Be Sinsẹ̀n Na Hẹn Jijọho Aihọn Tọn Wá Ya?

SỌN 28 août jẹ 31 août 2000, hugan nukunmọnu 500 sọn otò 73 mẹ plidopọ to Tòdaho New York tọn mẹ. Yé pli dopọ to Plidopọ Akọta lẹ tọn tẹnmẹ na “Plidopọ Jijọho Owhe Fọtọ́n Aihọn tọn na Sinsẹ̀nnọ lẹ po Nukọntọ Gbigbọmẹ tọn lẹ Po.” Nukọntọ lọ lẹ​—susu yetọn ṣinyọ́n yẹwhenọ-gbákún lẹ, do tewu whanpẹnọ he tindo sinmẹ voovo lẹ, gbákún he tindo hẹfun, kavi tewu gaa yuu lẹ​—ze afọ sinsẹ̀n susugege lẹ tọn dai. To ehelẹ mẹ wẹ Baha’i, sinsẹ̀n Buddha tọn, sinsẹ̀n Hindu tọn, sinsẹ̀n Jaini tọn, sinsẹ̀n Ju lẹ tọn, sinsẹ̀n Malenu lẹ tọn, sinsẹ̀n Mẹylọhodotọklisti tọn, sinsẹ̀n Pẹlsianu lẹ tọn, sinsẹ̀n Sikhi tọn, Shinto, po sinsẹ̀n Taoïsme tọn po tin te.

Afọzedaitọ lẹ pli to Plidopọ Akọta lẹ tọn tẹnmẹ na azán awe tintan heyin opli azán-ẹnẹ tọn. Ṣigba, opli lọ mayin titobasina kavi yin nukunpedego to akuẹ-liho gbọn Plidopọ Akọta lẹ tọn dali gba ṣigba gbọn titobasinanu voovo lẹ dali. Etomọṣo, Plidopọ Akọta lẹ tọn po nukọntọ sinsẹ̀n tọn lẹ po dọho gando nujọnu-yinyin azọ́nwiwa to kọndopọmẹ nado doalọtena ohẹ́n, akọ̀ ṣinṣinyan, nuhahun lẹdo tọn lẹ, awhàn, po awhànfunnu he nọ và omẹ susugege sudo lẹ po go.

Afọzedaitọ lẹ doalọ owe de mẹ he hosọ etọn yin “Gbemima na Jijọho Lẹdo Aihọn Pé.” Dile e to gbeyi dọ danuwiwa po awhàn po “nọ yin hinhẹn gbayipe to oyín sinsẹ̀n tọn mẹ to whedelẹnu,” owe lọ lá dọ mẹhe doalọ e mẹ lẹ na “kọngbedopọ hẹ Plidopọ Akọta lẹ tọn . . . to afọdidona jijọho mẹ.” Ṣigba, gbemima tangan depope matin he do lehe ehe sọgan yin wiwà do hia.

To azán awetọ gbè, Bawa Jain, heyin wekantọ daho opli lọ tọn, dotana ayidonugo bẹjẹeji tọn etọn gbọn zẹẹmẹ bibasi dali dọ owhe delẹ jẹnukọn emi ko doayi yẹdide de go to Plidopọ Akọta lẹ tọn. Yẹdide lọ do sunnu he dite hugan ohọ̀ wekantẹn Plidopọ Akọta lẹ tọn tọn de hia. E to ohọ̀ lọ húhú taidi dọ ohọ̀n de wẹ eyin nkọtọn. To oglọ yẹdide lọ tọn wẹ zẹẹmẹ yẹdide tọn tin te he dọmọ: “Ahọvi Jijọho tọn.” Mẹdaho Jain dọmọ: “[Yẹdide lọ] tindo nuyiwadomẹji he siso de do ojie to tlolo he yẹn mọ ẹn. Yẹn kàn nuhe [e] zẹẹmẹdo biọ gbẹtọ voovo lẹ. Yẹn lẹndọ yẹn ko mọ gblọndo lọ to egbehe. Piplidopọ mìmẹpo tọn, yèdọ nukọntọ gbigbọmẹ po sinsẹ̀n tọn lẹ po heyin aihọn tọn, dohia mi dọ [ehe] wẹ yin ahọvi jijọho tọn he to ohọ̀n Plidopọ Akọta lẹ tọn húhú.”

Biblu ze pọndohlan he gbọnvo de donukọnnamẹ. E dohia dọ Ahọvi Jijọho tọn wẹ Jesu Klisti. E na hẹn jijọho lẹdo aihọn pé wá, e mayin gbọn vivẹnudido nukọntọ tonudidọ aihọn tọn kavi sinsẹ̀n tọn lẹ dali gba, ṣigba gbọn Ahọluduta Jiwheyẹwhe tọn gblamẹ. Ahọluduta ehe​—yèdọ gandudu olọn mẹ tọn Jiwheyẹwhe tọn​—wẹ na gbọn kọdetọn dagbe dali kọ̀n gbẹtọvi tonusetọ lẹ dopọ bo nasọ hẹn ojlo Jiwheyẹwhe tọn yin wiwà to aigba ji.​—Isaia 9:6; Matiu 6:9, 10.