Aṣli 3

Nọ Do Pinpẹn-Nutọn-Yinyọnẹn Hia

ETẸWẸ BIBLU PLỌN MÍ? “Mì nọ dopẹ́ to onú lẹpo mẹ.”—1 Tẹsalonikanu lẹ 5:18.

ETẸWẸ NỌ HẸN NUHAHUN LỌ WÁ? Saklanọ po mayọndagbenọ lẹ po wẹ lẹdo mí pé, podọ jijọ ehelẹ sọgan bẹpla mí po awubibọ po. (2 Timoti 3:1, 2) Humọ, mí sọgan yin whinwhàn nado yí nuwiwa susu dogọ gbẹzan mítọn he ko ján dote lọ. Nuhahun lẹ sọgan húagbọ́ mí kavi mí sọgan hẹn alọnu mítọn ján to afọdidona ojlo mẹdetiti tọn mítọn lẹ mẹ sọmọ bọ mí ma na tindo whenu nado yọ́n pinpẹn nuhe mí ko tindo lẹ tọn kavi do pinpẹn-nutọn-yinyọnẹn hia na nuhe mẹdevo lẹ wà na mí.

ETẸWẸ HIẸ SỌGAN WÀ? Nọ yí whenu zan nado lẹnayihamẹpọn do onú dagbe he a to vivi etọn dù to alọnu din lẹ ji. Nugbo wẹ dọ nuhahun lẹ sọgan húagbọ́ we. Ṣigba, lẹnnupọndo apajlẹ Ahọlu Davidi tọn ji. Apọ̀ nọ ṣì i to whedelẹnu, podọ whlepọn lẹ nọ gbàhundona ẹn. Etomọṣo, e hodẹ̀ hlan Jiwheyẹwhe dọmọ: “Yẹn lẹn azọ́n towe lẹpo pọ́n; yẹn ayihamẹlẹnpọn na azọ́n alọ towe tọn lẹpo.” (Psalm 143:3-5) Mahopọnna whlepọn he Davidi pehẹ lẹ, e do pinpẹn-nutọn-yinyọnẹn hia bosọ yin pekọnọ.

Nọ lẹnnupọndo nuhe mẹdevo lẹ wà nado gọalọna we ji, bo nọ do pinpẹn-nutọn-yinyọnẹn hia na vivẹnudido yetọn. Jesu ze apajlẹ ayidego tọn de dai gando ninọmẹ ehe go. Di apajlẹ, to whenuena họntọn etọn Malia kọ̀n amisisa he vẹahi taun do ota na ẹn podọ do afọ etọn lẹ ji, mẹdelẹ kanse dọ: “Naegbọn amisisa owán gblingblinnọ ehe do to yinyin hinhẹngú?”a Homọdọdomẹgotọ enẹlẹ mọdọ yè dona ko sà amisisa lọ bo na akuẹ lọ wamọnọ lẹ. Ṣigba, Jesu gblọn dọmọ: “Mì jo nawe lọ do. Naegbọn mì to tintẹnpọn nado dotukla ẹ?” Enẹgodo e yidogọ dọmọ: “Ewọ wà nuhe go e pé.” (Malku 14:3-8; Johanu 12:3) Kakati Jesu nido ze ayidonugo do nuhe Malia ma wà ji, e do pinpẹn-nutọn-yinyọnẹn hia na nuhe Malia wà.

Mẹdelẹ nọ yọ́n pinpẹn hagbẹ whẹndo tọn, họntọn, po dona devo lẹ po tọn kiki to whenuena yé ko hẹn yé bu godo. Hiẹ sọgan dapana ninọmẹ awubla tọn he enẹ nọ hẹnwa gbọn nulinlẹnpọn do nudagbe he a to vivi etọn dù to alọnu din lẹ ji! Naegbọn hiẹ ma na lẹnnupọndo apajlẹ tangan delẹ ji, podọ vlavo bo tlẹ wlan yé dai?

To whenuena e yindọ Jiwheyẹwhe dè wẹ “nunina dagbe lẹpo” nọ wá sọn, mí na wà dagbe nado nọ dopẹna ẹn to odẹ̀ mẹ. (Jakọbu 1:17) Mọwiwà whẹwhẹ sọgan gọalọna mí nado nọ do pinpẹn-nutọn-yinyọnẹn hia bo wleawuna pekọ tintindo.—Filippinu lẹ 4:6, 7.

[Nudọnamẹ odò tọn]

[Yẹdide to weda 6]

Be hiẹ nọ yọ́n pinpẹn nuhe mẹdevo lẹ wà na we tọn ya?