Be Odẹ̀ Towe lẹ Sọgan Diọ Ninọmẹ de Ya?

MẸNU wẹ ma ko pehẹ ninọmẹ sinsinyẹn he zẹ̀ huhlọn etọn go de pọ́n to mí mẹ? Biblu dohia dọ apọsteli Paulu yọnẹn dọ odẹ̀ sọgan diọ kọdetọn ninọmẹ sinsinyẹn mọnkọtọn lẹ tọn.

To whenuena Paulu yin zizedo ganmẹ to Lomu matin whẹjijọ depope, e biọ to yisenọ hatọ etọn lẹ si nado nọ hodẹ̀ na ẹn, bo yidogọ dọ: “Yẹn kúkú gbọ bo vẹ̀ mì nado nọ basi ehe, na yè nido yawu de mì dote na mì.” (Heblu lẹ 13:18, 19) To nujijọ devo whenu, Paulu do jidide hia dọ Jiwheyẹwhe na sè odẹ̀ yetọn lẹ bọ ewọ nado yawu yin tuntundote. (Filemọni 22) Paulu yin tuntundote to madẹnmẹ bọ e vọ́ azọ́n mẹdehlan tọn etọn bẹ.

Ṣigba be odẹ̀ sọgan diọ kọdetọn nuhahun towe lẹ tọn ya? E sọgan jọ. Etomọṣo, flindọ odẹ̀ mayin nuyiwa sinsẹ̀n tọn de poun gba. Hodidọ sọn ahun mẹ wá wẹ e yin hẹ Otọ́ owanyinọ, nupojipetọ mítọn he tin to olọn lẹ mẹ. Mí dona voawu nado nọ yì whẹho lẹ ji tlọlọ to odẹ̀ mítọn lẹ mẹ, ṣigba yí sọwhiwhe do nọtepọn Jehovah to enẹgodo nado mọ lehe e na yigbe gbọn.

Jiwheyẹwhe sọgan nọma yigbena odẹ̀ lẹpo tlọlọ, mọjanwẹ e sọgan nọma na gblọndo to aliho kavi to ojlẹ he mí donukun mẹ do niyẹn. Di apajlẹ, Paulu hodẹ̀ pludopludo dogbọn ‘owùn he tin to agbasalan’ etọn mẹ dali. Jiwheyẹwhe ma de nuhahun Paulu tọn sẹ̀, mahopọnna lehe e sọgan ko sinyẹn sọ gba, kakatimọ e miọnhomẹna Paulu po hogbe mẹhẹnlodo tọn ehelẹ po dọmọ: “Ojọmiọn ṣie ko pé we, na madogán mẹ wẹ yè hẹn huhlọn ṣie sọgbe te.”—2 Kọlintinu lẹ 12:7-9.

Mílọsu lẹ sọgan deji dọ eyin Jiwheyẹwhe ma tlẹ de nuhahun tangan de sẹ̀, e sọgan ‘deali de na mí nido tin sọgan nado doakọnna ẹn.’ (1 Kọlintinu lẹ 10:13) To madẹnmẹ, Jiwheyẹwhe na de nuhahun gbẹtọvi tọn lẹpo sẹ̀. Todin whẹ́, lilẹhlan Omẹ “he nọ sè odẹ̀” dè sọgan diọ kọdetọn ninọmẹ de tọn.—Psalm 65:2.