Kanbiọ lẹ sọn Wehiatọ lẹ Dè

Whetẹnu wẹ Satani yin yinyan sọn olọn mẹ?—Osọhia 12:1-9.

Dile etlẹ yindọ owe Osọhia tọn ma dọ ojlẹ he mẹ Satani yin yinyan sọn olọn mẹ te pẹpẹ, e donù nujijọ debọdo-dego delẹ go he sọgan gọalọna mí nado yọ́n whenue e yin yinyan sọn olọn mẹ. Tintan to nujijọ lọ lẹ mẹ wẹ didoai Ahọluduta Mẹssia lọ tọn. To enẹgodo, “awhàn de [gbajẹgbonu] to olọn mẹ,” podọ taidi kọdetọn de Satani ṣíawhàn bo yin yinyan sọn olọn mẹ pete.

Owe-wiwe do 1914 hia hezeheze taidi owhe he mẹ ‘ojlẹ dide akọta lẹ tọn’ wá vivọnu bọ Ahọluduta lọ yin didoai te.a (Luku 21:24) Bọdo enẹ go tlolo, ojlẹ nẹmu wẹ wayi whẹpo awhàn lọ do gbajẹgbonu to olọn mẹ bọ Satani wá yin yinyan jẹgbonu?

“Dlagọni lọ sọ ṣite to nukọn yọnnusi he wleawu bo to ovi na jì lọ tọn, nado hù ovi etọn . . . dù le yè jì i,” wẹ Osọhia 12:4 dọ. Ehe dohia dọ Satani jlo na de Ahọluduta lọ sẹ̀ sọn aimẹ tlolo he e yin didoai godo eyin e yọnbasi. Jehovah dádo whẹho lọ mẹ bo glọnalina Satani ma nado hẹn linlẹn ylankan etọn di, ṣogan Satani gbẹ́ magbe bo to nulẹpo wà nado sukúndona Ahọluduta he ṣẹṣẹ yin didoai lọ. Nuhe zọ́n niyẹn bọ “Mikaẹli po angẹli etọn lẹ po” dona yinuwa to niyaniya mẹ nado de ‘dlagọni lọ po angẹli etọn lẹ po’ sẹ̀ sọn olọn mẹ na nude nikaa jọ do Ahọluduta lọ go. Enẹwutu, nuhe sọgbe wẹ e yin nado wá tadona lọ kọ̀n dọ Satani ṣíawhàn bo yin yinyan sọn olọn mẹ to ojlẹ kleun de he Ahọluduta lọ yin didoai to 1914 godo tlolo.

Onú devo he ji mí sọ dona lẹnnupọndo wẹ fọnsọnku Klistiani yiamisisadode lẹ tọn he bẹjẹeji to whenue Ahọluduta lọ yin didoai godo tlolo sọgbe hẹ nuhe Owe-wiwe dọ.b (Osọhia 20:6) To whenuena e yindọ Owe-wiwe ma dọ dọ mẹmẹsunnu yiamisisadode Klisti tọn lẹ kọnawudopọ hẹ Jesu to awhàn he yin fùnfùn sọta dlagọni po angẹli etọn lẹ po mẹ, awhàn lọ dona ko yin fùnfùn fó bọ Satani po aovi etọn lẹ po na ko yin yinyan sọn olọn mẹ to whenue fọnsọnku mẹmẹsunnu Klisti tọn lẹ tọn bẹjẹeji.

Nugbo wẹ dọ Biblu ma dọ ojlẹ he mẹ Satani po aovi etọn lẹ po yin yinyan sọn olọn mẹ te pẹpẹ. Etomọṣo, e họnwun dọ nujijọ ehe wá aimẹ to whenue Jesu Klisti yin zizedo ofìn ji to olọn mẹ to 1914 godo tlolo.

[Nudọnamẹ odò tọn]