Jijọho Na Owhe Fọtọ́n Yọyọ lọ Ya?

OWHE Akọjọpli tọn na Awuwiwlena Jijọho yin didoai to Paris po New York po to 14 septembre 1999. Ehe yin lilá na owhe 2000 gbọn Pipli Paa Plidopọ Akọta lẹ tọn dali. Federico Mayor, heyin anadenanutọ daho UNESCO tọn dai tọn, basi ovẹvivẹ nujọnu tọn de “nado wleawuna pipli lẹdo globu pé tọn de na awuwiwlena jijọho po alọdidotena danuwiwa po.”

UNESCO tindo hogbe anademẹ tọn de dọ “to whenuena e yindọ ayiha gbẹtọ lẹ tọn mẹ wẹ awhàn lẹ nọ bẹsọn, ayiha gbẹtọ lẹ tọn mẹ wẹ jijọho dindin dona yin awuwlena te.” To kọndopọmẹ hẹ ehe, pipli lọ lẹn nado ze awuwiwlena jijọho daga gbọn “wepinplọn, hodọdopọ po gbekọndopọ po” gblamẹ. Mẹdaho Mayor basi zẹẹmẹ dọ e ma ko pé “nado yin jijọhonọ gba, e ma tlẹ yin nado yin agọjẹdo-awhàntọ lẹ poun gba, ṣigba nado yin jijọho-dintọ lẹ.”

E blawu dọ, owhe 2000 dẹn do yinyin jijọho tọn. Whenuho egbezangbe tọn​—he bẹ nujijọ owhe 2000 tọn lẹ hẹn​—ko zinnudo nugomape gbẹtọ tọn nado glọnalina awhàn po danuwiwa po ji mahopọnna vivẹnudido ahundoponọ lẹ to adà awetọ mẹ.

Ṣigba, e jẹna ayidego dọ jijọho yin kinkọndopọ hẹ wepinplọn na nugbo tọn. To nudi owhe 2 700 delẹ die wayi, yẹwhegán Isaia dọ dọdai dọmọ: “Ovi towe lẹpo nasọ yin pinplọn sọn OKLUNỌ dè, jijọho ovi towe lẹ tọn na sù.” (Isaia 54:​13, wekun flinflin lẹ yin mítọn.) Yẹwhegán dopolọ mọ ojlẹ de hlan nukọn to whenuena gbẹtọ akọta lẹpo tọn lẹ na lìn wá sinsẹ̀n-bibasi wiwe-ṣeke Jehovah Jiwheyẹwhe tọn mẹ nado plọnnu gando aliho Etọn lẹ go. Etẹwẹ na yin kọdetọn lọ? “Yé na yí ohí yetọn do tùn agbògọdọẹ: akọta ma to na ze ohí do akọta ji ba, mọ yé ma to na plọn awhànfun ba.” (Isaia 2:2-4, wekun flinflin lẹ yin mítọn.) To gbesisọmẹ hẹ dọdai enẹ, Kunnudetọ Jehovah tọn lẹ to mahẹ tindo to azọ́n wepinplọnmẹ lẹdo aihọn pé tọn de mẹ he ko gọalọna livi susu lẹ nado duto wangbẹnamẹ akọta tọn po sinmẹ agbasa tọn lẹ po ji he nọ yin asisa suhugan awhàn lẹ tọn.

To agọgbọnẹnmẹ awhàn lẹ ma na tin ba to Ahọluduta Jiwheyẹwhe tọn, he na hẹn jijọho po hihọ́ dẹn-to-aimẹ po wá aigba ji mẹ. (Psalm 72:7; Daniẹli 2:​44) To whenẹnu wẹ, hogbe psalm-kàntọ lọ tọn lẹ na yin hinhẹndi dọmọ: “Mì wá pọ́n azọ́n OKLUNỌ tọn, hẹngble he e ko basi to aigba ji. E hẹn awhàn gbọ̀ kakajẹ aigba podo.”—Psalm 46:8, 9.