Awhàngbigba Devo Na Kunnudetọ Jehovah Tọn lẹ to Grèce

TO 6 octobre 1995, whẹho sọgbe hẹ osẹ́n de he bẹ lizọnyizọnwatọ whenu-gigọ tọn awe heyin Kunnudetọ Jehovah Tọn lẹ tọn hẹn yin sisè gbọn hagbẹ atọ̀n whẹdatọ whẹdatẹn lọ tọn lẹ dali to Athènes. Whẹylọmẹ lọ wẹ omẹ-didiọ zun hagbẹ sinsẹ̀n yetọn tọn, podọ whẹsadokọnamẹ lọ ko yin kandai basina gbọn ponọgan de dali to whenuena Kunnudetọ lọ lẹ dla owhé etọn pọ́n godo.

Kanbiọ heyin kinkanse gbọn whẹ̀datọ he to nukunpedo whẹho lọ go dali lẹ dohia dọ ewọ tindo ojlo taun to azọ́n Kunnudetọ Jehovah Tọn lẹ tọn mẹ. Di apajlẹ, ewọ kanse dọmọ: “Nawẹ e ko dẹn sọ bọ mì do to azọ́n ehe wà? Nawẹ gbẹtọ lẹ nọ yinuwa hẹ mì to owhe lẹ gblamẹ gbọn? Gbeyiyi wunmẹ tẹlẹ wẹ ko tin na azọ́n mìtọn? Etẹwẹ mì nọ dọ hlan gbẹtọ lẹ to ohọ̀n yetọn ji?” Omẹ lẹpo he tin to whẹ̀dọhọsa lọ mẹ lẹ dotoai po sọwhiwhe po hlan kunnudide dagbe heyin nina lọ.

Nuhe paṣa Kunnudetọ lọ lẹ wẹ yindọ, whẹyidọtọ ahọlu tọn lọ tlẹ dọho dagbe dogbọn yé dali. E doayi e go to hodidọ tadona tọn etọn mẹ dọ “Kunnudetọ Jehovah Tọn lẹ tindo jlọjẹ sọgbe hẹ osẹ́n otò tọn e mayin nado tindo yise to Jiwheyẹwhe yetọn mẹ bo basi sinsẹ̀n hlan ẹn kẹdẹ gba, ṣigba nado sọ hẹn yise yetọn gbayipe sọn họndekọn jẹ họndekọn, to nọtẹn pọmẹ tọn lẹ ji, podọ to tòhomẹ-liho lẹ ji, etlẹ yin mimá owe yetọn lẹ vọnu eyin yé jlo do mọ.” Whẹyidọtọ ahọlu tọn lọ donu dide whẹjonamẹ tọn voovo lẹ go heyin zinzinjẹgbonu gbọn whẹdatẹn lẹ po Wedegbẹ́ Tohọluduta tọn lẹ po dali. Ewọ sọ dlẹnalọ dohlan whẹho Kokkinakis v. Grèce tọn, ehe dide etọn yin bibasi na dagbe Kunnudetọ Jehovah Tọn lẹ tọn gbọn Whẹdatẹn Jlọjẹ Gbẹtọvi Europe Tọn dali.a “Jaale doayi e go,” wẹ whẹyidọtọ ahọlu tọn lọ gbẹnunamẹ, “dọ Grèce tlẹ sú whẹhọ to whẹho ehe mẹ. Enẹwutu mí dona payi to whenuena mí yin yiylọ nado dawhẹ whẹho mọnkọtọn lẹ tọn. Na nugbo tọn, whẹho ehelẹ ma dona ko yin hinhẹn wá whẹdatẹn mẹ to tintan whenu gba.”

Bọdo hodidọ whẹyidọtọ ahọlu tọn go, onú susu ma pò na whẹyidọtọ Kunnudetọ lẹ tọn nado dọ ba. Etomọṣo, e yí dotẹnmẹ hundote lọ zan nado zinnudeji dọ osẹ́n omẹ-didiọ zun hagbẹ sinsẹ̀n mẹtọn tọn ma sọgbe hẹ osẹ́n otò tọn gba podọ dọ e ko to aliglọnna Grèce to obá lẹdo aihọn pe tọn de mẹ.

Whẹ̀datọ he to nukunpedo whẹho lọ go yìnnukunpọn whẹ̀datọ awe devo lẹ poun, podọ mẹmẹsunnu lọ po mẹmẹyọnnu lọ po to pọmẹ yin whẹjona. Whẹdidọ, he dẹn na ganhiho dopo po nukunwhiwhe ao po, yin awhàngbigba na oyin Jehovah tọn po omẹ etọn lẹ po.

Ehe yin whẹjonamẹ ẹnẹtọ gando whẹho omẹ-didiọ zun hagbẹ sinsẹ̀n devo tọn go to whenuena whẹho Kokkinakis tọn ko yin sisè godo gbọn Whẹdatẹn Jlọjẹ Gbẹtọvi Europe Tọn dali. Kunnudetọ Jehovah Tọn lẹ to Grèce jaya dọ nuhahun lẹ to pọmẹ hẹ yẹwhehodidọ yetọn ko diblayin nuhe matin ba todin podọ dọ e yin nuhe yọnbasi nado zindonukọn po azọ́n lọ po matin aliglọnnamẹnu.

[Nudọnamẹ Odò Tọn]