“N’to Mẹdida lọ lẹ Pọ́n”

Ayihaawe ma tin dọ Ezekiẹli na ko nọ mọ boṣiọ pipà blibata oyìnsú gọna kinnikinni awànọ he tindo gbẹtọ-ta lẹ tọn he nọ yin tùntùnte to họ̀nmẹ po tẹmpli delẹ po nukọn taidi nuhọ́tọ. Boṣiọ mọnkọtọn lẹ gbayipe taun to Asilia po Babilọni hohowhenu tọn po. Taidi nupọntọ depope, e na ko nọ paṣa ẹ nado mọ nudida dobu enẹlẹ, he delẹ to yé mẹ nọ dite sọ mẹtlu 6. Ṣigba, mahopọnna lehe nudida enẹlẹ di nuhe dohuhlọn sọ, zannu pipà tata he ma tindo gbọfufu lẹ wẹ yé.

To vogbingbọn mẹ, nudida ẹnẹ he Ezekiẹli mọ to numimọ mẹ lẹ yin “mẹdida” kavi nudida gbẹ̀te lẹ. Vogbingbọn ayidego tọn nankọ die! Numimọ ehe yinuwado Ezekiẹli ji sọmọ bọ whla 11 plipli wẹ e donù “mẹdida” lọ lẹ go to homẹbibiọ dọdai etọn tọn mẹ. (Ezek. 1:5-22) Aliho he mẹ mẹdida ẹnẹ lọ lẹ nọ sẹtẹn do zẹnzẹn to ofìn Jiwheyẹwhe tọn glọ te dona ko hẹn Ezekiẹli nado mọ hezeheze dọ Jehovah wẹ to anadena nudida etọn lẹpo. To egbehe, numimọ enẹ dopolọ nọ hẹn mí nado mọ kiklo po huhlọn Jehovah tọn po gọna gigo nupojipetọ-yinyin etọn tọn hezeheze.—1 Otàn. 29:11.