Azọ́n de He “Ma Sọgan Gboawupo Nado Hẹn Sisi Wá”

APỌSTELI Pita dotuhomẹna Klistiani hatọ etọn lẹ dọmọ: “Na owalọ mìtọn ni yin dagbe to kosi lẹ ṣẹnṣẹn; dọ, le yé to hodọ do mì go di ylanwatọ, gbọn azọ́n dagbe mìtọn dali he yé na to pinpọ́n, na yé nido pagigona Jiwheyẹwhe.” (1 Pita 2:12) Na owhe susu lẹ Kunnudetọ Jehovah tọn lẹ to Italie ko basi dohia walọyizan dagbe mọnkọtọn tọn to gbangba. To gbigbọ ayinamẹ Jesu tọn nado ‘demìselu to ohọta lẹ’ mẹ, yé basi nuwiwa Klistiani tọn yetọn lẹpo to gbangba, to gigọ́mẹ to nukun gbẹtọ lẹ tọn mẹ. (Matiu 10:27; Johanu 18:20) Po gbesisọ po, to whenuena whẹyidọtọ Italie tọn de po yẹwhenọ de po zín whẹsadokọnamẹ tọ́n dọ Kunnudetọ Jehovah tọn lẹ yin “hagbẹ klandovo sinsẹ̀n-ahizinọ de” bo hia yé dogọ “ogbẹ́ aṣli tọn lẹ he nọ doyẹklọ gbẹtọ lẹ,” Kunnudetọ lẹ basi dide nado yinuwa sọgbe hẹ osẹ́n na hodidọ whẹsadokọnamẹ tọn lẹ wutu.

To owhẹ̀ nukọn wiwá tintan lọ mẹ, whẹdatẹn lọ dotana dọ whẹyidọtọ lọ po yẹwhenọ lọ po ma gbàsẹ́n depope gba. Ṣigba, to 17 juillet 1997, Whẹdatẹn Whẹvọylọ Venise tọn zẹhù do nudide tintan whẹdatẹn tintan lọ tọn ji, bo gblewhẹdo whẹjijọ-dintọ awe lẹ. Whẹdatẹn Whẹvọylọ tọn lọ dọmọ: “Hosọ awe heyin zinzinjẹgbonu lẹ bẹ hodidọ po hodidọ agbòte lẹ po hẹn he na taun tọn penugo nado hẹn oyín dagbe hodotọ sinsẹ̀n ‘Kunnudetọ Jehovah tọn lẹ’ tọn gble. E họnwun dọ yanwle hosọ lọ lẹ tọn wẹ nado de hodotọ etọn lẹ hia nado yin wangbẹna gbọn gbẹtọ lẹ dali.” Whẹdatẹn lọ dọ dọ hosọ lọ lẹ “ma ze nuyiwa sọgbehẹ osẹ́n dai na nuhe dù linlin he sọgbe po hodọdomẹgo tọn po gba.” Whẹdatẹn lọ dakuẹ na whẹsadokọnamẹtọ awe lọ lẹ bosọ degbe na yé nado suahọ whẹdatẹn tọn lẹpo, gọna akuẹzinzan Kunnudetọ lẹ tọn na whẹho awe lọ lẹ.

To nukinkan whẹdida tọn etọn mẹ, Whẹdatẹn Whẹvọylọ Venise tọn basi zẹẹmẹ dọmọ: “Gbọn jlẹkajininọ po hihọ́-basina jlọjẹ lẹpo heyin ninamẹ gbọn Osẹ́ndoai [omẹ Italie] tọn lẹ po dali kẹdẹ wẹ e yọnbasi nado glọnalina wunmẹ agọjẹdonugo po nuwiwa sinsẹ̀nnọ lẹ tọn po.” Nudide lọ yigbe dọ nuwiwa Kunnudetọ Jehovah tọn lẹ tọn mayin aṣli kavi sinsẹ̀n-ahizinọ lẹ gba. “Nado dọ dọ Kunnudetọ lẹ yin apadewhe ogbẹ́ aṣli tọn lẹ,” whẹdatẹn lọ doayi e go dọ, “e ma tlẹ na sisi nujinọtedo nugbo whenuho tọn, to whenuena e yindọ sinsẹ̀n heyin zizedai lọ tin to todaho susu mẹ gọna gbigbayipe nuyiwa mẹdiọzun-sinsẹ̀nnọ tọn he to yinyin bibasi gbọn hagbẹ etọn lẹ dali, na titengbe tọn to dimanche po gbọjẹzan devo lẹ po gbè, yin yinyọnẹn ganji podọ ma sọgan gboawupo nado fọ́n sisi dote na vivẹnu heyin dido lẹ gba, yèdọ mahopọnna nuhe mẹde sọgan lẹn gando sinsẹ̀n-nuplọnmẹ heyin yẹwheho etọn dọ go.” Gbọnmọ dali, kandai zohunhun yẹwhehodidọ po walọyizan dagbe Kunnudetọ Jehovah tọn lẹ tọn po to Italie ko gọalọ nado doalọtena nuvẹun sọta yé.—Matiu 5:14-16; 1 Pita 2:15.