E Má Yise Etọn hẹ Klasigbẹ́ Etọn Lẹ

BE A jlo na gọalọna klasigbẹ́ towe lẹ nado tindo nukunnumọjẹnumẹ dagbe nuyise sinai do Biblu ji towe lẹ tọn ya? Magdalena, viyọnnu owhe 18 mẹvi de he to weplọn to wehọmẹ daho Pologne tọn, nọ saba dọho na klasigbẹ́ etọn lẹ gando nuyise etọn lẹ go taidi dopo to Kunnudetọ Jehovah tọn lẹ mẹ. Taidi kọdetọn de, e nọ yin kinkanse whẹwhẹ dọmọ, ‘Etẹwẹ e zẹẹmẹdo nado yin dopo to Kunnudetọ Jehovah tọn lẹ mẹ?’ podọ ‘Be a ma yise to Jesu Klisti mẹ wẹ ya?’ Nawẹ e sọgan penugo nado gọalọna klasigbẹ́ etọn lẹ gbọn? Magdalena biọ anademẹ Jehovah tọn to odẹ̀ mẹ bo yinuwa sọgbe hẹ odẹ̀ etọn lẹ.—Jakobu 1:5.

To gbèdopo, Magdalena kanse mẹplọntọ etọn de he tindo sisi na nuyise etọn lẹ eyin ewọ sọgan do video lọ Les Témoins de Jéhovah—Un nom, une organisationa hia klasi lọ. Mẹplọntọ lọ kẹalọyi obiọ ehe. To enẹgodo, Magdalena dọna klasigbẹ́ etọn lẹ dọmọ: “N’to tito basi hẹ họntọn ṣie de nado wá basi nuzedonukọnnamẹ nukunwhiwhe 90 tọn de na klasi lọ. E na bẹ video de pinpọn po hodọdopọ do Kunnudetọ Jehovah tọn lẹ ji po hẹn. Be e na jlo mì nado wá ya?” Mẹlẹpo wẹ kẹalọyi oylọ-basinamẹ lọ. Magdalena po Wojciech heyin yẹwhehodọtọ whenu-gigọ́ tọn numimọnọ de po jẹ azọ́nwa ji do tito lọ ji.

Yé basi tito nado bẹ nuzedonukọnnamẹ lọ jẹeji po hodidọ nukunwhiwhe 20 tọn de po sinai do alọnuwe lọ Kunnudetọ Jehovah Tọn lẹ—Mẹnu Wẹ Yé Yin? Etẹwẹ Yé Yise?b ji bọ hodọdopọ kanbiọ-po-gblọndo po tọn de na bọdego. Enẹgodo, video lọ na yin didohia to wesẹdotẹn wehọmẹ lọ tọn. Wehọmẹvi klasi lọ tọn lẹ dopodopo na mọ nunina de yí—yèdọ wepò daho de he bẹ alọnuwe delẹ po owe Kanbiọ He Jọja lẹ Nọ Kanse —Gblọndo He Wazọ́n Lẹc po hẹn gọna alọnuwe pẹvi lẹ po linlinnamẹwe lẹ po.

To azán nuzedonukọnnamẹ lọ tọn gbè, mẹplidopọ lọ bẹ klasigbẹ́ 14, mẹplọntọ lọ po wehọmẹvi ẹnẹ devo he tin to wesẹdotẹn lọ gbọn kosọ dali lẹ po hẹn. Jẹnukọn whẹ́, Wojciech basi zẹẹmẹ dọ delẹ to ohó milomilo-kantọ po wekantọ Pologne tọn lẹ po mẹ yí yinkọ Jiwheyẹwhe tọn, heyin Jehovah, zan to owe yetọn lẹ mẹ. E sọ dlẹnalọdo owe sinsẹ̀n-nuplọnmẹ Katoliki tọn hoho delẹ he mẹ oyín Jiwheyẹwhe tọn tin te. To zẹẹmẹ bibasi do nuwiwa egbezangbe Kunnudetọ Jehovah tọn lẹ tọn ji mẹ, e do alọnuwe alahọ voovo tọn hia po yẹdide Plitẹnhọ Plidopọ tọn lẹ po.

Hodọdopọ zohunhun tọn de sọ bọdego. Magdalena po Wojciech po yí Biblu zan nado na gblọndo na kanbiọ lẹ. Ehe yinuwado mẹplidopọ lẹ ji bo dohia yé dọ Kunnudetọ Jehovah tọn lẹ ma nọ lá linlẹn yetọn titi lẹ gba. Etẹwẹ yin delẹ to kanbiọ wehọmẹvi lọ lẹ tọn mẹ podọ nawẹ yé mọ gblọndo yí gbọn?

KANBIỌ: Biblu bẹ hogbe he ma họnwun lẹ po hogbe yẹdenanu tọn susu po hẹn, he sọgan yin zẹẹmẹ basina to aliho voovo mẹ. Nawẹ mẹde sọgan nọgbẹ̀ sọgbe hẹ nuhe tin to Biblu mẹ lẹ gbọn?

GBLỌNDO: Mẹdelẹ nọ dọ dọ Biblu tin taidi hànjinu de he mẹde sọgan hò nado de nudidọ voovo he jlo e lẹ tọ́n. Ṣigba lẹnnupọn do ehe ji: Eyin hiẹ jlo na mọnukunnujẹ nuhe hodidọ wekantọ de tọn zẹẹmẹdo mẹ, be e ma na yọnhugan nado kanse e poun ya? To vogbingbọnmẹ na wekantọ owe gbẹtọ tọn lẹ tọn he ko kú lẹ, Dowatọ Biblu tọn, yèdọ Jehovah Jiwheyẹwhe, tin to ogbẹ̀. (Lomunu lẹ 1:20; 1 Kọlintinu lẹ 8:5, 6) Lẹdo hodidọ wefọ de tọn sọgan gọalọ nado tindo nukunnumọjẹnumẹ he sọgbe lọ. To yidogọmẹ, hosọ dopolọ lẹ nọ saba yin mimọ to adà Biblu tọn voovo mẹ, bọ adà voovo enẹlẹ yiyijlẹdo yedelẹ go sọgan gọalọ. Enẹwutu, mí sọgan na dotẹnmẹ Jiwheyẹwhe nado deanana linlẹn mítọn lẹ, taidi dọ ewọ wẹ to zẹẹmẹ wefọ lọ lẹ tọn basi na mí nkọtọn. Gbọnmọ dali, mí na wá jẹakọhẹ nuhe Biblu dọ gando ojlo etọn go bo nọgbẹ̀ sọgbe hẹ ẹ, kavi e mayin mọwẹ ya?

KANBIỌ: Vogbingbọn tẹwẹ tin to Klistiani lẹ po Kunnudetọ Jehovah tọn lẹ po ṣẹnṣẹn?

GBLỌNDO: Klistiani lẹ wẹ mí yin! Ṣigba kakati nado nọ dọ poun dọ yé yin Klistiani, Kunnudetọ Jehovah tọn lẹ nọ dovivẹnu nado nọgbẹ̀ sọgbe hẹ nuyise yetọn lẹ podọ sọgbe hẹ nuhe Jiwheyẹwhe to pinplọn yé na ale yetọn lẹ. (Isaia 48:17, 18) To whenuena e yindọ nuplọnmẹ yetọn lẹpo wẹ sinai do Biblu ji, yé yọnẹn dọ yé tin to nugbo lọ mẹ.—Matiu 7:13, 14, 21-23.

KANBIỌ: Naegbọn mì nọ jẹ mẹhe mì ma tlẹ yọnẹn paali lẹ dè bo nọ jlo nado dọho na yé janwẹ? Be enẹ ma taidi yise mítọn zinzindo mẹdevo lẹ ji gánnugánnu ya?

GBLỌNDO: Etẹwẹ hiẹ lẹn? Be e na ylan to nukun towe mẹ to whenuena mẹde dọnsẹpọ we po sisi po to aliho ji nado kàn linlẹn towe sè gando whẹho de go wẹ ya? (Jẹlemia 5:1; Zẹfania 2:2, 3) (To enẹgodo, Wojciech po Magdalena po basi wadohia lehe yé nọ dọnsẹpọ aligbọntọ lẹ do nado kanse eyin yé lẹndọ ninọmẹ mẹhe jiya singigọ tọn to agọe to Pologne lẹ tọn nọ duahunmẹ na Jiwheyẹwhe.) To whenuena mí ko dotoaina linlẹn mẹlọ tọn godo, mí nọ dlẹnalọdo wefọ Biblu tọn de. Eyin mẹde ma tindo ojlo to hodidọ lọ mẹ, mí nọ dọnudo e po zohunhun po bo nọ jo e do. (Matiu 10:11-14) Be aliho mẹhinhẹn gánnugánnu nado tindo hodọdopọ tọn wẹ enẹ yin ya? Kavi gbẹtọ lẹ masọ dona tindo hodọdopọ depope wẹ ya?

KANBIỌ: Naegbọn mì ma nọ basi hùnwhẹ lẹ?

GBLỌNDO: Hùnwhẹ dopo he Biblu degbè etọn na mí lọ wẹ mí nọ basi—enẹ wẹ Oflin okú Jesu Klisti tọn. (1 Kọlintinu lẹ 11:23-26) Na nuhe dù hùnwhẹ devo lẹ, hiẹ sọgan mọ nudọnamẹ lẹ gando fie yé wá sọn go to otanwe lẹ po owe dejidego devo lẹ po mẹ. Eyin hiẹ wàmọ, e na bọawuna we nado mọnukunnujẹ nuhewutu mí ma nọ basi hùnwhẹ enẹlẹ mẹ.—2 Kọlintinu lẹ 6:14-18.

Kanbiọ susu devo lẹ yin kinkanse bosọ mọ gblọndo yí. Hodọdopọ lọ yí whenu sọmọ bọ nudohia video tọn lọ dona yin tito basina do whedevonu.

Nawẹ wehọmẹvi lọ lẹ yinuwa gbọn? Mì gbọ Magdalena ni dọ ẹ na mí: “E paṣa mi nado mọdọ wehọmẹvi he ma nọ kiya na nude bo nọ ṣanmẹko lẹ to kanbiọ ahundopo tọn lẹ kanse. Dile etlẹ yindọ yé sọalọakọ́n nado yin mẹhe ma yise dọ Jiwheyẹwhe tin, yé do yise hia to Jiwheyẹwhe mẹ to hodọdopọ lọ whenu!” Mẹhe tin to finẹ lẹpo wẹ kẹalọyi nunina lọ lẹ—owe 35, alọnuwe 63, po linlinnamẹwe 34 po wẹ yin didogbonu na yé.

Lehe kọdetọn he wá sọn tito wehọmẹ tọn ehe mẹ lẹ jiawu do sọ! E ma yindọ e gọalọna klasigbẹ́ Magdalena tọn lẹ nado mọnukunnujẹ nuyise Kunnudetọ Jehovah tọn lẹ tọn mẹ dogọ poun wẹ gba, ṣigba e sọ dotuhomẹna susu jọja lọ lẹ tọn nado lẹnnupọn do lẹndai ogbẹ̀ tọn ji. Naegbọn hiẹ ma na dovivẹnu nado gọalọna klasigbẹ́ towe lẹ nado mọnukunnujẹ nuyise towe lẹ mẹ dogọ?

[Nudọnamẹ Odò Tọn Lẹ]

[Yẹdide to weda 31]

Magdalena po Wojciech po to whenuena yé to awuwlena hodọdopọ lọ