Tenu-Núdùdù Oklunọ Tọn

Ojlẹ vude jẹnukọnna whèjai ehe, Jesu plọnnu apọsteli etọn lẹ gando whiwhẹ go gbọn afọ kiklọ na yé dali. Todin, e taidi dọ to núdùdù Juwayi tọn lọ godo, e yihodọ sọn dọdai Davidi tọn mẹ dọmọ: “Dawe he . . . tin to jijọho mẹ hẹ mi, mẹhe go yẹn dejido, bọ e nọ dù núdùdù ṣie, ko ze afọgbẹn etọn daga sọta mi.” Enẹgodo, e basi zẹẹmẹ dọmọ: “Dopo to mì mẹ na de mi hia.”—Psalm 41:9; Johanu 13:18, 21.

Apọsteli lọ lẹ pọ́n yede bọ dopodopo yetọn kanse dọmọ: “Oklunọ, e ma yin yẹn, kavi yẹn wẹ ya?” Juda Iskaliọti lọsu tlẹ kàn nudopolọ sè. Pita dotuhomẹna Johanu, he to apá na Jesu to tafo lọ kọ̀n, nado dindona mẹhe wẹ. Enẹwutu, Johanu dẹ́ hlan Jesu bo kanse dọmọ: “Oklunọ, mẹnu wẹ?”—Matiu 26:22; Johanu 13:25.

Jesu gblọn dọmọ: “Omẹ lọ he yẹn na ze nùdo akla tọn he yẹn yí do siọ agbán mẹ na lọ wẹ.” Jesu siọ akla de do agbánvla he to tafo lọ ji de mẹ bo dlẹn ẹn do Juda bosọ dọmọ: “Visunnu gbẹtọ tọn jei, kẹdẹdile yè ko kanwe etọn gando e go do, ṣigba dindọn hlan dawe enẹ he de Visunnu gbẹtọ tọn hia! E na ko pọnte hugan na dawe enẹ eyin e ma ko yin jiji.” (Johanu 13:26; Matiu 26:24) Enẹgodo, Satani biọ Juda mẹ. Dawe ehe, he ko yin hinhẹnflu, jo ede do todin nado wà ojlo Lẹgba tọn bo gbọnmọ dali lẹzun “visunnu vasudo tọn lọ.”—Johanu 6:64, 70; 12:4; 17:12.

Jesu dọna Juda dọmọ: “Nuhe hiẹ to bibasi, basi i po awuyiya po dogọ.” Apọsteli he pò lẹ lẹndọ nuhe Jesu to didọna Juda, mẹhe si apotin akuẹ tọn lọ te wẹ yindọ: “‘Họ̀ nuhe mí tindo nuhudo etọn lẹ na hùnwhẹ lọ,’ kavi dọ ewọ ni na nude wamọnọ lẹ.” (Johanu 13:27-30) Kakatimọ, Juda tọ́nyi nado de Jesu hia.

To whèjai núdùdù Juwayi tọn ehe dopolọ tọn, Jesu ze hùnwhẹ núdùdù yọyọ pete de tọn dai. E yí akla de bo hodẹ̀ pẹdido tọn bosọ wẹ́n ẹn bo yí i na apọsteli etọn lẹ nado dù. E dọmọ: “Ehe nọtena agbasa ṣie he na yin nina do ota mìtọn mẹ. Mì nọ wà ehe to oflin ṣie mẹ.” (Luku 22:19) Akla lọ yin zize gbọn apọsteli lọ lẹ ji bọ yé dù sọn e mẹ.

Todin, Jesu yí kọfo ovẹn tọn de bo hodẹ̀ pẹdido tọn do e ji bo ze e na yé. Dopodopo yetọn nù sọn kọfo lọ mẹ, ehe go Jesu dọ gando dọmọ: “Kọfo ehe nọtena alẹnu yọyọ lọ to dodonu ohùn ṣie tọn ji, he na yin kinkọndai do ota mìtọn mẹ.”—Luku 22:20.

Gbọnmọ dali, Jesu ze tito de dai na oflin okú etọn tọn, ehe hodotọ etọn lẹ dona nọ basi to whemẹwhemẹ to Nisan 14tọ gbè. E na nọ flin yé nuhe Jesu po Otọ́ etọn po ko wà nado hẹn ẹn yọnbasi na mẹhe do yise hia lẹ nado họ̀ngán sọn whẹgbledomẹ ylando po okú po tọn si. Podọ hugan nuhe Juwayi Ju lẹ tọn tlẹ wà, tito enẹ zinnudo tundote nujọnu tọn na gbẹtọvi he tindo yise lẹ ji.

Jesu dọ dọ ohùn emitọn “na yin kinkọndai do ota mẹsusu tọn mẹ na jona ylando lẹ tọn.” Apọsteli nugbonọ etọn lẹ po devi nugbonọ devo lẹ po tin to mẹsusu he na mọ jona mọnkọtọn yí lẹ mẹ. Yewlẹ wẹ na tin hẹ ẹ to Ahọluduta Otọ́ etọn tọn mẹ.—Matiu 26:28, 29.