Weta 27

Oylọ-Bibasi Na Matiu

WHENU vude to azọ̀nhẹngbọna awukuzọ̀njẹtọ lọ godo, Jesu tọ́nsọn Kapẹlnaumi yì Ohù Galili tọn kọ̀n. Whladopo dogọ gbẹtọgun lẹ wá e dè, bọ e sọ jẹ nuplọn yé ji. Dile e zinzọnlin jei, e mọ Matiu, mẹhe sọ nọ yin yiylọdọ Levi, to aisinsin to wekantẹn takuẹ-yíyí tọn. “Hodo mi,” wẹ yin oylọ-basinamẹ Jesu tọn.

Vlavo, Matiu ko jẹakọ hẹ nuplọnmẹ Jesu tọn lẹ, yèdọ dile Pita, Andlé, Jakobu, po Johanu po basi do to whenuena yé yin yiylọ. Podọ taidi yewlẹ, Matiu yigbe hlan oylọ-basinamẹ lọ to afọdopolọji. E fọ́n, jo azọngban etọn do taidi takuẹ-ṣinyantọ de, bo hodo Jesu.

To godo mẹ, vlavo nado basi hùnwhẹ alọkikẹyi oylọ etọn tọn, Matiu basi titona hùnwhẹ jonọyiyi daho de tọn to owhé etọn gbè. Gọna Jesu po devi Etọn lẹ po, gbẹdohẹmẹtọ dai tọn Matiu tọn lẹ tin to finẹ. Omẹ ehelẹ nọ yin vivlẹko to paa mẹ gbọn Ju hatọ yetọn lẹ dali na yé nọ ṣinyan takuẹ na aṣẹpatọ Lomu tọn he yin wangbẹna lẹ wutu. Humọ, yé nọ saba yí nugbomadọ do biọ akuẹ susu dogọ sọn gbẹtọ lẹ si hugan takuẹ paa he yin bibiọ lọ.

To mimọ Jesu to jonọyiyi lọ tẹnmẹ po gbẹtọ mọnkọtọn lẹ po, Falesi lẹ kanse devi etọn lẹ dọmọ: “Etẹwutu wẹ Mẹplọntọ mìtọn to núdù hẹ [takuẹ-ṣinyantọ] po ylandonọ lẹ po?” To gbigblató kanbiọ lọ, Jesu na gblọndo Falesi lẹ dọmọ: “Yé he to gángán ma tindo nuwhedo [doto tọn, NW ] gba, adavo yé he to azọ̀njẹ lẹ. Ṣigba mì yì, bo plọn nuhe ehe yin, Yẹn nọ jlo lẹblanu, e ma yin avọ́: na yẹn ma wá nado ylọ dodonọ lẹ gba, adavo ylandonọ lẹ.”

E họnwun dọ, Matiu ko basi oylọ na takuẹ-ṣinyantọ ehelẹ wá owhé etọn gbè na yé nido dotoai hlan Jesu bo mọ azọ̀nhẹngbọ gbigbọmẹ tọn yí. Enẹwutu Jesu kọnawudopọ hẹ yé nado gọalọna yé nado tindo haṣinṣan dagbe de hẹ Jiwheyẹwhe. Jesu ma vlẹ omẹ mọnkọtọn lẹ kò, dile Falesi dodonọ mẹdetiti tọn jlatọ lẹ nọ basi do gba. Kakatimọ, yin whinwhàn gbọn awuvẹmẹ dali, taidi kọdetọn de, ewọ yinuwa taidi doto gbigbọmẹ tọn de hlan yé.

Gbọnmọ dali lẹblanu didohia Jesu tọn hlan ylandonọ lẹ ma yin alọkikẹyi ylando yetọn lẹ gba ṣigba dohia numọtolanmẹ awuvẹmẹ tọn dopolọ he e dohia hlan mẹhe to azọ̀njẹ to agbasa mẹ lẹ. Di apajlẹ, flin, whenuena e gbọn awuvẹmẹ dali dlẹn alọ etọn bo doalọ pòtọnọ lọ go, bo dọmọ: “Yẹn jlo, hiẹ ni zun wiwe.” Mọdopolọ na mí ni do lẹblanu hia gbọn alọgigọna mẹhe tin to nuhudo mẹ lẹ dali, titengbe nado gọalọna yé to gbigbọ-liho. Matiu 8:3; 9:9-13; Malku 2:13-17; Luku 5:27-32.

▪ Fie wẹ Matiu tin te to whenuena Jesu mọ ẹn?

▪ Azọ́n tẹwẹ Matiu nọ wà, podọ naegbọn omẹ mọnkọtọn lẹ nọ yin vivlẹko gbọn Ju devo lẹ dali?

▪ Homọdọdomẹgo tẹwẹ yin didọ sọta Jesu, podọ nawẹ ewọ yigbe gbọn?

▪ Naegbọn Jesu do dogbẹ́ hẹ ylandonọ lẹ?