Be Hiẹ Flin Ya?

Be a ko duvivi hihia zinjẹgbonu agọe Atọ̀họ̀-Nuhihọ́ Lọ Tọn lẹ tọn ya? Eyọn, pọ́n eyin a sọgan na gblọndo na kanbiọ he bọdego helẹ:

• Etẹwẹ mẹtọnhopọn yin, podọ etẹwutu Klistiani lẹ dona wleawuna ẹn?

E yin nugopipe nado ze míde do otẹn mẹdevo tọn mẹ, taidi numọtolanmẹ awufiẹsa mẹdevo tọn tintindo to ahun mítọn mẹ. Klistiani lẹ yin tulina nado nọ do ‘numọtolanmẹ hatọ tọn, owanyi mẹmẹsunnu tọn, po awuvẹmẹ po’ hia. (1 Pita 3:8) Jehovah ze apajlẹ dai na mí nado hodo to mẹtọnhopọn didohia mẹ. (Psalm 103:14; Zekalia 2:8) Mí sọgan na huhlọn numọtolanmẹ mítọn to whẹho ehe mẹ gbọn todidoai, ayididonugo, po nulinlẹnpọn po dali.—15/4, weda 24-6.

• Nado tindo ayajẹ nugbo, etẹwutu azọ̀nhẹngbọ gbigbọmẹ tọn dona wá whẹpo pọngbọ mlẹnmlẹn ni wá na oblọ agbasa go tọn lẹ?

Susu mẹhe tin to gángán to agbasa-liho lẹ tọn ma tindo ayajẹ gba, yé sọ nọ tindo nuhahun he sẹhundaga lẹ. To vogbingbọn mẹ, susu Klistiani he tindo oblọ agbasa go tọn to egbehe lẹ tọn to Jehovah sẹ̀n po ayajẹ po. Mẹhe to alemọyi sọn azọ̀nhẹngbọ gbigbọmẹ tọn mẹ lẹ na tindo numimọ oblọ agbasa go tọn lẹ didesẹ tọn to aihọn yọyọ lọ mẹ.—1/5, weda 6-7.

• Etẹwutu Heblu lẹ 12:16 ze Esau do hukan dopolọ ji hẹ galọtọ de?

Kandai Biblu tọn lọ dohia dọ Esau do ninọmẹ apọ̀nmẹ tọn de hia he ze ale afọdopolọji tọn lẹ do otẹn tintan mẹ bosọ vlẹ onú wiwe lẹ. To egbehe, eyin mẹde dike ninọmẹ apọ̀nmẹ tọn enẹ ni wleawu to ewọ mẹ, e sọgan plan ẹn biọ ylando sinsinyẹn mẹ, taidi galilọ.—1/5, weda 10-11.

• Mẹnu wẹ Tertullien, podọ etẹwẹ e diyin na?

Wekantọ po sinsẹ̀n-nuplọnmẹtọ de po wẹ e yin he nọgbẹ̀ to owhe kanweko awetọ po atọ̀ntọ W.M. po. E diyin na awuwiwlena owe susu he yiavunlọ na sinsẹ̀n Klistiani tọn. Dile e to avunlọyiyi etọn lẹ zedai, e hẹn linlẹn po nuyiwa tamẹnuplọnmẹ tọn he ze dodonu dai na sinsẹ̀n-nuplọnmẹ gblezọn lẹ, taidi Atọ̀n-to-dopomẹ wá aimẹ.—15/5, weda 29-31.

• Naegbọn nuvikun gududu tọn lẹ ma sọgan yin whẹgbledo pete na awutu, jijọ, po okú gbẹtọvi tọn lẹ po?

Lẹnunnuyọnẹntọ lẹ ko wá tadona kọ̀n dọ nuvikun gududu tọn lẹ nọ hẹn awutu gbẹtọvi tọn voovo lẹ wá, podọ mẹdelẹ yise dọ nuvikun mítọn lẹ wẹ nọ wleawuna walọyizan mítọn lẹ. Ṣogan, Biblu na mí wuntuntun do bẹjẹeji gbẹtọvi tọn ji, gọna lehe ylando po mape po wá jẹ yasana gbẹtọvi do ji. Dile etlẹ yindọ nuvikun lẹ sọgan yí adà de wà to awuwiwlena gbẹtọ-yinyin mítọn lẹ mẹ, mape po lẹdo mítọn po sọ nọ yí adà titengbe lẹ wà ga.—1/6, weda 9-11.

• Nawẹ apadewhe papyrus tọn heyin mimọ to Oxyrhynchos, to Egipti tá hinhọ́n do yizan yinkọ Jiwheyẹwhe tọn ji gbọn?

Apadewhe hogbe Job 42:11, 12 tọn ehe sọn Septante Glẹki tọn mẹ bẹ Tetlaglamu (wekun ẹnẹ heyin yinkọ Jiwheyẹwhe tọn to Heblugbe mẹ) hẹn. Ehe yin kunnudenu dogọ dọ yinkọ Jiwheyẹwhe tọn to Heblugbe mẹ sọawuhia to Septante, he mẹhe wlan Owe-wiwe Klistiani Glẹki tọn lẹ nọ saba dlẹnalọdo lọ mẹ.—1/6, weda 30.

• Aihundida lanmẹyiya egbezangbe tọn tẹlẹ go wẹ aihundida avùnhiho jẹ kúdonu, gọna kanlinjọmẹ tọn Ahọluigba Lomu tọn ko yin yiyijlẹdo?

Nudohia agọe tọn de to Aihundatẹn Lomu tọn mẹ, to Italie, do nudopolọ-yinyin egbezangbe tọn lẹ hia gbọn yíyí video he do avùnhiho hẹ oyìn, akotokún-yìnyìn, wezunhinhọ̀n mọto po zòkẹkẹ po tọn lẹ, gọna avùnhiho nupọntọ lẹ tọn to aihundida lanmẹyiya egbezangbe tọn devo lẹ tẹnmẹ hia dali. Klistiani fliflimẹ tọn lẹ yọnẹn dọ Jehovah gbẹwanna danuwiwa po danuwatọ lẹ po, podọ Klistiani lẹ dona wàmọ to egbehe ga. (Psalm 11:5)—15/6, weda 29.

• Dile mí to tintẹnpọn nado lẹzun mẹplọntọ kọdetọn dagbenọ lẹ, etẹwẹ mí sọgan plọn sọn apajlẹ Ẹzla tọn mẹ?

Ẹzla 7:10 zinnudo onú ẹnẹ he Ẹzla wà, he mílọsu sọgan tẹnpọn nado wà lẹ ji. E dọmọ: ‘Ẹzla ko [1] wleawuna ayiha etọn [2] nado to osẹ́n Jehovah tọn dín, podọ [3] nado nọ basi i, podọ [4] nado nọ plọnmẹ osẹ́ndoai lẹ po whẹdida dodo po to Islaeli mẹ.’—1/7, weda 20.

• Nuwiwa voovo awe tẹlẹ whenu wẹ e sọgbe na Klistiani yọnnu de nado ṣinyọnnudo ota te?

Dopo yin to kọndopọmẹ hẹ ninọmẹ whégbè tọn lẹ. Nuṣinyọndo ota etọn nọ dohia dọ e yọnẹn dọ asu emitọn wẹ tindo azọngban lọ nado deanana dẹ̀hiho po nuplọnmẹ Biblu tọn lẹ po. Awetọ wẹ nuwiwa agun tọn lẹ, fie e nọ dohia te dọ emi yọnẹn dọ sunnu he ko yí baptẹm lẹ wẹ Owe-wiwe na aṣẹ nado plọnmẹ bo yin nukọntọ. (1 Kọlintinu lẹ 11:3-10)—15/7, weda 26-7.

• Naegbọn Klistiani lẹ yọnẹn dọ yoga mayin aihundida lanmẹyiya tọn de poun bosọ yin owùnu?

Yanwle yoga tọn taidi anademẹnu de wẹ nado hẹn mẹde wá kọndopọmẹ hẹ gbigbọ he hugan jọwamọ tọn de. Jẹagọdo anademẹ Jiwheyẹwhe tọn, yoga nọ bẹ nugopipe nulẹnpọn tọn hinhẹndote sọn ojlo mẹ wá hẹn. (Lomunu lẹ 12:1, 2) Yoga sọgan hùn mí do nùvo hlan owù afinyọnnuwiwa tọn lẹ. (Deutelonomi 18:10, 11)—1/8, weda 20-2.