‘Nuplọnmẹ He Yẹn Mọyi Hẹn Mi Jaya’

E PAṢA awhli de he nọ yin Kazuna to whenuena mẹplọntọ etọn dọna ẹn nado ze yinkọ dai na agbàwhinwhlẹn hodidọ gbangba tọn de to Glẹnsigbe mẹ. Wehọmẹ daho he tin to lopo daho Hokkaido tọn ji to agewaji Japon tọn lẹpo wẹ nọ tindo mahẹ to agbàwhinwhlẹn lọ mẹ, ṣigba whla tintan die bọ wehọmẹ etọn to mahẹ tindotọ de dohlan. To azán agbàwhinwhlẹn lọ tọn gbè, ayiha Kazuna tọn ma jai na ewọ dona whlẹnagbà hẹ nudi wehọmẹvi 50 devo lẹ. Ahun etọn tlẹ sọ gbado dogọ to whenuena nukun etọn yì jẹ whẹdatọ Glẹnsinu awe ji.

Mẹhe wà dagbe hugan lẹ yin lilá, bẹsọn mẹhe na mọ nunina he whè hugan yí ji. Kazuna ma sọgan yise to whenuena yinkọ etọn wá yin yiylọ gbọngodo taidi mẹhe na mọ nunina daho hugan lọ yí. Ewọ po mẹplọntọ etọn, he sinai to apá etọn po, yìnnukun pọ́n yedelẹ po nupaṣamẹ po. Kazuna ma ko gọ̀ biọ ede mẹ kakajẹ whenue e yì oplò ji nado yí nunina daho hugan lọ!

“Nuplọnmẹ he titobasinanu Jehovah tọn nọ wleawuna gbọn Wehọmẹ Lizọnyizọn Yẹwhehọluduta tọn gblamẹ wẹ hẹn ehe yọnbasi,” wẹ Kazuna dọ po ayajẹ po. “Homẹ ṣie hùn susu dọ yẹn ko mọ nuplọnmẹ ehe yí.” Wehọmẹ enẹ, he mẹ Kazuna ko tindo mahẹ te sọn pẹvi etọn gbọ́n, yin dopo to opli agun tọn he Kunnudetọ Jehovah tọn lẹ nọ basi lẹ mẹ. To awuwiwlena agbàwhinwhlẹn lọ whenu, Kazuna na ayidonugo sọwhiwhe tọn hlan miklo yiyizan, hodidọ po zohunhun po, gòwhinwhàn, nukunji pinpọ́n na mẹplidopọ lẹ, po onú devo he nọ yin pinplọnmẹ to Wehọmẹ Lizọnyizọn Yẹwhehọluduta tọn lẹ po.

Mí to oylọ-basina we nado wá pọ́n wehọmẹ ehe, he nọ yin anadena to sẹmẹsẹmẹ to Plitẹnhọ Ahọluduta tọn heyin Kunnudetọ Jehovah tọn lẹ tọn mẹ. Hiẹ lọsu na yí nukun towe lẹ do mọ lehe jọja po mẹho po to alemọyi do. Mẹlẹpo wẹ sọgan wá opli lọ tẹnmẹ. Eyin a jlo nudọnamẹ devo lẹ do wehọmẹ he sẹpọ we hugan ji, jaale bo mọ Kunnudetọ Jehovah tọn he nọ nọ̀ lẹdo towe mẹ lẹ.