Be Hiẹ Flin Ya?

Be a duvivi zinjẹgbonu Atọ̀họ̀-Nuhihọ́ Lọ Tọn agọe tọn lẹ hihia tọn ya? Eyọn, pọ́n eyin a sọgan na gblọndo na kanbiọ he bọdego helẹ:

• Etẹwẹ Klistiani de sọgan wà eyin nuṣikọna ẹn to numọtolanmẹ-liho podọ to gbigbọ-liho?

Mí dona yọ́n nuhe hẹn nuṣikọ mítọn wá. E sọgan yin alọgọnamẹnu nado vọ́ dogbapọnna nuyiwa po nutindo mítọn lẹ po, bo de onú pinpẹ̀n lẹ do apadopo. Mí sọgan ze yanwle he sọgbe hẹ lẹnpọn dagbe lẹ dai sọgbe hẹ ninọmẹ mítọn lẹ. Onú titengbe wẹ e yin dọ mí ni penukundo dagbemẹninọ gbigbọmẹ tọn mítọn go podọ ehe dona bẹ dẹ̀hiho po ayihamẹlinlẹnpọn to gbesisọmẹ po hẹn.—15/8, weda 23-6.

• Naegbọn Kunnudetọ Jehovah tọn lẹ do yise dọ sọha lọ 144 000 ma yin sọha yẹhiadonu tọn de gba?

To whenuena apọsteli Johanu ko mọ numimọ dogbọn gbẹtọ 144 000 lẹ dali godo, e mọ ‘gbẹtọ susugege, he mẹdepope ma sọgan hia.’ (Osọhia 7:4, 9) Eyin sọha 144 000 lọ yin yẹhiadonu tọn wẹ, be vogbingbọn he yin didohia tofi na lẹzun ovọ́. Jesu ylọ mẹhe na dugán hẹ ẹ lẹ dọ ‘lẹngbọpa pẹvi.’ (Luku 12:32)—1/9, weda 30.

• Naegbọn Islaelivi de sọgan sà kanlin he kú ededenu na jonọ de?

Gbéjinu kavi jonọ he ma diọ ede zun Juvi de ma tin to Osẹ́n glọ gba. Enẹwutu Islaelivi de yin gbeyina nado na kavi sà kanlin mọnkọtọn na ẹn. (Deutelonomi 14:21) Ṣigba mẹhe diọ ede zun Juvi tin to dandannu glọ nado yìn Osẹ́n lọ podọ e ma sọgan dù olàn kanlin he kú ededenu mọnkọtọn tọn gba. (Levitiku 17:10)—15/9, weda 26.

• Nawẹ gbẹtọ lẹ nọ hodo apajlẹ nudida tọn nado basi onú voovo lẹ gbọn, podọ etẹwẹ ehe dona whàn Klistiani lẹ nado wà?

Gbẹtọ lẹ nọ saba hodo apajlẹ jọwamọnu lẹ tọn. Di apajlẹ, Wilbur po Orville Wright po dindona lehe ohẹ̀ daho lẹ nọ zlọn gbọn bosọ penugo nado basi agahun de to godo mẹ. Enẹwutu, lehe gbẹtọ lẹ nọ hodo apajlẹ nudida lẹ tọn do sọgan whàn Klistiani de nado pagigona Mẹdatọ lọ.—1/10, weda 9.

• Mẹnu wẹ yin nùdego to 2 Kọlintinu lẹ 12:2-4 mẹ taidi mẹhe yin zize yì paladisi mẹ?

Hodidọ enẹ bọdo wefọ he mẹ Paulu yiavunlọ na apọsteli-yinyin etọn te lẹ go tlọlọ. Humọ, Biblu ma donù mẹdevo depope go he tindo numimọ mọnkọtọn, podọ Paulu wẹ yin omẹ lọ he dọho na mí gando e go. Enẹwutu e yọnbasi dọ Paulu wẹ na ko mọ numimọ ehe.—15/10, weda 8.

• Jẹhẹnu tẹlẹ wẹ Jesu tindo he hẹn ẹn pegan nado wadevizọn taidi Nukọntọ he Jiwheyẹwhe de?

Jesu hẹn tenọgli go mlẹnmlẹn, bo yin nugbonọ podọ jijlọnọ to walọyizan etọn mẹ. E ze ede jo hlan Jiwheyẹwhe petepete. Jesu tindo mẹtọnhopọn sisosiso na gbẹtọ lẹ bosọ yiwanna azọ́nwiwa.—1/11, weda 6-7.

• Fie wẹ aovi lẹ na te to Owhe Fọtọ́n lọ whenu?

E sọgbe hẹ lẹnpọn dagbe nado wá tadona kọ̀n dọ to Gandudu Owhe Fọtọ́n Klisti tọn whenu, yé na tin to odò mapote mẹ hẹ Satani. (Osọhia 20:1-3) Gẹnẹsisi 3:15 dọ dọdai dọ ota odàn lọ tọn na yin sisó, podọ ehe bẹ zize e do odò mapote mẹ to Owhe Fọtọ́n lọ whenu hẹn. Okún etọn bẹ angẹli ylankan lẹ kavi aovi lẹ hẹn. Nugbo lọ dọ yé ko dibusi odò mapote dohia dọ yé yọnẹn dọ alọhẹndotenamẹ ehe ja nugbo. (Luku 8:31)—15/11, weda 30-1.

• Naegbọn mẹde dona tin to aṣeji gando ahàn sinsinyẹn lẹ nùnù go, eyin e ma tlẹ nọ nùahàn jẹ obá he mẹ mẹdevo lẹ na yọnẹn te dọ ewọ ko nùahànmú?

Eyin mẹdelẹ tlẹ ko nùahàn susu, e ma nọ yawu sọawuhia dọ yé ko nùahànmú gba. Ṣigba, vudevude mẹlọ sọgan lẹzun ahànnu-gungun in bo lẹzun “sinnumunọ.” (Titu 2:3) Jesu na avase dọ mí ni ma yin “gigọfla do doagbànna po núnùmú ogbẹ̀ tọn po” blo. (Luku 21:34, 35) E ma yin dandan dọ ahàn ni yin nùnùmú whẹpo e nido hẹn mẹde mùsa kavi hẹn ẹn zun adidọnọ—to agbasa-liho podọ to gbigbọ-liho gba.—1/12, weda 19-21.