Mẹnu Wẹ Yin Nọvisunnu po Nọviyọnnu Mítọn lẹ Po?

MẸPLỌNTỌ DAHO lọ kàn kanbiọ he paṣamẹ de biọ to gbèdopo. E kanbiọ dọ: ‘Mẹnu wẹ onọ̀ ṣie? Mẹnu sọ wẹ nọvisunnu ṣie lẹ?’ (Matiu 12:48) Be hiẹ sọgan na gblọndo na kanbiọ enẹ ya?⁠— Hiẹ na ko yọnẹn dọ Malia wẹ oyín onọ̀ Jesu tọn nọ yin. Ṣigba be hiẹ yọ́n yinkọ nọvisunnu etọn lẹ tọn ya⁠— Be e tindo nọviyọnnu lẹ ya?⁠—

Biblu dọ dọ nọvisunnu Jesu tọn lẹ nọ yin ‘Jakobu, Josẹfu, Simọni, po Juda po.’ Podọ Jesu sọ tindo nọviyọnnu lẹ ga he to ogbẹ̀ to whenuena e to yẹwhehodọ to aigba ji. Na Jesu wẹ yin viplọnji lọ wutu, ewọ yin mẹho na yemẹpo.—Matiu 13:55, 56; Luku 1:34, 35.

Be nọvisunnu Jesu tọn lẹ lọsu tin to devi etọn lẹ mẹ wẹ ya?⁠— Biblu dọ dọ yé “ma yí ì sè” to tintan whenu. (Johanu 7:5) Ṣigba to godo mẹ, Jakobu po Juda po wá lẹzun devi etọn, podọ yelọsu tlẹ kàn owe Biblu tọn lẹ ga. Be a yọ́n owe Biblu tọn he yé kàn lẹ ya?⁠— Yewlẹ wẹ kàn owe Jakobu po Juda po tọn.

Dile etlẹ yindọ oyín nọviyọnnu Jesu tọn lẹ tọn ma yin didọ to Biblu mẹ, mí yọnẹn dọ e whè gbau, e tindo nọviyọnnu awe. Ṣigba sọha yetọn tlẹ sọgan hugan mọ. Be nọviyọnnu etọn lẹ wá lẹzun hodotọ wẹ ya?⁠— Biblu ma dọ ehe na mí, enẹwutu mí ma yọnẹn. Ṣigba be a yọ́n nuhewutu Jesu do kàn kanbiọ lọ biọ dọ, ‘Mẹnu wẹ onọ̀ ṣie? Mẹnu sọ wẹ nọvisunnu ṣie lẹ?’⁠— Dike mí ni dindona.

Jesu to nuplọn devi etọn lẹ bọ mẹde wá dọna ẹn dọ: ‘Onọ̀ towe po nọvisunnu towe lẹ po ṣite to gbonu, yé dindin ohó na dọ hẹ we.’ Enẹ zọ́n bọ Jesu yí dotẹnmẹ hundote lọ zan nado plọnmẹ onú titengbe de gbọn kanbiọ he paṣamẹ lọ kinkanbiọ dali dọmọ: ‘Mẹnu wẹ onọ̀ ṣie? Mẹnu sọ wẹ nọvisunnu ṣie lẹ?’ To gblọndo nina na kanbiọ lọ mẹ, Jesu dlẹnalọdo devi etọn lẹ, bo dọmọ: ‘Mì pọ́n onọ̀ ṣie po nọvisunnu ṣie lẹ po!”

Enẹgodo, Jesu basi zẹẹmẹ nuhe e tindo to ayiha mẹ tọn, dọmọ: ‘Mẹdepope he wà ojlo Otọ́ ṣie he tin to olọn mẹ tọn, ewọ wẹ nọvisunnu ṣie, nọviyọnnu ṣie, po onọ̀ ṣie po.’ (Matiu 12:47-50) Ehe do lehe Jesu yiwanna devi etọn lẹ sọ hia. Nuhe e to pinplọn mí wẹ yindọ, devi etọn lẹ taidi nọvisunnu, nọviyọnnu, po onọ̀ po na ẹn.

To ojlẹ enẹ mẹ, nọvisunnu Jesu lọsu titi tọn lẹ— Jakobu, Josẹfu, Simọni, po Juda po ma ko yise dọ Jesu yin Ovi Jiwheyẹwhe tọn gba. E họnwun dọ yé ma ko yí nuhe angẹli Gabliẹli dọna onọ̀ yetọn sè gba. (Luku 1:30-33) Enẹwutu yé sọgan ko gbẹwanna Jesu. Mẹdepope he nọ yinuwa domọ ma sọgan yin nọvisunnu kavi nọviyọnnu nugbo de gba. Be a yọ́n mẹde he gbẹwanna nọvisunnu kavi nọviyọnnu etọn domọ ya?⁠—

Biblu dọ otàn Esau po Jakobu po tọn, podọ lehe Esau gblehomẹ do sọ bo tlẹ dọmọ: “Yẹn na hù Jakobu nọvisunnu ṣie.” Enẹwutu, onọ̀ yetọn, Lebeka, dibu sọmọ bo dọna Jakobu nado họnyi, na Esau ni ma do hù i blo. (Gẹnẹsisi 27:41-46) Ṣigba, to owhe susu lẹ godo, homẹgble Esau tọn yido, bọ e gbò Jakobu fán bosọ donù-nùgo na ẹn.—Gẹnẹsisi 33:4.

To godo mẹ, Jakobu ji visunnu 12. Ṣigba visunnu mẹho Jakobu tọn lẹ ma yiwanna nọvisunnu pẹvi yetọn Josẹfu gba. Yé nọ whànwu do e na ewọ wẹ otọ́ yetọn yiwanna hugan wutu. Enẹwutu to whenuena mẹhe nọ họ̀ afanumẹ lẹ wá jei Egipti, yé sà Josẹfu na yé. Ṣigba yé dọna otọ́ yetọn dọ gbekanlin ylankan de wẹ hù Josẹfu. (Gẹnẹsisi 37:23-36) Be enẹ ma ylan taun ya?⁠—

To godo mẹ, nọvisunnu Josẹfu tọn lẹ wá lẹnvọjọ. Enẹwutu Josẹfu jona yé. Be a ma mọdọ Josẹfu taidi Jesu ya?⁠— Apọsteli Jesu tọn lẹ họnyi to whenuena e to nuhahun mẹ, podọ Pita tlẹ mọ́n dọ emi ma yọ́n Jesu. Ṣogan, Jesu jona yemẹpo, dile Josẹfu basi do.

Nọvisunnu awe devo lẹ tin he nọ yin Kaini po Abẹli po. Mí sọgan plọnnu sọn otàn yetọn mẹ ga. Jiwheyẹwhe mọ to ahun Kaini tọn mẹ dọ e ma yiwanna nọvisunnu etọn ganji. Enẹwutu Jiwheyẹwhe dọna Kaini nado diọ walọ etọn. Eyin Kaini yiwanna Jiwheyẹwhe nugbonugbo wẹ, e na ko setonuna ẹn. Ṣigba e ma yiwanna Jiwheyẹwhe. Kaini dọna Abẹli to gbèdopo dọmọ: ‘Gbọ mí ni yì danji.’ Abẹli hodo Kaini yì. To whenuena yé omẹ awe lẹ kẹdẹ to danji, Kaini linú nọvisunnu etọn bo hù i.—Gẹnẹsisi 4:2-8.

Biblu dọna mí dọ mí dona plọn onú vonọtaun de sọn ehe mẹ. Be a yọ́n nuplọnmẹ lọ ya?⁠— ‘Ehe wẹ owẹ̀n he mì ko sè sọn whenu dindẹn die: Mí dona yiwanna ode awetọ mítọn; e mayin taidi Kaini, he jọ sọn mẹylankan lọ dè gba.’ Enẹwutu nọvisunnu lẹ po nọviyọnnu lẹ po dona yiwanna ode awetọ yetọn. Yé ma dona di Kaini gba.—1 Johanu 3:11, 12.

Etẹwutu wẹ mí ma dona taidi Kaini?⁠— Na Biblu dọ dọ e ‘jọ sọn mẹylankan lọ,’ Satani Lẹgba dè wutu. Na Kaini yinuwa di Lẹgba wutu, e taidi dọ Lẹgba wẹ yin otọ́ etọn.

Be a mọ nuhe zọ́n bọ e do yin nujọnu nado yiwanna nọvisunnu po nọviyọnnu towe lẹ po ya?⁠— Eyin a ma yiwanna yé, apajlẹ ovi mẹnu tọn hodo wẹ a te?⁠— Ovi Lẹgba tọn lẹ. Hiẹ ma na jlo nado yin ovi Lẹgba tọn gba, kavi e mayin mọwẹ?⁠— Enẹwutu nawẹ a sọgan dohia dọ emi jlo nado yin ovi Jiwheyẹwhe tọn gbọn?⁠— A sọgan wàmọ gbọn wanyina nọvisunnu po nọviyọnnu towe lẹ po dali.

Ṣigba, etẹwẹ owanyi?⁠— Owanyi zẹẹmẹdo numọtolanmẹ sisosiso de he nọ sisẹ́ mí nado wà dagbe na mẹdevo lẹ. Mí nọ dohia dọ mí yiwanna mẹdevo lẹ eyin mí nọ lẹn dagbe yetọn bo nọ wadagbe na yé. Podọ mẹnu wẹ yin nọvisunnu po nọviyọnnu mítọn lẹ po he mí dona yiwanna?⁠— Flindọ Jesu plọnmẹ dọ, mẹhe yin Klistiani lẹ wẹ.

Nawẹ e yin nujọnu dọ mí ni yiwanna nọvisunnu po nọviyọnnu Klistiani lẹ po sọ?⁠— Biblu dọmọ: “Ewọ he ma yiwanna mẹmẹsunnu [kavi mẹmẹyọnnu] etọn he e mọ, nawẹ e na yiwanna Jiwheyẹwhe mẹhe e ma mọ do?” (1 Johanu 4:20) Enẹwutu e mayin vude poun to Klistiani lẹ mẹ wẹ mí dona yiwanna gba. Mí dona yiwanna yemẹpo. Jesu dọmọ: “Gbọn ehe dali wẹ gbẹtọ lẹpo na yọnẹn dọ nuplọntọ ṣie wẹ mì, eyin mìwlẹ tindo owanyi hlan mìnọzo.” (Johanu 13:35) Be hiẹ yiwanna mẹmẹsunnu po mẹmẹyọnnu lẹpo pete ya?⁠— Flindọ, eyin a ma yiwanna yé, a ma sọgan yiwanna Jiwheyẹwhe nugbonugbo gba.

Nawẹ mí sọgan dohia dọ mí yiwanna mẹmẹsunnu po mẹmẹyọnnu mítọn lẹ po nugbonugbo gbọn?⁠— Na nugbo tọn, eyin mí yiwanna yé, mí ma na nọ nọlá na yé, bo ma na nọ jlo nado dọho hẹ yé gba. Mí na nọ jihọntọn hẹ yemẹpo. Mí na nọ wadagbe na yé to whepoponu bo na nọ jlo nado nanú yé. Podọ eyin yé tindo nuhahun de, mí dona nọ gọalọna yé na whẹndo daho dopolọ mẹ wẹ mímẹpo tin te.

Eyin mí yiwanna mẹmẹsunnu po mẹmẹyọnnu mítọn lẹpo po nugbonugbo, etẹwẹ ehe nọ dohia?⁠— E nọ dohia dọ mí yin devi Jesu, yèdọ Mẹplọntọ Daho lọ tọn lẹ. Podọ be e mayin nuhe mí jlo na yin lọ niyẹn ya?⁠—