Vò sọn Lẹnpọn Si

“Mì yin magbọjẹnọ na osọ he ja gbede blo, na osọ he ja na tindo magbọjẹ etọn titi lẹ.”—MATIU 6:34.

Zẹẹmẹ: Mí ma gán dapana lẹnpọn mlẹnmlẹn. Amọ́, ma nọ yí lẹnpọn kavi magbọjẹ osọ he ja tọn lẹ dogọ egbehe tọn lẹ blo. Nọ dọ azán dopodopo tọn.

• Lẹnpọn glanglan gán hẹn we jẹflumẹ. Enẹwutu, tẹ́n ehe pọ́n: Tintan, hẹn do ayiha mẹ dọ ninọmẹ gbẹ̀mẹ tọn delẹ nọ hẹn lẹnpọn wá dandan. Amọ́, nuhiha zẹjlẹgo nọ hẹn nulẹ vantan. Awetọ, nọ flindọ nulẹ ma nọ saba yì do lehe mí lẹn do.

“Nuyọnẹn he wá sọn aga . . . yin lẹnpọn dagbenọ.”—JAKỌBU 3:17.

Zẹẹmẹ: Ma nọ donukun dọ nulẹpo na yì do lehe a jlo do blo. Nọ nọ̀ jlẹkaji to nuhe a nọ donukun sọn dewe po mẹdevo lẹ po si mẹ.

• Yin whiwhẹnọ podọ lẹnpọn dagbenọ, bo yọnẹn dọ nugopipe towe po mẹdevo lẹ po tọn do dogbó. Mọwiwà na zọ́n bọ a na de lẹnpọn pò na dewe po mẹhe lẹdo we lẹ po bọ nulẹ nasọ yì ganji. Humọ, nọ dọ fànfún. Eyin a nọ konu to whenue nulẹ ma tlẹ to yìyì ganji, enẹ na de lẹnpọn pò na we bo na we ayajẹ jẹ obá de mẹ.

“Mẹhe tindo wuntuntun na nọ gbọṣi abọẹ.”—HOWHINWHẸN LẸ 17:27.

Zẹẹmẹ: Numọtolanmẹ agọ̀ lẹ gán zọ́n bọ a ma na lẹnnupọn ganji ba, enẹwutu nọ duto dewe ji.

• Tẹnpọn bo yọ́n nuhe to lẹnpọn hẹnwa na we bo doayi lehe a to nuyiwa sọta ẹ do go. Di apajlẹ, eyin nude hẹn we biọ lẹnpọn mẹ, doayi linlẹn, numọtolanmẹ po nuyiwa towe lẹ po go, podọ a tlẹ gán kàn yé dai. Eyin a yọ́n aliho he mẹ a to nuyiwa sọta lẹnpọn te, e gán bọawuna we nado dudeji. Humọ, nọ kàn ayiha nado de nuhe nọ hẹn lẹnpọn wá na we lẹ pò. Eyin e ma pà we, dín aliho lẹ nado nọ duto yé ji, vlavo a gán hẹn aliho azọ́nwiwa tọn towe pọnte kavi zan whenu towe po nuyọnẹn po dogọ.

• Nọ diọ linlẹn towe. Nuhe nọ hẹn we biọ lẹnpọn mẹ gán nọma yin onú sinsinyẹn na mẹdevo. Popolẹpo nọ sinai do aliho he mẹ mẹdopodopo nọ lẹnnupọn te ji. Pọ́n ayinamẹ atọ̀n ehelẹ:

  1. Ma nọ yawu wá tadona agọ̀ kọ̀n blo. Vlavo, mẹde wẹ sún vaun bo wá ṣí nukọnna we to whenue mì to debọdo-dego nado wà nude. Eyin a lẹndọ mẹlọ yọnẹn fẹẹ do wàmọ, homẹ gán gble we. Kakatimọ, be e ma na pọnte nado lẹndọ e ma yọnẹn do basi ya? E gán yindọ nugbo lọ niyẹn.

  2. Nọ pọ́n adà dagbe nulẹ tọn. Eyin ninọmẹ de biọ dọ a ni nọte to dotowhé kavi to agahun-glintẹn de na ojlẹ dindẹn, a na dapana lẹnpọn eyin a yí ojlẹ enẹ do hiawe, wazọ́n to ọdinatẹẹ ji kavi hia wekanhlanmẹ he to alokan towe ji lẹ.

  3. Nọ mọnú zẹ̀ nuhahun lẹ go. Kanse dewe dọ, ‘Be ninọmẹ ehe na gbẹ́ yin nuhahun to osọ kavi to osẹ he ja mẹ wẹ ya?’ Nọ yọ́n vogbingbọn to nuhahun flinflin po ninọmẹ sinsinyẹn lẹ po ṣẹnṣẹn.

“Mì gbọ nulẹpo ni nọ yin wiwà dile e jẹ do podọ to titoji.”—1 KỌLINTINU LẸ 14:40.

Zẹẹmẹ: Gbẹzan towe ni nọ nọ̀ titoji.

• Mí nọ jlo dọ nulẹ ni yì ganji to gbẹzan mítọn mẹ. Dopo to nuhe gán hẹn tito mítọn lẹ gble bo do lẹnpọn na mí lẹ mẹ wẹ gbàndindọn, podọ ehe gán zọ́n bọ azọ́n na fọ́n bo to pipli dai na we mapote. Be a gán tẹ́n ayinamẹ ehelẹ pọ́n ya?

  1. Nọ basi tito nuhe a dona wà lẹ tọn, bo nọ hodo e.

  2. Nọ doayi nuhe nọ zọ́n bọ a nọ dọngbàn lẹ go bo basi vọjlado.

“Gbọjẹ vude pọnte hú kanvinván zẹjlẹgo po wezundido to jẹhọn godo po.”—YẸWHEHODỌTỌ 4:6.

Zẹẹmẹ: Mẹhe yiwanna azọ́n gbau lẹ ma nọ mọaleyi sọn “kanvinván zẹjlẹgo” yetọn mẹ. Yé masọ nọ do whenu kavi huhlọn he na zọ́n bọ yé na duvivi azọ́n yetọn tọn.

• Nọ ze azọ́n po akuẹ po do otẹn yetọn mẹ. Akuẹ susu tintindo ma nọ namẹ ayajẹ kavi de lẹnpọn pò. E tlẹ gán tlọmẹ. Yẹwhehodọtọ 5:12 dọ dọ, “nutindo susugege adọkunnọ tọn ma nọ na ẹn agbọ́ nado damlọn.” Enẹwutu, nọ tindo pekọ to nuhe a do lẹ mẹ.

• Nọ dín whenu nado deayidai. Lẹnpọn towe na depò eyin a nọ daihun he a yiwanna lẹ. Amọ́, ayidedai he ma nọ biọ vivẹnudido sọmọ lẹ, taidi televiziọn pinpọn gán nọma gọalọ.

• Nọ yí nuyọnẹn do zan alokan, tablẹti po onú mọnkọ devo lẹ po. Nọ dapana wekanhlanmẹ alokan ji tọn lẹ pinpọn whẹwhẹ, kavi Intẹnẹt ji yìyì whepoponu nado dọho hẹ họntọn lẹ. Adavo e biọ domọ, ma nọ hia wekanhlanmẹ he gando azọ́n go lẹ to azọ́n godo blo.

“Agbasa yiyizan yin alenu na onú vude.”—1 TIMOTI 4:8.

Zẹẹmẹ: E nọ yọ́n dọ yè ni zan agbasa whẹwhẹ.

• Wleawuna aṣa dagbe lẹ. Agbasa yiyizan gán zọ́n bọ a na vò sọn ayiha mẹ. Nọ dù núdùdù he na na we hunsindagbe; podọ nọ dùnú do gànmẹ. Nọ gbọjẹ ganji.

• Nọ dapana pọngbọ agọ̀ dindin na lẹnpọn, taidi azọ̀-nùnù, amasin adínọ kavi ahàn sinsinyẹn ṣiṣizan. Dile ojlẹ to yìyì, aṣa ehelẹ nọ hẹn lẹnpọn wá dogọ bo tlẹ gán bẹpla agbasalilo towe bosọ vọ̀ akuẹ na we.

• Yì dotowhé eyin lẹnpọn towe di nuhe ma gán pọnte. Alọgọ doto de tọn dindin ma yin winyannu.

“Mọdona nuhe yin nujọnu hugan lẹ.”—FILIPINU LẸ 1:10.

Zẹẹmẹ: Whesọ bo de nuhe na nọ otẹn tintan mẹ na we lẹ.

• Nọ tẹnpọn nado yọ́n azọ́n he yin nujọnu hugan lẹ. Ehe na gọalọna we nado nọ na ayidonugo azọ́n he to niyaniya mẹ lẹ, bo yọ́n dehe a gán wà to nukọn mẹ lẹ, dehe a gán dena mẹdevo, kavi tlẹ jodo lẹ.

• Na osẹ dopo, ze ayiha do lehe a nọ zan whenu towe do ji. Enẹgodo, dín aliho devo lẹ nado zan whenu towe ganji dogọ. Mọwiwà na zọ́n bọ azọ́n ma na nọ pli do kọ̀ji na we.

• Nọ de whenu dovo nado gbọjẹ. Ojlẹ kleunkleun delẹ yíyí do de ayiha sọn azọ́n ji gán vọ́ huhlọn na we bọ lẹnpọn towe na depò.

“Magbọjẹ he to ahun gbẹtọ tọn mẹ nọ hẹn agbàn pẹ̀n ẹn, ṣigba, ohó dagbe nọ vọ́ zodolanmẹna ẹn.”—HOWHINWHẸN LẸ 12:25.

Zẹẹmẹ: Ohó dagbe lẹ sisè gán wà dagbe na we.

• Nọ dọhodo nuhe to tuklado we lẹ ji hẹ mẹhe gán mọnukunnujẹemẹ de. Omẹ mọnkọ gán gọalọna we nado mọ nulẹ to aliho devo mẹ kavi de ayiha dagbe de tọ́n he a ma na ayidonugo sọmọ. Hodidọ tọ́n gán zọ́n bọ a na vò to dewe mẹ.

• Nọ biọ alọgọ. Eyin azọ́n sù do we, be a gán de vude na mẹdevo kavi biọ dọ mẹde ni wazọ́n hẹ we ya?

• Eyin nuyiwa azọ́nwatọgbẹ́ de tọn wẹ nọ hẹn we biọ lẹnpọn mẹ, dín aliho lẹ nado vọ́ ninọmẹ lọ jlado. Di apajlẹ, a gán dọnsẹpọ mẹlọ bo yí ogbè fifá do dọ numọtolanmẹ towe lẹ na ẹn gando whẹho lọ go. (Howhinwhẹn lẹ 17:27) Eyin enẹ ma pà we, be a gán de whenu he a nọ zan hẹ mẹlọ pò ya?

“Ayajẹnọ wẹ mẹhe yọnẹn dọ yé tindo nuhudo gbigbọmẹ tọn lẹ.”—MATIU 5:3.

Zẹẹmẹ: E ma yin núdùdù, avọ̀ po ohọ̀ po kẹdẹ sin hudo wẹ gbẹtọ do. Mí do nuhudo gbigbọmẹ tọn lẹ. Nado do ayajẹ, mí dona yọnẹn dọ mí tindo nuhudo enẹ bo nọ hẹn pekọ wá na ẹn.

• Dẹ̀hiho nọ gọalọ taun. Jiwheyẹwhe jlo dọ a ni ‘to magbọjẹ towe lẹpo bẹ dlan ewọ ji, na e to towe hòpọn wutu.’ (1 Pita 5:7) Dẹ̀hiho po ayihamẹlinlẹnpọn do nudagbe lẹ ji po gán na we jijọho ahun mẹ tọn.—Filipinu lẹ 4:6, 7.

• Nọ hia nuhe na hẹn we dọnsẹpọ Jiwheyẹwhe lẹ. Ayinamẹ he to linlinwe ehe mẹ lẹ wá sọn Biblu mẹ, yèdọ owe he yin kinkan nado hẹn pekọ wá na nuhudo gbigbọmẹ tọn mítọn lẹ. Ayinamẹ enẹlẹ sọ nọ zọ́n bọ yè nọ tindo “nuyọnẹn yọ́n-na-yizan po nugopipe nulẹnpọn tọn po.” (Howhinwhẹn lẹ 3:21) Be e ma na yọ́n dọ a ni yí Biblu hihia do dó yanwle ya? A gán bẹsọn owe Howhinwhẹn lẹ tọn ji.