Kanbiọ lẹ sọn Wehiatọ lẹ Dè

Isaia weta 53 bẹ dọdai diyin de hẹn gando Mẹssia go. Wefọ 10 dọmọ: “E [hùnhomẹ na Jehovah, nado gbleawu na ẹn, e hẹn ẹn jẹazọ̀n, NW].” Etẹwẹ ehe zẹẹmẹdo?

E bọawu nado mọ nuhewutu kanbiọ de sọgan fọ́ndote gando Isaia 53:10 go. Klistiani nugbo lẹ ma nọ lẹndọ Jiwheyẹwhe awuvẹmẹtọ po lẹblanunọ mítọn po na tindo homẹhunhun to awugbigblena kavi hinhẹn mẹdepope nado jẹazọ̀n mẹ gba. Biblu na mí dodonu lọ na jidide dọ Jiwheyẹwhe ma nọ hùnhomẹ to yasisana homẹvọnọ lẹ mẹ gba. (Deutelonomi 32:4; Jẹlemia 7:30, 31) To owhe kanweko lẹ gblamẹ Jehovah to nujijọ de mẹ sọgan ko jo dotẹnmẹ do na yajiji na whẹwhinwhẹ́n lẹ he tin to gbesisọmẹ hẹ nuyọnẹn po owanyi etọn po. Ṣigba ewọ na jide tọn ma hẹn Visunnu yiwanna etọn, Jesu, nado jiya gba. Enẹwutu, etẹ dọ wẹ wefọ ehe te na taun tọn?

Eyọn, mí sọgan yin alọgọna nado mọnukunnujẹ zẹẹmẹ lọ mẹ eyin mí gbadopọnna wefọ lọ to blebu etọn mẹ, bo doayi whlaawe he hogbe lọ ‘hùnhomẹ’ wá aimẹ te go. Isaia 53:10 hia dọmọ: “E [hùnhomẹ na Jehovah, nado gbleawu na ẹn, e hẹn ẹn jẹazọ̀n, NW ]: whenuena hiẹ na yí [alindọn] etọn do sanvọ́ na ylando, e na mọ okún etọn, e na hẹn azán etọn dite, [homẹhun Jehovah] tọn nasọ di to alọ etọn mẹ.”

Bladopọ owẹ̀n Biblu tọn dohia dọ ‘homẹhun Jehovah tọn,’ heyin nùdego to vivọnu wefọ lọ tọn, sinai do lẹndai etọn hinhẹndi gbọn Ahọluduta lọ gblamẹ ji. Ehe wiwà Jehovah tọn na suwhẹna nupojipetọ-yinyin etọn bo nasọ hẹn ẹn yọnbasi nado de ylando he yè dugu etọn sẹ sọn gbẹtọvi tonusetọ lẹ ji—yèdọ ylando mítọn lẹ. (1 Otannugbo lẹ 29:11; Psalm 83:18; Owalọ lẹ 4:24; Heblu lẹ 2:14, 15; 1 Johanu 3:8) Họ̀nhungàn lọ hlan ehe lẹpo wẹ yindọ Visunnu Jiwheyẹwhe tọn dona wá nado lẹzun gbẹtọvi de bo wleawuna avọ́sinsan ofligọ tọn lọ. Dile mí yọnẹn do, Jesu jiya to nujijọ ehe lọ mẹ. Biblu dọna mí dọ ewọ “plọn tonusise gbọn onú he mẹ e jiya te.” Enẹwutu Jesu mọaleyi sọn yajiji enẹ mẹ.—Heblu lẹ 5:7-9.

Jesu yọnẹn jẹnukọn dọ aliho nuyiwa tọn he yiaga he emi na ze na bẹ awufiẹsa hẹn. Enẹ họnwun sọn hogbe etọn heyin kinkàndai to Johanu 12:23, 24 lẹ mẹ, fie mí hia te dọmọ: “Ojlẹ lọ wá, na yè nido pagigona Ovi [gbẹtọ] tọn. Nugbo, nugbo, wẹ yẹn dọ hlan mì, adavo olikun dopo flẹ biọ aigba mẹ bosọ kú, e nọte na ede dopokẹdẹ; ṣigba eyin e kú, e hẹn sinsẹ́n susu.” Mọwẹ, Jesu yọnẹn dọ emi dona hẹn tenọgli emitọn go yèdọ jẹ obá oya okú tọn jiji mẹ. Kandai lọ zindonukọn dọmọ: Dinvie wẹ yè to tuklado alindọn ṣie: be etẹwẹ yẹn na dọ? Otọ́, whlẹn mi gán sọn ojlẹ he mẹ: ṣigba na ehe lọ tọn wutu wẹ yẹn wá jẹ ojlẹ he. Otọ́, pagigona oyín towe. Enẹwutu ogbè de sọn olọn mẹ wá, dọmọ, Yẹn ko pagigona ẹn, bo nasọ vọ́ gigopana ẹn.”—Johanu 12:27, 28; Matiu 26:38, 39.

To lẹdo hodidọ ehe tọn mẹ wẹ mí sọgan mọnukunnujẹ Isaia 53:10 mẹ te. Jehovah yọnẹn ganji dọ numimọ Visunnu etọn tọn na bẹ yinyin awugblena to linlẹn de mẹ hẹn. Ṣogan to dagbe gigonọ po dehe gbloada po he na dekọtọn sọn e mẹ tintindo to ayiha mẹ, Jehovah tindo homẹhun to nuhe Jesu dona tindo numimọ etọn lọ mẹ. To linlẹn enẹ mẹ Jehovah ‘tindo homẹhunhun to awugblenamẹ mẹ,’ kavi to awugbigblena Mẹssia lọ mẹ. Podọ Jesu hùnhomẹ to nuhe ewọ sọgan wà bosọ wadotana lẹ mẹ. Na nugbo tọn, dile Isaia 53:10 dotana do, ‘to alọ etọn mẹ wẹ nuhe hùnhomẹ na Jehovah lẹ tindo kọdetọn dagbe te.’