Apajlẹ Awe Gando Vẹngle lẹ Go

To tẹmpli mẹ, Jesu ṣẹṣẹ hẹn yẹwhenọgán lẹ gọna sunnu mẹho omẹ lọ lẹ tọn he diọavunnukunsọ ẹ bo kàn aṣẹpipa he ewọ yí do to onú lẹ wà sè lẹ biọ bẹwlu mẹ. Gblọndo Jesu tọn bọnùdo na yé. Enẹgodo, e na apajlẹ de he do mẹhe nkọ yewlẹ yin na taun tọn hia.

Jesu dọmọ: “Dawe de tindo ovi awe. E yì tintan dè, bo dọmọ, ‘Ovi, yì wazọ́n to vẹngle mẹ to egbé.’ Ewọ gblọn dọmọ, ‘Yẹn ma na yì,’ ṣigba to godo mẹ, e diọlinlẹn bo yì. E dọnsẹpọ awetọ lọ bo dọ nudopolọ. Ewọ gblọn dọmọ, ‘Otọ́, yẹn na yì,’ ṣigba e ma yì. Detẹ to yé omẹ awe lẹ mẹ wẹ wà ojlo otọ́ etọn tọn?” (Matiu 21:28-31) Gblọndo lọ họnwun—visunnu tintan lọ wẹ wà ojlo otọ́ etọn tọn to godo mẹ.

Enẹwutu, Jesu dọna nukundiọsọmẹtọ etọn lẹ dọmọ: “Nugbo wẹ yẹn dọna mì dọ tòkuẹ-ṣinyantọ lẹ po galọtọ lẹ po to nukọnjẹna mì biọ Ahọluduta Jiwheyẹwhe tọn mẹ.” To tintan whenu, tòkuẹ-ṣinyantọ lẹ po galọtọ lẹ po ma sẹ̀n Jiwheyẹwhe. Ṣigba taidi visunnu tintan lọ, yé wá lẹnvọjọ bo to sinsẹ̀n ẹn todin. To vogbingbọn mẹ, sinsẹ̀ngán lẹ taidi visunnu awetọ lọ bo nọ sọalọakọ́n dọ emi to Jiwheyẹwhe sẹ̀n, ṣigba nugbo lọ wẹ yindọ yé gboawupo nado wàmọ. Jesu dọmọ: “Johanu [Baptizitọ] wá mì dè bo do aliho dodowiwa tọn hia mì, ṣigba mì ma yí i sè. Etomọṣo, tòkuẹ-ṣinyantọ lẹ po galọtọ lẹ po yí i sè, podọ dile mìwlẹ tlẹ mọ ehe, mì ma diọlinlẹn to godo mẹ nado yí i sè gba.”—Matiu 21:31, 32.

Jesu na apajlẹ devo bọdo ehe go. To apajlẹ awetọ lọ mẹ, Jesu dohia dọ awugbopo sinsẹ̀ngán lẹ tọn nado sẹ̀n Jiwheyẹwhe ma yin vọdonanu poun gba. Na nugbo tọn, mẹylankan wẹ yé yin. Jesu dọmọ: “Dawe de do vẹngle de bo do pákàn lẹdo e bosọ kùn ovẹn-dò de nado nọ finyọ́n ovẹn bo gbá atọ̀họ̀ de do e mẹ; to whenẹnu, e haya ogle lọ na glesi lẹ, bo tọ́nwhẹ̀n yì tògodo. Todin, to osaa sisọ mẹ, e do afanumẹ de hlan glesi lọ lẹ dè nado mọ delẹ to sinsẹ́n vẹngle lọ tọn lẹ mẹ yí sọn glesi lọ lẹ si. Ṣigba, yé wle e bo hò e bosọ do e hlan asigbá-alọgbá. E sọ do afanumẹ devo hlan yé bọ yé linú ota na ewọ bo dowinyan ẹn. Enẹgodo, e do devo hlan bọ yé hù ewọ, podọ e do mẹsusu devo lẹ hlan bọ yé hò delẹ to yé mẹ bo hù devo lẹ.”—Malku 12:1-5.

Be mẹhe to todoaina Jesu lẹ na mọnukunnujẹ apajlẹ lọ mẹ ya? Yé sọgan ko flin hogbe whẹgbledomẹ tọn Isaia tọn lẹ dọmọ: “Vẹngle Jehovah awhànpa lẹ tọn lọ wẹ whédo Islaeli tọn; vẹngle he ewọ yiwanna lọ wẹ omẹ Juda tọn lẹ. E nọ to nukundo whẹdida dodo, ṣigba, pọ́n! whẹdida mawadodo kẹdẹ wẹ e nọ mọ.” (Isaia 5:7) Apajlẹ ehe nkọ wẹ Jesu yizan. Jehovah wẹ yin aigbanọ lọ bọ vẹngle lọ nọtena akọta Islaeli tọn, ehe Osẹ́n Jiwheyẹwhe tọn taidi pákàn de lẹdo bo nọ basi hihọ́na. Jehovah do yẹwhegán lẹ hlan nado plọnnu omẹ etọn lẹ bo gọalọna yé nado de sinsẹ́n dagbe lẹ tọ́n.

Ṣigba, “glesi” lọ lẹ sayana “afanumẹ” he yin didohlan yé lẹ bo hù yé. Jesu basi zẹẹmẹ dọmọ: “[Klunọ vẹngle lọ tọn] tindo omẹ dopo dogọ, yèdọ visunnu yiwanna etọn. To godo mẹ, e do ewọ hlan yé, bo dọ dọ, ‘Yé na na sisi visunnu ṣie.’ Ṣigba, glesi lọ lẹ dọ to yedelẹ ṣẹnṣẹn dọ, ‘Gudutọ lọ die. Mì wá, bo gbọ mí ni hù i bọ ogú lọ na lẹzun mítọn.’ Enẹwutu, yé wle e bo hù i.”—Malku 12:6-8.

Todin, Jesu kanse dọmọ: “Etẹwẹ klunọ vẹngle lọ tọn na wà?” (Malku 12:9) Sinsẹ̀ngán lọ lẹ gblọn dọmọ: “Na yé yin mẹylankan wutu, e na hẹn vasudo ylankan wá yé ji bo na haya vẹngle lọ na glesi devo lẹ, he na na ẹn sinsẹ́n etọn lẹ to whenuena ojlẹ yetọn sọ̀.”—Matiu 21:41.

Gbọnmọ dali, yé lá whẹdida sọta yede to mayọnẹn mẹ, na yelọsu tin to “glesi” he nọ nọ̀ “vẹngle” Jehovah tọn, enẹ wẹ akọta Islaeli tọn mẹ lẹ mẹ. Sinsẹ́n he Jehovah gbọn gbesisọ dali donukun sọn glesi enẹlẹ si bẹ yise tintindo to Visunnu etọn, yèdọ Mẹsia lọ mẹ hẹn. Jesu pọ́n sinsẹ̀ngán lọ lẹ tlọlọ bo dọmọ: “Be mìwlẹ ma ko hia adà Owe-wiwe tọn ehe gbede dọ: ‘Zannu he họ̀dotọ lẹ gbẹ́ dai, ehe lọ wẹ ko lẹzun zannu gángánsu họ̀gosu tọn. Jehovah dè wẹ e wá sọn, podọ e jiawu to nukun mítọn lẹ mẹ’?” (Malku 12:10, 11) Enẹgodo, Jesu hẹn nuhe dọ e te họnwun dọmọ: “Ehe wẹ zọ́n bọ yẹn dọna mì dọ, Ahọluduta Jiwheyẹwhe tọn na yin yíyí sọn mì si bo yin yíyí na akọta de he na de sinsẹ́n etọn lẹ tọ́n.”—Matiu 21:43.

Wekantọ lẹ po yẹwhenọgán lẹ po doayi e go dọ “emilẹ hodọ wẹ [Jesu] te to apajlẹ ehe mẹ.” (Luku 20:19) Todin, yé magbe sinsinyẹn nado hù i, yèdọ ewọ mẹhe yin “gudutọ” jlọjẹnọ lọ. Ṣigba, yé dibusi gbẹtọgun lọ lẹ, he nọ pọ́n Jesu hlan taidi yẹwhegán de, enẹwutu yé ma tẹnpọn nado hù i to ojlẹ enẹ mẹ.