Mẹdehlan lẹ Yin Tulina Nado Hodo Apajlẹ Jẹlemia Tọn — WESẸDOTẸN INTẸNẸT JI TỌN Watchtower Tọn

Gbedewema-Yíyí Klasi 125tọ Giliadi Tọn

Mẹdehlan lẹ Yin Tulina Nado Hodo Apajlẹ Jẹlemia Tọn

“KLASI Giliadi tọn ehe yin nujijọ ayidego tọn de to whenuho mẹ,” wẹ Geoffrey Jackson he yin dopo to Hagbẹ Anademẹtọ lọ mẹ dọ. E to hodọna gbẹtọ 6156 he wá gbedewema-yíyí klasi 125tọ Wehọmẹ Biblu Pinplọn Watchtower Giliadi tọn he yin bibasi to 13 septembre 2008 tẹnmẹ. Wehọmẹ Giliadi tọn ko do mẹdehlan he hugan 8000 hlan “opodo aigba tọn,” ehe bẹ gbedewema-yitọ 56 ehelẹ hẹn ga.—Owalọ 1:8.

Mẹmẹsunnu Jackson he yin azinponọ tito-to-whinnu gbedewema-yíyí lọ tọn kanse dọ, “Nawẹ jidide he gbẹtọ lẹ na tindo do mì go na yidogọna lizọnyizọn mìtọn gbọn?” Enẹgodo, e slẹ onú ẹnẹ he na zọ́n bọ gbẹtọ lẹ na deji do yé go: pọndohlan he sọgbe tintindo, apajlẹ dagbe zizedai, nuplọnmẹ mẹtọn zize sinai gligli do Ohó Jiwheyẹwhe tọn ji po nulẹpo wiwà nado hẹn oyín Jehovah tọn zun yinyọnẹn po.

David Schafer he tin to Wedegbẹ́ Mẹpinplọn tọn mẹ, dọhodo hosọ lọ ji, “Be Mì Na Mọnukunnujẹ Onú Popo Mẹ Ya?” E na jide wehọmẹvi Giliadi tọn lọ lẹ dọ eyin yé ma tlẹ mọnukunnujẹ aṣa yọyọ he yé na pehẹ delẹ mẹ, yé na mọnukunnujẹ nuhe na gọalọna yé nado yin mẹdehlan dagbe lẹpo mẹ eyin yé nọ dín Jehovah bo yí whiwhẹ do kẹalọyi anademẹ “afanumẹ nugbonọ, nuyọnẹntọ” lọ tọn.—Howh. 28:5; Mat. 24:45.

Enẹgodo, John E. Barr he yin dopo to Hagbẹ Anademẹtọ lọ mẹ dọhodo hosọ lọ ji, “Mì Dike Nude Klan Mì sọn Owanyi Jiwheyẹwhe Tọn mẹ Blo.” Taidi otọ́ de, Mẹmẹsunnu Barr na ayinamẹ dagbe gbedewema-yitọ lẹ po mẹjitọ yetọn lẹ po ma nado dibu na avùnnukundiọsọmẹnu depope he mẹdehlan yọyọ lọ lẹ sọgan pehẹ to azọ́ndenamẹ yetọn mẹ. “Nude masọ yọ́n bo tindo hihọ́ hugan nado gbọṣi owanyi Jiwheyẹwhe tọn mẹ,” wẹ e dọ. Nude ma sọgan klan mẹdehlan lọ lẹ sọn owanyi Jiwheyẹwhe tọn mẹ adavo yelọsu jo Jiwheyẹwhe do.

Sam Roberson he nọ wazọ́n to Azọ́nwatẹn Wehọmẹ Yẹwhehọluduta tọn lẹ tọn mẹ na ayinamẹ mẹplidopọ lẹ nado do “awugbó he yọnwhanpẹ hugan lọ.” Eyin mẹdehlan lọ lẹ nọ plọn nuhe Jesu ko wà bosọ nọ yí yé do yizan mẹ, e na yọnbasi na yé nado “ze Jesu Klisti Oklunọ dogo.” (Lom. 13:14) Todin, William Samuelson, nugopọntọ Azọ́nwatẹn Wehọmẹ Yẹwhehọluduta tọn lẹ tọn zinnudo nuhe nọ hẹn mẹde tindo yẹyi ji. Pọndohlan Jiwheyẹwhe tọn tintindo wẹ nọ hẹn mẹde tindo yẹyi, e ma yin gbẹtọ tọn gba.

Michael Burnett, dopo to mẹplọntọ lẹ mẹ, kanhose wehọmẹvi lọ lẹ do numimọ he yé tindo to kunnudegbe lẹ ji. Dile etlẹ yindọ suhugan wehọmẹvi lọ lẹ tọn dekunnu to aigba-denamẹ he ji yè ko nọ wazọ́n te whẹwhẹ to whenuena yé to Wehọmẹ Giliadi tọn to Patterson, New York, yé gbẹsọ mọ jlodotọ lẹ. Gerald Grizzle he nọ wazọ́n to Azọ́nwatẹn He Nọ Penukundo Plidopọ Agbegbe Tọn lẹ Go, kanhose mẹmẹsunnu he wá Wehọmẹ Hagbẹ Wedegbẹ́ Alahọ tọn lẹ tọn atọ̀n. Gblọndo yetọn lẹ gọalọna gbedewema-yitọ Giliadi tọn lọ lẹ nado wleawudai na nuhe yé na pehẹ to azọ́ndenamẹ tògodo tọn yetọn mẹ lẹ.

David Splane he yin dopo to Hagbẹ Anademẹtọ lọ mẹ he yì klasi 42tọ dọhodo hosọ lọ ji, “Mì Hodo Apajlẹ Jẹlemia Tọn.” Dile etlẹ yindọ azọ́ndenamẹ Jẹlemia tọn dobuna ẹn, Jehovah na ẹn huhlọn. (Jẹl. 1:7, 8) Jiwheyẹwhe na wà nudopolọ na mẹdehlan yọyọ lọ lẹ. “Eyin hiẹ tindo nuhahun po mẹde po,” wẹ Mẹmẹsunnu Splane dọ, “sinai bo kàn jẹhẹnu mẹlọ tọn ao he a yiwanna. Eyin a ma mọ pé ao, enẹ dohia dọ a ma ko yọ́n mẹlọ ganji.”

Jẹlemia nọ yí ede do sanvọ́. Whedepopenu he e jlo na gbọjọ, e nọ hodẹ̀ bọ Jehovah nọ gọalọna ẹn. (Jẹl. 20:11) Mẹmẹsunnu Splane dọ dọ, “Eyin mì mọdọ mì to gbigbọjọ, mì hodẹ̀ hlan Jehovah. E na paṣa mì nado mọ lehe Jehovah na gọalọna mì do.”

To vivọnu tito-to-whinnu gbedewema-yíyí lọ tọn, azinponọ lọ flinnu mẹplidopọ lẹ dọ gbedewema-yitọ lọ lẹ ko plọn nususu he na zọ́n bọ gbẹtọ lẹ na kẹalọyi owẹ̀n yetọn po awubibọ po. Dile yé to kunnude to aigba-denamẹ yetọn lẹ ji, owẹ̀n yetọn na tindo huhlọn dogọ eyin gbẹtọ lẹ mọdọ emi sọgan dejido yé go.—Isa. 43:8-12.

[Yẹdide to weda 22]

SỌHA NULINLẸN KLASI TỌN

Sọha otò he mẹ yé wá sọn tọn: 6

Sọha otò he mẹ yé yin didohlan tọn: 21

Sọha wehọmẹvi lẹ tọn: 56

Madozẹnzẹn owhe mẹhodido tọn: 32,9

Madozẹnzẹn owhe to nugbo mẹ tọn: 17,4

Madozẹnzẹn owhe lizọnyizọn whenu-gigọ́ tọn: 13

[Yẹdide to weda 23]

Gbedewema-Yíyí Klasi 125tọ Wehọmẹ Biblu Pinplọn Watchtower Giliadi Tọn

To yinkọ he tin to odò lẹ mẹ, hukan lẹ yin sọha yí na sọn nukọn yì godo, bọ yinkọ lẹ yin sislẹ sọn amiyọnwhé yì adusiwhé to hukan dopodopo ji.

(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez, N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck, E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.