“Etẹwẹ Yin Aṣli Towe?”

JONỌ mẹhomẹ de wẹ kàn kanbiọ ehe sè Muriel, he tindo ovi atọ̀n, to núdùtẹn de. Kanbiọ lọ paṣa Muriel tlala. Alọnu Muriel tọn ján taun na e plan ovi etọn lẹ yì dotowhé wutu bọ ganmẹ sọ to yìyì do e. Ganmẹ he pò ma sọgan pé na yé nido yì whégbè bo dù núdùdù whèjai tọn whẹpo do yì opli Klistiani tọn yetọn. Enẹwutu, e plan ovi lọ lẹ yì núdùtẹn he to yakẹ de na yé nido sọgan dín nude dù.

Dile yé to núdù fó tlolo, dawe de dọnsẹpọ Muriel bo dọmọ: “Yẹn to pinpọn we sọn whenue gbọ́n hiẹ wáfi. Podọ yẹn doayi e go dọ ovi towe lẹ gbọnvo tlala na ovi he n’nọ saba mọ lẹ. Hiẹ na ko mọ lehe ovi lẹ nọ yí tafo lẹ po oján lẹ po zan do. Yé nọ ze afọ yetọn lẹ do tafo ji bo nọ to oján lẹ sisẹ. Ṣigba ovi towe lẹ nọ̀ whii bosọ yọ́n yede jlẹ. Etẹwẹ yin aṣli towe?”

Muriel gblọn dọmọ: “Yẹn po asu ṣie po nọ plọn Biblu hẹ ovi mítọn lẹ to gbesisọmẹ, podọ mí nọ tẹnpọn nado yí nuhe mí plọn lẹ do yizan mẹ to gbẹzan mítọn mẹ. Kunnudetọ Jehovah tọn wẹ mí yin.” To whenuena dawe lọ sè ehe, e dọmọ: “Juvi de wẹ yẹn yin podọ yẹn lùn Mẹvasudo Nazi lẹ tọn tọ́n. Yẹn flin dọ n’mọ Kunnudetọ Jehovah tọn heyin homẹkẹndo to Allemagne lẹ. Etlẹ yin to whenẹnu yé gbọnvo taun. Walọ ovi towe lẹ tọn yinuwado ji e taun. Yẹn na yí sọwhiwhe do dindona sinsẹ̀n towe.”

Biblu yin anademẹwe dagbe de he nọ gọalọ to ovi lẹ pinplọn mẹ. Kunnudetọ Jehovah tọn lẹ tindo ojlo nado gọalọna mẹdevo lẹ nado mọaleyi sọn anademẹ Owe-wiwe lẹ tọn mẹ. Mí to oylọ basi na we po zohunhun po nado kẹalọyi nuzedonukọnnamẹ he bọdego lọ.