Weta 10

Gbejizọnlin Yì Jelusalẹm

AMÀKIKỌ-whenu ko wá. Podọ ojlẹ ko wá na whẹndo Josẹfu tọn, to pọmẹ po họntọn lẹ po gọna hẹnnumẹ lẹ, nado zin gbejizọnlin amàkikọ-whenu whemẹwhemẹ tọn yetọn yì Jelusalẹm nado basi hùnwhẹ Juwayi tọn. Dile yé bẹ gbejizọnlin nudi kilomẹtlu 100 tọn nkọtọn jẹeji, yé nọ gọ́ na ayajẹ dile e nọ saba yin do. Jesu ko yin owhe 12 mẹvi todin, podọ e to nukọnpọnhlan po ojlo vonọtaun po na hùnwhẹ lọ.

Na Jesu po whẹndo etọn po, Juwayi lọ ma yin whẹho azán dopo tọn de poun gba. Yé sọ nọte jẹ azán Hùnwhẹ Akla Madotọ́n azán ṣinawe tọn he bọdego lọ whenu, ehe yé pọndohlan nado yin apadewhe ojlẹ Juwayi lọ tọn. Taidi kọdetọn de, gbejizọnlin lọ lẹpo sọn owhé yetọn gbè to Nazalẹti, gọna Jelusalẹm ninọ, yí nudi osẹ awe. Ṣigba to owhe ehe mẹ, na nude he gando Jesu go wutu, e dẹn hugan mọ.

Nuhahun lọ sọawuhia to whenuena yé zin gbejizọnlin lẹkọja sọn Jelusalẹm. Josẹfu po Malia po lẹndọ Jesu tin to pipli hẹnnumẹ po họntọn he to gbejizọnlinzin dopọ lọ lẹ po mẹ. Ṣogan e ma sọawuhia to whenuena yé nọte to ozán lọ mẹ gba, bọ yé jẹ díndín in pé to mẹhe yé to gbejizọnlinzin hẹ lẹ ṣẹnṣẹn. Yé ma mọ ẹn to fidepope. Enẹwutu Josẹfu po Malia po lẹkọ kaka wá Jelusalẹm nado dín in mọ.

Yé dín in pé na azán blebu dopo, ṣigba matin kọdetọn dagbe. To azán awetọ gbè yé ma mọ ẹn janwẹ. To godo mẹ, to azán atọ̀ntọ gbè, yé yì tẹmpli mẹ. To finẹ, to dopo to plitẹnhọ etọn lẹ mẹ, yé mọ Jesu sinai to mẹplọntọ Ju lẹ tọn ṣẹnṣẹn, bo to todoai hlan yé bosọ to kanbiọ lẹ kanse.

“Ovi, etẹwutu wẹ hiẹ wà mọ hẹ mí?” wẹ Malia kanse. “Pọ́n otọ́ towe po yẹn po ko to díndín we pé po awubla po.”

E paṣa Jesu dọ yé ma yọ́n fie yé sọgan mọ ẹn te. “Etẹwutu wẹ mì to díndín mi pé?” wẹ e kanse. “Mì ma yọnẹn dọ yẹn ma sọgan nọ ma tin to azọ́n Otọ́ ṣie tọn kọ̀n?”

Jesu ma mọnukunnujẹemẹ nuhewutu mẹjitọ etọn lẹ ma do sọgan yọ́n ehe gba. Enẹgodo, Jesu lẹkọyi whé po mẹjitọ etọn lẹ po bo zindonukọn nado to taliai hlan yé. E to nukọnzindo to nuyọnẹn mẹ podọ to whinwhẹ́n agbasa tọn mẹ to nukundagbe Jiwheyẹwhe po gbẹtọ lẹ po tọn tintindo mẹ. Mọwẹ, sọn ovu-whenu etọn gbọ́n, Jesu ze apajlẹ dagbe dai e mayin to dagbenu gbigbọmẹ tọn lẹ díndín kẹdẹ mẹ wẹ gba ṣigba to sisi didohia mẹjitọ etọn lẹ mẹ ga. Luku 2:40-52; 22:7.

▪ Gbejizọnlin amàkikọ-whenu tọn tẹwẹ Jesu nọ basi whepoponu hẹ whẹndo etọn, podọ nawẹ e nọ dẹn sọ?

▪ Etẹwẹ jọ to gbejizọnlin he yé basi to whenuena Jesu yin owhe 12 mẹvi whenu?

▪ Apajlẹ tẹwẹ Jesu zedai na jọja lẹ to egbehe?