Kanbiọ Wehiatọ Mítọn lẹ Tọn

Be Jesu Wẹ Yin Mikaẹli Angẹligán lọ Ya?

▪ Do glido, mọwẹ wẹ yin gblọndo lọ. Aṣa lọ nado nọ na yinkọ susu omẹ dopo gbayipe to fisusu. Nudopolọ wẹ e yin na yinkọ he tin to Biblu mẹ lẹ. Di apajlẹ, tọgbo Jakọbu sọ nọ yin yiylọdọ Islaeli. (Gẹnẹsisi 35:10) Yinkọ voovo atọ́n wẹ yin nina apọsteli Pita—yèdọ Simeọni, Simọni, Pita, Kefa po Simọni Pita po. (Matiu 10:2; 16:16; Johanu 1:42; Owalọ lẹ 15:7, 14) Naegbọn mí sọgan dọ po nujikudo po dọ Jesu sọ nọ yin Mikaẹli? Mì gbọ mí ni gbadopọnna nugbo Biblu tọn he bọdego ehelẹ.

Whla atọ́n wẹ Biblu donù nudida gbigbọnọ huhlọnnọ lọ he nọ yin Mikaẹli go. Atọ̀n tin to owe Daniẹli tọn mẹ. To Daniẹli 10:13, 21 mẹ, mí hia dọ Mikaẹli, he yin yiylọdọ “dopo to ahọvi nukọntọ lẹ mẹ” podọ “ahọvi mìtọn,” wá whlẹn angẹli de he yin didohlan nado hẹn azọ́ndenamẹ de di. Enẹgodo, Daniẹli 12:1 dọ dọ to ojlẹ opodo tọn lọ mẹ “Mikaẹli na ṣite, ahọvi daho lọ he ṣite na ovi omẹ towe lẹ tọn lẹ.”

Fidevo he Biblu sọ yí Mikaẹli zan te wẹ Osọhia 12:7, fie e dọ te dọ “Mikaẹli po angẹli etọn lẹ po” funawhàn titengbe de bo yàn Satani Lẹgba po angẹli ylankan etọn lẹ po sọn olọn mẹ.

Doayi e go dọ to wefọ he go mí donù wayi lẹ dopodopo mẹ, Mikaẹli sọawuhia nado yin angẹli awhànfuntọ de he nọ hoavùn do omẹ Jiwheyẹwhe tọn lẹ tamẹ bosọ nọ basi hihọ́na yé, podọ e tlẹ sọ hoavùn hẹ kẹntọgán Jehovah tọn, yèdọ Satani.

Juda wefọ 9tọ ylọ Mikaẹli dọ “angẹligán lọ.” Wefọ dopo gee devo he mẹ angẹligán yin yiyizan te wẹ 1 Tẹsalonikanu lẹ 4:16, fie Paulu to hodọ gando Jesu he yin finfọnsọnku lọ go te dọmọ: “Oklunọ [Jesu] lọsu na jẹte sọn olọn mẹ po awhá gbedide tọn de po, po ogbè angẹligán tọn de po gọna opẹ̀n Jiwheyẹwhe tọn.” Wefọ ehe dohia dọ Jesu Klisti lọsu wẹ yin angẹligán lọ.

Sọgbe hẹ nuhe mí ko dọ wayi lẹ, tadona tẹ kọ̀n wẹ mí sọgan wá? Jesu Klisti wẹ Mikaẹli angẹligán lọ. Yinkọ lọ lẹ dopodopo—yèdọ Mikaẹli (he zẹẹmẹdo “Mẹnu Wẹ Taidi Jiwheyẹwhe?”) po Jesu (he zẹẹmẹdo “Jehovah Wẹ Whlẹngán”) po—zinnudo azọngban etọn ji taidi mẹhe na nọ nukọn nado yiavunlọna nupojipetọ-yinyin Jiwheyẹwhe tọn. Filippinu lẹ 2:9 dọmọ: “Jiwheyẹwhe ze e [Jesu he yin gigopana lọ] daga do otẹn he yiaga de mẹ bo gbọn homẹdagbe dali na ẹn oyín lọ he yiaga hú oyín devo lẹpo.”

Nujọnu wẹ e yin nado doayi e go dọ Jesu ko tin whẹpo do yin jiji to aigba ji. Jẹnukọnna jiji Jesu tọn, angẹli de dla Malia pọ́n bo dọna ẹn dọ ewọ na ji ovi de gbọn huhlọn gbigbọ wiwe tọn dali podọ ewọ dona ylọ oyín ovi lọ tọn dọ Jesu. (Luku 1:31) To lizọnyizọn etọn whenu, Jesu nọ saba dohia dọ emi ko nọgbẹ̀ pọ́n whẹpo do wá aigba ji.—Johanu 3:13; 8:23, 58.

Enẹwutu, whenuena Jesu ma ko wá aigba ji wẹ e yin Mikaẹli angẹligán lọ. To fọnsọnku po kọlilẹ yì olọn mẹ etọn po godo, Jesu gọ̀ jẹ otẹn etọn mẹ taidi Mikaẹli, yèdọ angẹligán lọ, “hlan gigo Jiwheyẹwhe Otọ́ lọ tọn.”—Filippinu lẹ 2:11.