀n ẹn. Eyin mí nọ wàmọ, mí na yin alọgọna nado dùto obu mítọn lẹ ji. Enẹgodo mí na jaya to whenuena mí tindo dotẹnmẹ hundote de nado dọna mẹdevo lẹ dogbọn Mẹplọntọ Daho lọ po Otọ́ etọn po dali.