‘Mì Dopẹna Kunnudetọ Jehovah Tọn lẹ Na Mẹdekannujẹ Sinsẹ̀n Tọn’
“WHẸPO hiẹ nado gbẹ́ nado dotoaina Kunnudetọ Jehovah tọn de,” wẹ hosọ de dọ to linlinwe USA Today mẹ, “yì agbọ́ji whẹ́ bo lẹnnupọndo homẹkẹn winyandomẹ tọn he yé jiya etọn to madẹnmẹ, po adà daho he yé ko yiwà nado hẹn Vọjlado Tintan mẹdekannujẹ tọn he mímẹpo to víví etọn dù lọ wá po ji.” Kunnudetọ Jehovah tọn lẹ yin homẹkẹndo to États-Unis to owhe 1940 tọn lẹpo gblamẹ, na gbigbẹ́ nado dọnudo asia, po onú devo lẹ po wutu.—Eksọdusi 20:4, 5.
Owhẹ̀ 30 gando Kunnudetọ Jehovah tọn lẹ go wẹ yin hinhẹnwa Whẹdatẹn Daho Hugan États-Unis tọn to owhe atọ́n gblamẹ bẹsọn 1938 jẹ 1943. Hosọ lọ dọmọ: “Kunnudetọ lẹ fọ́n whẹho tangan he gando Vọjlado Tintan go lẹ dote pludopludo sọmọ bọ Whẹdatọ Daho Harlan Fiske Stone wlan dọ, ‘Kunnudetọ Jehovah tọn lọ lẹ dona tindo ahọsumẹ de to pọndohlanmẹ na alọgọ he yé basi nado didẹ̀ nuhahun sọgbe hẹ osẹ́n mẹdekannujẹ gbẹtọ paa lẹ tọn.’ ”
Enẹwutu, sẹpọ vivọnu etọn hosọ lọ dọmọ: “Sinsẹ̀n lẹpo wẹ dona dopẹna Kunnudetọ Jehovah tọn lẹ na nukọnyiyi he yé hẹnwa mẹdekannujẹ [sinsẹ̀n] tọn mẹ wutu.”
[Yẹdide/Asisa Yẹdide Tọn to weda 32]
Yẹdide dodonu tọn, họgbigbá: Fọto heyin dide gbọn Josh Mathes dali, Collection of the Supreme Court of the United States; amiyọnwhé to odò, whẹdatọ lẹ: Collection of the Supreme Court of the United States