Nuplọnmẹ de Gando Jonamẹ Go

Aliho voovo mẹ wẹ gbẹtọ lẹ kẹalọyi nuhe Jesu dọ bo wà lẹ te, sọgbe hẹ ninọmẹ ahun mẹ tọn yetọn. Ehe họnwun to owhé de gbè to Galili. Falesi de he nọ yin Simọni basi oylọna Jesu nado wá dùnú, vlavo nado yọ́n mẹhe to azọ́n ayidego tọn mọnkọtọn lẹ wà dogọ. Jesu na ko pọ́n ehe hlan taidi dotẹnmẹ hundote de nado dọyẹwheho na mẹhe na wá lẹ, enẹwutu e kẹalọyi oylọ lọ, dile e ko kẹalọyi oylọ-basinamẹ to ojlẹ devo lẹ mẹ do nado dùnú hẹ tòkuẹ-ṣinyantọ po ylandonọ lẹ po.

Ṣigba, yẹyi he nọ saba yin nina jonọ lẹ ma yin nina Jesu. To ali Palestine tọn he nọ gọ́ na afínfín lẹ ji, afọ he to afọpa okànnọ mẹ bo bẹ afínfín lẹ nọ hùnmiyọ́n bo nọ kudiho, enẹwutu aṣa jonọ yíyí tọn de wẹ e yin nado yí osin do klọ afọ jonọ de tọn. Mẹde ma wà ehe na Jesu. Mọjanwẹ mẹde ma donùnùgo na ẹn nado dokuavọna ẹn, sọgbe hẹ aṣa yetọn. Aṣa yetọn wẹ e sọ yin nado kọ̀n amisisa do oda jonọ de tọn lẹ mẹ taidi ohia homẹdagbe po gbigbọ johẹmẹ po tọn. Ehe lọsu ma yin wiwà na Jesu. Enẹwutu, be yè sọgan dọ dọ yé yí jonọ etọn nugbonugbo ya?

Jonọ lọ lẹ jagla to tafo kọ̀n bo jẹ núdù ji. Dile yé to núdù, nawe he ma yin oylọ-basina de biọ abò lọ mẹ dẹẹdẹ. Ewọ yin “yinyọnẹn to tòdaho lọ mẹ nado yin ylandonọ.” (Luku 7:37) Nugbo wẹ dọ gbẹtọvi mapenọ lẹpo wẹ yin ylandonọ, ṣigba e taidi dọ gbẹzan fẹnnuwiwa tọn wẹ nawe ehe nọ zan, vlavo taidi galọtọ de. E na ko sè nuplọnmẹ Jesu tọn lẹ, gọna oylọ-basinamẹ etọn dọ ‘mẹhe yè doagban pinpẹn na lẹpo ni wá emi dè nado mọ kọfanamẹ.’ (Matiu 11:28, 29) Vlavo, na ohó po nuyiwa Jesu tọn lẹ po yinuwado nawe lọ ji wutu, e dín in mọ todin.

E gbọn Jesu godo bo wá jẹklo to afọ etọn lẹ kọ̀n. Dasin to kùnkùn sọn nukun etọn lẹ mẹ do afọ Jesu tọn lẹ go bọ e nọ yí oda etọn lẹ do súnsún yé sẹ̀. E to nùdo afọ etọn lẹ go magbọjẹ bo to amisisa owán gblingblinnọ he e hẹnwa sá na afọ etọn lẹ. Nuhe Simọni to mimọ ma vivi na ẹn bọ e dọ to ede mẹ dọmọ: “Eyin dawe ehe yin yẹwhegán de, e na ko yọ́n nawe he to alọ do e go lọ podọ mẹhe nkọ ewọ yin, dọ ylandonọ de wẹ.”—Luku 7:39.

Jesu doayi linlẹn Simọni tọn go bo dọmọ: “Simọni, yẹn tindo nude nado dọna we.” E gblọn dọmọ: “Mẹplọntọ, dọ ẹ!” Jesu zindonukọn dọmọ: “Dawe awe duahọ do akuẹ-yannamẹtọ de; dopo duahọ denali 500 tọn, ṣigba awetọ dù 50. To whenue yé ma tindo nudepope he yé na yí do suahọ ẹ, ewọ jona yé sọn ojlo mẹ wá. Enẹwutu, mẹnu to yé mẹ wẹ na yiwanna ẹn hugan?” Simọni na ko gblọn to aliho mọmọ tọn mẹ dọmọ: “Yẹn lẹndọ mẹhe ewọ jo susu na sọn ojlo mẹ wá lọ wẹ.”—Luku 7:40-43.

Jesu kọngbedopọ hẹ nuhe e dọ. Enẹgodo, e pọ́n nawe lọ bo dọna Simọni dọmọ: “Hiẹ mọ nawe ehe ya? Yẹn biọ owhé towe gbè; hiẹ ma na mi osin na afọ ṣie lẹ. Ṣigba, nawe ehe kùn dasin etọn lẹ do afọ ṣie lẹ go bo yí oda etọn do súnsún in sẹ̀. Hiẹ ma donùnùgo na mi; ṣigba nawe ehe, sọn whenue gbọ́n yẹn biọ họmẹ, e to nùdo afọ ṣie lẹ go magbọjẹ. Hiẹ ma sá amisisa do ota na mi, ṣigba nawe ehe sá amisisa owán gblingblinnọ do afọ ṣie lẹ.” Jesu mọdọ nawe lọ to didohia hezeheze dọ emi lẹnvọjọ sọn ahun mẹ wá sọn gbẹzan fẹnnuwiwa tọn emitọn mẹ. Enẹwutu, e dotana dọmọ: “Yẹn dọna we dọ, ylando etọn lẹ, dile yé tlẹ sù sọ, yé ko yin jijona ẹn. Enẹwutu wẹ ewọ nọ do owanyi susu hia, ṣigba ewọ he vude yin jijona, nọ do owanyi vude hia.”—Luku 7:44-47.

E ma yindọ Jesu to nukunpẹvi yí do pọ́n fẹnnuwiwa wẹ gba. Kakatimọ, e to awuvẹ mẹhe wà ylando sinsinyẹn bo wá dohia dọ e vẹna yé bọ yé lẹhlan Klisti dè nado mọ kọgbọ lẹ wẹ. Podọ, kọgbọ nankọ die nawe ehe na ko mọ to whenue Jesu dọmọ: “Ylando towe lẹ ko yin jijona we. . . . Yise towe ko whlẹn we gán; yì to jijọho mẹ.”—Luku 7:48, 50.