Kanbiọ lẹ sọn Wehiatọ lẹ Dè

Whẹwhinwhẹ́n tẹwẹ mí tindo nado dọ dọ hodidọ lẹ taidi “mẹhe ewọ dopo kẹdẹ wẹ tindo makú” podọ “mẹhe mẹde ma ko mọ gbede, bọ yè masọ sọgan mọ” dlẹnalọdo Jesu kakati nido yin Jehovah Jiwheyẹwhe?

Apọsteli Paulu wlan dọmọ: “[Awusọhia] ehe to whenu etọn lọsu mẹ e na yí hia, mẹhe yin Huhlọnnọ donanọ dopo lọ, Ahọlu yé he dugán di ahọlu lẹ tọn, podọ Oklunọ yé he dugán di oklunọ lẹ tọn; mẹhe ewọ dopo kẹdẹ wẹ tindo makú, bo nọ nọ̀ hinhọ́n mẹ, he mẹde ma sọgan sẹpọ; mẹhe mẹde ma ko mọ gbede, bọ yè masọ sọgan mọ.”—1 Timoti 6:15, 16.

Mẹhe nọ basi zẹẹmẹ do Biblu ji lẹ nọ saba yihojlẹdohogo dọ: ‘Nawẹ hodidọ lẹ taidi “mẹhe ewọ dopo kẹdẹ wẹ tindo makú,” “Huhlọnnọ . . . dopo lọ,” podọ “mẹhe mẹde ma ko mọ gbede, bọ yè masọ sọgan mọ” na dlẹnalọdo mẹdevo zẹ̀ Ganhunupotọ lọ go gbọn?’ Nugbo wẹ dọ hogbe mọnkọtọn lẹ sọgan yin yiyizan na Jehovah. Ṣigba, lẹdo hodidọ lọ tọn dohia dọ to 1 Timoti 6:15, 16 mẹ, Jesu wẹ Paulu to alọdlẹndo tlọlọ.

To vivọnu wefọ 14 tọn, Paulu donù “awusọhia Jesu Klisti Oklunọ mítọn tọn” go. (1 Timoti 6:14) Enẹwutu, to whenuena Paulu wlan to wefọ 15 mẹ dọ ‘awusọhia ehe to whenu etọn lọsu mẹ e na yí hia, mẹhe yin Huhlọnnọ donanọ dopo lọ,’ awusọhia Jesu tọn wẹ e to alọdlẹndo, e ma yin Jehovah Jiwheyẹwhe tọn gba. Eyin mọwẹ, mẹnu wẹ yin “Huhlọnnọ [kavi Aṣẹpatọ] . . . dopo lọ”? E taidi nuhe sọgbe hẹ lẹnpọn dagbe nado wá tadona kọ̀n dọ Jesu wẹ yin Aṣẹpatọ he Paulu dlẹnalọdo lọ. Etẹwutu? Lẹdo hodidọ lọ tọn dohia hezeheze dọ Paulu to Jesu yijlẹdo gbẹtọvi gandutọ lẹ go. Na nugbo tọn, dile Paulu wlan do, Jesu wẹ “Ahọlu yé [gbẹtọvi] he dugán di ahọlu lẹ tọn, podọ Oklunọ yé [gbẹtọvi] he dugán di oklunọ lẹ tọn.”a Mọwẹ, to gbẹtọvi gandutọ lẹ nukọn, Jesu wẹ ‘Aṣẹpatọ dopo lọ.’ Jesu ko yin nina “ahọluigba . . . po gigo po, po ahọludu de po, na gbẹtọ lẹpo, po akọta lẹ po, po ogbè lẹ po nido nọ sẹ̀n ẹn.” (Daniẹli 7:14) Gbẹtọvi aṣẹpatọ depope ma sọgan sọalọakọ́n dọ emi tindo jlọjẹ mọnkọtọn!

Etẹwẹ dogbọn hodidọ lọ “mẹhe ewọ dopo kẹdẹ wẹ tindo makú” dali? Whladopo dogọ, nuyijlẹdonugo wẹ to yinyin bibasi to Jesu po gbẹtọvi ahọlu lẹ po ṣẹnṣẹn. Gandutọ aigba ji tọn depope ma sọgan sọalọakọ́n dọ emi mọ jọmaku yí, ṣigba Jesu sọgan wàmọ. Paulu wlan dọmọ: “Mí yọnẹn dọ le yè ze Klisti tite sọn oṣiọ lẹ mẹ e masọ kú ba; okú masọ tindo gandu to e ji.” (Lomunu lẹ 6:9) Gbọnmọ dali, Jesu wẹ yin omẹ tintan he yin alọdlẹndo to Biblu mẹ taidi mẹhe mọ nunina jọmaku tọn yí. Na nugbo tọn, to ojlẹ he mẹ Paulu to wekan te, Jesu kẹdẹ wẹ ko mọ ogbẹ̀ madopodo yí.

Mí sọ dona hẹn do ayiha mẹ dọ nuṣiwa wẹ e na ko yin eyin Paulu dọ dọ Jehovah Jiwheyẹwhe kẹdẹ wẹ tindo jọmaku, to whenuena e yindọ Jesu lọsu yin jọmaku ga to ojlẹ he mẹ Paulu to hogbe enẹlẹ wlan te. Ṣigba Paulu sọgan dọ dọ Jesu dopo kẹdẹ wẹ yin jọmaku to yijlẹdo gandutọ aigba ji tọn lẹ go mẹ.

Humọ, ayihaawe ma tin dọ to whenuena Jesu ko yin finfọnsọnku bo hẹji yì olọn mẹ godo, e sọgan yin alọdlẹndo taidi “mẹhe mẹde ma ko mọ gbede, bọ yè masọ sọgan mọ.” Nugbo wẹ dọ devi yiamisisadode Jesu tọn lẹ na mọ ẹn to okú yetọn po fọnsọnku he na bọdego to olọn mẹ taidi nudida gbigbọnọ lẹ po godo. (Johanu 17:24) Ṣigba gbẹtọ depope to aigba ji ma na mọ Jesu to ninọmẹ gigonọ etọn mẹ. Enẹwutu, e sọgan yin didọ po jidide po dọ sọn whenue gbọ́n Jesu ko fọnsọnku bo hẹji yì olọn mẹ, “mẹde” ma ko sọnukunmọ ẹn to gbẹtọ lẹ mẹ gba.

Na nugbo tọn, tlolo he mẹde mọ zẹẹmẹ he tin to 1 Timoti 6:15, 16 mẹ lẹ, e sọgan taidi nuhe dlẹnalọdo Jiwheyẹwhe. Ṣigba lẹdo hodidọ Paulu tọn, gọna wefọ devo he nọgodona linlẹn dopolọ lẹ, dohia dọ Jesu wẹ Paulu to alọdlẹndo.

[Nudọnamẹ odò tọn]