Kanbiọ lẹ sọn Wehiatọ lẹ Dè

Hiadogonamẹ tẹwẹ yin alọdlẹndo to Osọhia 7:3 mẹ?

Osọhia 7:1-3 dọmọ: ‘Yẹn sọ mọ angẹli ẹnẹ ṣite to agosu ẹnẹ aigba tọn lẹ ji, yé sọ hẹn jẹhọn ẹnẹ aigba tọn lẹ go, na jẹhọn nikaa yìn do aigba go, kavi do ohù mẹ, kavi do atin depope go. Yẹn sọ mọ angẹli devo de tọ́nsọn whèzizẹ dali ja, e tindo hiadonu Jiwheyẹwhe ogbẹ̀nọ lọ tọn to alọ mẹ: e sọ dawhá to ogbè lélé mẹ hlan angẹli ẹnẹ lẹ, he yè na nado gbleawuna aigba lọ po ohù po, dọmọ, Hiẹ gbleawuna aigba, kavi ohù, kavi atin lẹ blo, kaka mí na do yí hiadonu do dohiagona mẹmẹglọ Jiwheyẹwhe mítọn tọn lẹ to nukọn yetọn.’

To whenuena “jẹhọn ẹnẹ” lọ lẹ na yin jijodo, e na tọ́nkọ do “nukunbibia daho” lọ mẹ, yèdọ vasudo sinsẹ̀n lalo po pipotọ aihọn ylankan ehe po tọn. (Osọhia 7:14) “Mẹmẹglọ Jiwheyẹwhe mítọn tọn” lọ lẹ wẹ mẹmẹsunnu yiamisisadode Klisti tọn he to aigba ji lẹ. (1 Pita 2:9, 16) Gbọnmọ dali, dọdai ehe dohia dọ mẹmẹsunnu Klisti tọn lẹ na ko yin hiadogona fó to whenue nukunbibia daho lọ na gbajẹgbonu. Ṣigba, wefọ Biblu tọn devo lẹ dohia dọ hiadogonamẹ tintan de tin na mẹyiamisisadode lẹ. Enẹwutu, to whedelẹnu, mí nọ dọho gando hiadogonamẹ tintan po godo tọn de po go. Vogbingbọn tẹwẹ tin to awe lẹ ṣẹnṣẹn?

Mì gbọ mí ni lẹnnupọndo zẹẹmẹ hogbe lọ “hiadogonamẹ” tọn ji. To hohowhenu, hiadonu yin azọ́nwanu de he nọ yin yiyizan nado zín ohia de do kandai de ji. Hogbe lọ sọgan sọ dlẹnalọdo ohia lọ lọsu tlọlọ. To ojlẹ enẹlẹ mẹ, aṣa lọ gbayipe nado yí hiadonu do tlẹ́ kandai de kavi nuyizan devo lẹ nado do nugbo-yinyin yetọn kavi mẹhe tindo yé hia.—1 Ahọlu lẹ 21:8; Job 14:17.

Paulu yí gbigbọ wiwe jlẹ do hiadonu de go to whenuena e dọmọ: ‘Mẹhe to mí hẹnlodo po mìwlẹ po dọ mí yin Klisti tọn, bosọ yí amisisa do de mí, wẹ Jiwheyẹwhe: mẹhe ko sọ dohia mí go ga, bosọ na gòdenú gbigbọ tọn omẹ to ayiha mítọn lẹ mẹ.’ (2 Kọlintinu lẹ 1:21, 22) Enẹwutu, Jehovah yí gbigbọ wiwe etọn do de Klistiani ehelẹ nado dohia dọ nutindo etọn wẹ yé yin.

Ṣigba, adà awe ji wẹ hiadogonamẹ mẹyiamisisadode lẹ tọn tin te. Hiadogonamẹ tintan lọ gbọnvona godo tọn lọ na nuhe dù (1) lẹndai po (2) ojlẹ he mẹ e nọ yin bibasi te po. Hiadogonamẹ tintan lọ nọ yinuwa nado de hagbẹ yọyọ de dogọ sọha Klistiani yiamisisadode lẹ tọn. Hiadogonamẹ godo tọn lọ nọ yinuwa nado na kunnudenu dọ mẹhe yin dide bosọ yin hiadogona lọ ko do nugbonọ-yinyin etọn hia to gigọ́ mẹ. Kiki to whenẹnu, to hiadogonamẹ godo tọn lọ whenu, wẹ hiadonu na yin titlẹ́ do “nukọn” mẹyiamisisadode lọ tọn kakadoi, nado do e hia po jide po taidi “mẹmẹglọ Jiwheyẹwhe mítọn tọn” de he ko yin whiwhlepọn bosọ yin nugbonọ. Adà godo tọn hiadogonamẹ lọ tọn ehe wẹ yin alọdlẹndo to Osọhia weta 7 mẹ.—Osọhia 7:3.

Gando ojlẹ hiadogonamẹ tintan lọ tọn go, apọsteli Paulu wlanwe hlan Klistiani yiamisisadode lẹ dọmọ: ‘Mẹhe go mìwlẹ dotudo ga, ehe godo mì ko sè ohó nugbo tọn lọ wẹndagbe whlẹngán mìtọn tọn; podọ ehe godo mì ko yise ga, mẹhe mẹ yè yí gbigbọ wiwe opagbe tọn do dohia mì go te.’ (Efesunu lẹ 1:13, 14) To ninọmẹ susu mẹ, kandai Biblu tọn dohia dọ Klistiani owhe kanweko tintan tọn lẹ nọ yin hiadogona ojlẹ vude to whenuena yé sè wẹndagbe lọ bo yise to Klisti mẹ godo. (Owalọ lẹ 8:15-17; 10:44) Hiadogonamẹ mọnkọtọn nọ dohia dọ Jiwheyẹwhe kẹalọyi yé. Etomọṣo, e ma nọ do alọkẹyi godo tọn Jiwheyẹwhe tọn hia gba. Etẹwutu?

Paulu dọ dọ Klistiani yiamisisadode lẹ yin ‘hiadogona jẹ ofligọ zangbe.’ (Efesunu lẹ 4:30) Ehe dohia dọ ojlẹ de, to paa mẹ owhe susu, dona juwayi to hiadogonamẹ tintan lọ godo. Mẹyiamisisadode lẹ dona gbọṣi nugbonọ-yinyin mẹ sọn gbeegbe yé yin hiadogona po gbigbọ wiwe po kakajẹ ‘azán he gbè yé na yin fifligọ’ sọn agbasalan yetọn mẹ, yèdọ kakajẹ okú yetọn whenu. (Lomunu lẹ 8:23; Filippinu lẹ 1:23; 2 Pita 1:10) Enẹwutu, kiki to vivọnu pete gbẹzan etọn tọn wẹ Paulu sọgan dọmọ: “Yẹn ko hẹn ali ṣie jẹ opodo, yẹn ko yìn yise lọ: sọn dinvie yè ko ze jẹgbakun dodo tọn daga na mi.” (2 Timoti 4:6-8) Humọ, Jesu dọna agun Klistiani yiamisisadode lẹ tọn de dọmọ: “Yin nugbonọ jẹ okú, yẹn nasọ na jẹgbakun ogbẹ̀ tọn lọ we.”—Osọhia 2:10; 17:14.

Hogbe lọ “jẹgbakun” na kunnudenu yinukọn dogọ dọ ojlẹ de nọ juwayi to hiadogonamẹ tintan po godo tọn lọ po ṣẹnṣẹn. Etẹwutu? To hohowhenu, nuwiwa aṣa tọn wẹ e yin nado na jẹgbakun de hlan wezundotọ he duto alèwezun de ji. Nado mọ jẹgbakun lọ yí, e dona wà nususu hú wezun lọ bibẹjẹeji poun. E dona họ̀nwezun lọ kakajẹ vivọnu. Mọdopolọ, kiki eyin Klistiani yiamisisadode lẹ doakọnna kakajẹ vivọnu gbẹzan yetọn tọn—yèdọ sọn hiadogonamẹ tintan jẹ godo tọn ji—wẹ yé na mọ jẹgbakun ogbẹ̀ jọmaku tọn yí to olọn mẹ.—Matiu 10:22; Jakobu 1:12.

Whetẹnu wẹ pipotọ Klistiani yiamisisadode he ko yin hiadogona to tintan whenu lẹ tọn na mọ godo tọn lọ yí? Depope to yé mẹ he gbẹ́ pò to ogbẹ̀ to aigba ji na yin hiadogona do “nukọn” whẹpo nukunbibia daho lọ na do gbajẹgbonu. To whenuena jẹhọn ẹnẹ nukunbibia tọn lọ lẹ na yin jijodo, Islaeli gbigbọmẹ tọn lọ blebu na ko mọ hiadogonamẹ godo tọn yí, dile etlẹ yindọ vude to yé mẹ na gbẹ́ pò to ogbẹ̀ to agbasalan mẹ bosọ dona dotana gbẹzan aigba ji tọn yetọn.